ମସ୍କୋ : ଏକ ତିନିଦିନିଆ ରାଜକୀୟ ରୁଷ ଗସ୍ତରେ ଅଛନ୍ତି ଚୀନ ରାଷ୍ଟ୍ରପତି ସି ଜିନିପିଙ୍ଗ୍ । ସେ ସୋମବାରଦିନ ମସ୍କୋରେ ପହଞ୍ଚିଛନ୍ତି । ସେ ମସ୍କୋର ଭିନୁକୋଭୋ ଏୟାରପୋର୍ଟରେ ପହଞ୍ଚିବା ପରେ ତାଙ୍କୁ ରୁଷ ପକ୍ଷରୁ ଭବ୍ୟ ସ୍ବାଗତ କରାଯାଇଥିଲା । ସେ ଆସନ୍ତା ୨୨ ତାରିଖ ପର୍ଯ୍ୟନ୍ତ ରୁଷରେ ରହିବେ ଓ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ଆଲୋଚନା କରିବେ ।
Sambad is now on WhatsApp
Join and get latest news updates delivered to you via WhatsApp
ଗତ ସପ୍ତାହରେ ୩ୟ ଥର ପାଇଁ ଚୀନ ରାଷ୍ଟ୍ରପତି ହେବା ପରେ ସି ଜିନପିଙ୍ଗଙ୍କର ଏହା ହେଉଛି ପ୍ରଥମ ବିଦେଶ ଗସ୍ତ । ନିଜର ପ୍ରଥମ ବିଦେଶ ଗସ୍ତ ପାଇଁ ସେ ରୁଷକୁ ବାଛିଥିବାରୁ ତାହା ରୁଷ ଓ ଚୀନ ମଧ୍ୟରେ ଥିବା ଘନିଷ୍ଠ ସଂପର୍କକୁ ବୁଝାଉଛି । ଏହା ସହିତ ଚଳିତ ୟୁକ୍ରେନ ଯୁଦ୍ଧରେ ଚୀନ ଖୋଲାଖୋଲି ରୁଷ ସପକ୍ଷରେ ଛିଡ଼ା ହୋଇଛି ।
ତେବେ ଆଉ ଏକ କାରଣରୁ ଏହି ଗସ୍ତ ଉପରେ ସମଗ୍ର ବିଶ୍ବର ନଜର ରହିଛି । ତାହା ହେଉଛି, ମସ୍କୋରେ ପୁଟିନଙ୍କୁ ଭେଟିବା ପରେ ଭିଡିଓ କନଫରେନ୍ସିଂ ମାଧ୍ୟମରେ ୟୁକ୍ରେନ ରାଷ୍ଟ୍ରପତି ଭୋଲଦୋମିର ଜେଲେନସ୍କିଙ୍କ ସହ ଆଲୋଚନା କରିବାର କାର୍ଯ୍ୟକ୍ରମ ରହିଛି । ଏଥିରୁ ଅନୁମାନ କରାଯାଉଛି ଯେ ଇରାନ-ସାଉଦୀ ଆରବ ମଧ୍ୟରେ ଶାନ୍ତି ସ୍ଥାପନ ପରେ ଚୀନ ଏବେ ରୁଷ ଓ ୟୁକ୍ରେନ ମଧ୍ୟରେ ଶାନ୍ତି ସ୍ଥାପନ ପାଇଁ ଉଦ୍ୟମ କରୁଛି । ଏହି ଉଦ୍ୟମରେ ସଫଳ ହେଲେ ସମଗ୍ର ବିଶ୍ବରେ ଚୀନ ନିଜର ପ୍ରଭାବ ଓ ଭାବମୂର୍ତ୍ତିକୁ ବୃଦ୍ଧି କରିପାରିବ ।