ନୂଆଦିଲ୍ଲୀ: ଏବେ ଅନ୍ୟ ଦେଶକୁ ଧମକ ଦେଲା ୟୁକ୍ରେନ ଉପରେ ଆକ୍ରମଣ କରୁଥିବା ରୁଷ। ଯଦି କୌଣସି ଦେଶ ୟୁକ୍ରେନ ବିରୋଧରେ ଚାଲିଥିବା ଯୁଦ୍ଧରେ ହସ୍ତକ୍ଷେପ କରନ୍ତି ତେବେ ସେହି ଦେଶ ଉପରେ ଆକ୍ରମଣ କରିବାକୁ ଧମକ ଦେଇଛନ୍ତି ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ। ବୁଧବାର ରୁଷର ରାଷ୍ଟ୍ରପତି ଭ୍ଲାଦିମିର ପୁଟିନ କହିଛନ୍ତି ଯେ, ଯୁଦ୍ଧରେ ହସ୍ତକ୍ଷେପ କରିବାକୁ ନିଷ୍ପତ୍ତି ନେଇଥିବା ଦେଶ ଉପରେ ତୁରନ୍ତ ଆକ୍ରମଣ ପାଇଁ ରୁଷ ସମସ୍ତ ବ୍ୟବସ୍ଥା କରିଛି।
Sambad is now on WhatsApp
Join and get latest news updates delivered to you via WhatsApp
ୟୁକ୍ରେନକୁ ଅସ୍ତ୍ର ପଠାଇବା ବନ୍ଦ କର ବୋଲି ଆମେରିକାକୁ ପୁଟିନ କହିବା ସହ ପାଶ୍ଚାତ୍ୟ ଦେଶକୁ ଟାର୍ଗେଟ କରିଛନ୍ତି। ସେ କହିଛନ୍ତି ଯେ, ପାଶ୍ଚାତ୍ୟ ଦେଶରୁ ବୃହତ ଅସ୍ତ୍ରଶସ୍ତ୍ର ବିତରଣ ଯୁଦ୍ଧକୁ ଆହୁରି ଉତ୍ତେଜିତ କରୁଛି। ବୁଧବାର ସେଣ୍ଟ ପିଟସବର୍ଗରେ ସାଂସଦମାନଙ୍କୁ ସମ୍ବୋଧିତ କରି ପୁଟିନ କହିଛନ୍ତି ଯେ, ପଶ୍ଚିମ ଦେଶମାନେ ଏକାଠି ରୁଷକୁ ବିଭିନ୍ନ ଭାଗରେ ବିଭକ୍ତ କରିବାକୁ ଚାହୁଁଛନ୍ତି। ୟୁକ୍ରେନକୁ ରୁଷ ସହିତ ଯୁଦ୍ଧ କରିବାକୁ ମଧ୍ୟ ପାଶ୍ଚାତ୍ୟ ଦେଶମାନେ ପ୍ରବର୍ତ୍ତାଇଥିବା ଅଭିଯୋଗ କରିଛନ୍ତି ପୁଟିନ।
ପୁଟିନ ଆହୁରି କହିଛନ୍ତି ଯେ ଯଦି କେହି ୟୁକ୍ରେନ ବିରୋଧରେ ଚାଲିଥିବା ଯୁଦ୍ଧରେ ହସ୍ତକ୍ଷେପ କରି ରୁଷ ପାଇଁ କୌଣସି ବିପଦ ସୃଷ୍ଟି କରନ୍ତି, ତେବେ ଏହା ଆମ ପାଇଁ ଗ୍ରହଣୀୟ ନୁହେଁ। ଯଦି ଏହା ଘଟେ, ଆମେ ସେହି ଦେଶମାନଙ୍କଠାରୁ ପ୍ରତିଶୋଧ ନେବୁ। ଆକ୍ରମଣ କରିବା ପାଇଁ ଆମ ପାଖରେ ଯଥେଷ୍ଟ ଅସ୍ତ୍ର ଅଛି।ଏହା ମୋର ଗର୍ବ ନୁହେଁ, କିନ୍ତୁ ଦରକାର ପଡ଼ିଥିଲେ ବିରୋଧୀ ଦେଶ ଉପରେ ଆକ୍ରମଣ କରି ସେମାନଙ୍କୁ ଉଚିତ୍ ଶିକ୍ଷା ଦେବୁ।