ପାକିସ୍ତାନ ସଂସଦରେ ଆଗତ ହୋଇପାରିଲାନି ଅନାସ୍ଥା ପ୍ରସ୍ତାବ, ଗୃହ ସୋମବାର ପର୍ଯ୍ୟନ୍ତ ମୁଲତବୀ
ଇସଲାମାବାଦ : ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାଁଙ୍କ ବିରୋଧରେ ଆଗତ ଅନାସ୍ଥା ପ୍ରସ୍ତାବ ପାଇଁ ଆୟୋଜିତ ପାକିସ୍ତାନ ନ୍ୟାସନାଲ ଆସେମ୍ବଲିର ସ୍ବତନ୍ତ୍ର ଅଧିବେଶନ ଆରମ୍ଭ ହୋଇଛି । କିନ୍ତୁ ଆଜି ଏହି ଅଧିବେଶନ ଆରମ୍ଭ ହୋଇଥିଲେ ବି ଅନାସ୍ଥା ପ୍ରସ୍ତାବ ଆଗତ ହୋଇପାରିନାହିଁ । ବାଚସ୍ପତି ଅଧିବେଶନକୁ ଆସନ୍ତା ସୋମବାର ଅର୍ଥାତ ୨୮ ତାରିଖ ପର୍ଯ୍ୟନ୍ତ ମୁଲତବି କରିଦେଇଛନ୍ତି । ସୋମବାର ହିଁ ଏହି ପ୍ରସ୍ତାବ ଆଗତ ହେବ ।
Sambad is now on WhatsApp
Join and get latest news updates delivered to you via WhatsApp
ଆଜିର ଅଧିବେଶନରେ ଶାସକ ଦଳ ପକ୍ଷରୁ ଶାହ ମହମ୍ମଦ କୁରେସୀ, ସାରିନ ମଜାରି,ଅସଦ ଉମର ପ୍ରଭୃତି ଯୋଗ ଦେଇଥିବାବେଳେ ବିରୋଧୀ ଦଳ ପକ୍ଷରୁ ଶାହବାଜ ସରିଫ (ପିଏମଏଲ-ଏନ), ବିଲାଓ୍ବାଲ ଭୁଟୋ (ପିପିପି) ଓ ତାଙ୍କ ପିତା ଆସିଫ ଅଲି ଜର୍ଦାରୀ ଉପସ୍ଥିତ ଥିଲେ । ବିରୋଧୀ ଶିବିରର ମୋଟ ୧୫୦ ସାଂସଦ ଯୋଗଦେଇଥିଲେ ।
ସୂଚନାଯୋଗ୍ୟ ଯେ, ପାକିସ୍ତାନର ପ୍ରମୁଖ ଦୁଇ ବିରୋଧୀ ଦଳ ପାକିସ୍ତାନ ମୁସଲିମ ଲିଗ-ନଓ୍ବାଜ୍ (ପିଏମଏଲ-ଏନ)ଓ ପାକିସ୍ତାନ ପିପୁଲ୍ସ ପାର୍ଟି ପକ୍ଷରୁ ଏହି ଅନସ୍ଥା ପ୍ରସ୍ତାବ ଆଗତ କରାଯାଇଛି । ପାକିସ୍ତାନ ଜାତୀୟ ଆସେମ୍ବଲିକୁ ଦିଆଯାଇଥିବା ଏହି ଅନାସ୍ଥା ପ୍ରସ୍ତାବରେ ୧୦୦ ଜଣ ସାଂସଦ ସ୍ବାକ୍ଷର କରିଛନ୍ତି । ଅନାସ୍ଥା ପ୍ରସ୍ତାବ ଗୃହୀତ ହେବା ପାଇଁ ୩୪୨ ସଦସ୍ୟ ବିଶିଷ୍ଟ ପାକିସ୍ତାନ ଜାତୀୟ ଆସେମ୍ବଲିରେ ଅତିକମରେ ୧୭୨ ସଦସ୍ୟଙ୍କ ସମର୍ଥନ ଆବଶ୍ୟକ । ଅର୍ଥାତ ବିରୋଧୀ ଦଳମାନେ ଅତିକମରେ ୧୭୨ ସଦସ୍ୟଙ୍କ ସମର୍ଥନ ଯୋଗାଡ଼ କରିପାରିଲେ ଇମ୍ରାନ ଖାଁ ଗାଦିଚ୍ୟୁତ ହେବା ନିଶ୍ଚିତ ।