କରୋନାଭାଇରସ୍ ସଂକ୍ରମଣ ଆଶଙ୍କାରେ ବାର୍ଷିକ ଅଧିବେଶନ ବାତିଲ କଲା ‘ଆର୍ଏସ୍ଏସ୍’
ନୂଆଦିଲ୍ଲୀ: ରାଷ୍ଟ୍ରୀୟ ସ୍ୱୟଂ ସେବକ ସଙ୍ଘ (ଆର୍ଏସ୍ଏସ୍) ତା’ର ବାର୍ଷିକ ଅଧିବେଶନ ବାତିଲ କରିଥିବା କଥା ଶନିବାର ଦିନ ଘୋଷଣା କରିଛି। ‘ଆର୍ଏସ୍ଏସ୍’ର ସର୍ବୋଚ୍ଚ ନିଷ୍ପତ୍ତି ଗ୍ରହଣକାରୀ ‘ଅଖିଳ ଭାରତୀୟ ପ୍ରତିନିଧି ସଭା’ ଏହି ଅଧିବେଶନରେ ସମବେତ ହୁଅନ୍ତି। କରୋନାଭାଇରସ୍ ସଂକ୍ରମଣ ଆଶଙ୍କା ଥିବାରୁ ସରକାର ସଭାସମିତିରେ ହେଉଥିବା ଜନସମାଗମ ଉପରେ କଟକଣା ଲାଗୁ କରିଛନ୍ତି। ସରକାରଙ୍କର ନିର୍ଦେଶାବଳୀ ଆଧାରରେ ଏହି ଅଧିବେଶନ ବାତିଲ କରାଯାଇଥିବା ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ମାର୍ଚ ୧୫ ରୁ ମାର୍ଚ ୧୭ ତାରିଖ ଯାଏଁ ବେଙ୍ଗାଲୁରୁରେ ବସିବାକୁ ଥିବା ଏହି ଅଧିବେଶନ ବାତିଲ କରାଯାଇଥିବା କଥା ‘ଆର୍ଏସ୍ଏସ୍’ର ସାଧାରଣ ସଚିବ ସୁରେଶ ଭୈୟାଜି ଯୋଶୀ ଏକ ବିବୃତିରେ କହିଛନ୍ତି।
ତିନି ଦିନ ବ୍ୟାପୀ ହେଉଥିବା ‘ଅଖିଳ ଭାରତୀୟ ପ୍ରତିନିଧି ସଭା’ରେ ଆର୍ଏସ୍ଏସ୍ ସମେତ ଏହାର ଅନୁବନ୍ଧିତ ସମସ୍ତ ସଂଗଠନର ମୁଖ୍ୟମାନେ ଅଂଶଗ୍ରହଣ କରନ୍ତି। ଭାରତୀୟ ଜନତା ପାର୍ଟିର ଅଧ୍ୟକ୍ଷ ମଧ୍ୟ ଏଥିରେ ସାମିଲ ହୁଅନ୍ତି।
୧୧ଟି ଜୋନ୍ରୁ ପ୍ରାୟ ୧୫୦୦ ପ୍ରତିନିଧି ଏଥିରେ ଯୋଗ ଦେଇ ଥାଆନ୍ତେ। ଏହାଛଡ଼ା ୪୪ଟି ସେକ୍ସନ୍ର ରାଜ୍ୟସ୍ତରୀୟ ନିର୍ବାହୀ, ୩୫ଟି ସଂଗଠନର ଜାତୀୟସ୍ତରୀୟ ପ୍ରତିନିଧି ଏବଂ ସ୍ୱତନ୍ତ୍ର ଭାବେ ନିମନ୍ତ୍ରିତ ଅତିଥି ଏଥିରେ ଯୋଗ ଦେଇଥାଆନ୍ତେ।
ପୂର୍ବରୁ ମାତ୍ର ଦୁଇ ଥର ଏହି ଅଧିବେଶନ ବାତିଲ ହୋଇଥିଲା। ଥରେ ମହାତ୍ମା ଗାନ୍ଧୀଙ୍କ ହତ୍ୟା ସମୟରେ ଓ ଆଉ ଥରେ ଜରୁରୀ ପରିସ୍ଥିତି ଜାରି ସମୟରେ ‘ଆର୍ଏସ୍ଏସ୍’କୁ ନିଷିଦ୍ଧ କରାଯାଇଥିଲା।