ଭୁବନେଶ୍ବର: ବହୁ ପ୍ରତୀକ୍ଷିତ ଭୁବନେଶ୍ବର ଏମ୍ସ ଧର୍ମଶାଳା ଆଜି ଲୋକାର୍ପିତ ହୋଇଯାଇଛି। ୧୫୯ କକ୍ଷ ଓ ୪୯୨ ଶଯ୍ୟା ବିଶିଷ୍ଟ ଏହି ଧର୍ମଶାଳାକୁ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନ୍ସୁଖ ମାଣ୍ଡଭିୟ ଆଭାସୀ ମାଧ୍ୟମରେ ଉଦ୍ଘାଟନ କରିଛନ୍ତି। ଏଣିକି ନାମମାତ୍ର ମୂଲ୍ୟ ଦେଇ ରୋଗୀ ଓ ସମ୍ପର୍କୀୟମାନେ ରହିପାରିବେ। ତେଣୁ ଏବେ ଆଉ ଲୋକେ ଖରା, ବର୍ଷା, ଶୀତ, କାକରରେ ଖୋଲା ଆକାଶ ତଳେ କଲବଲ ହେବେ ନାହିଁ। ଏମ୍ସକୁ ପ୍ରତିଦିନ ରାଜ୍ୟ ତଥା ରାଜ୍ୟ ବାହାରୁ ୪ ରୁ୫ ହଜାର ରୋଗୀ ଆସୁଛନ୍ତି। ଶଯ୍ୟା ସଂଖ୍ୟା ୧ ହଜାର। ରହିଛି। ସ୍ବଳ୍ପ ମୂଲ୍ୟରେ ଗୁଣାତ୍ମକ ଚିକିତ୍ସା ସେବା ମିଳୁଥିବାରୁ ଅଧିକାଂଶ ଗରିବ ରୋଗୀ ଏଠାକୁ ଆସନ୍ତି। ରୋଗୀ ସଂଖ୍ୟା ଦୃଷ୍ଟିରୁ ଅନେକଙ୍କୁ ଦିନ ଦିନ ଧରି ଅପେକ୍ଷା କରିବାକୁ ପଡ଼େ।
Sambad is now on WhatsApp
Join and get latest news updates delivered to you via WhatsApp
ଦୂରଦୁରାନ୍ତରୁ ଆସିଥିବାରୁ ଓ ପଇସା ଅଭାବରୁ ସେମାନେ ବାଧ୍ୟ ହୋଇ ଏମ୍ସ ପରିସରରେ ଖୋଲା ଆକାଶ ତଳେ ରହିବାକୁ ବାଧ୍ୟ ହୁଅନ୍ତି। ଏମାନଙ୍କ ମଧ୍ୟରେ କର୍କଟ, ହୃଦ୍ରୋଗୀ ଓ ସ୍ନାୟବିକ ରୋଗରେ ପୀଡ଼ିତ ବ୍ୟକ୍ତି ଥାଆନ୍ତି। ବାହାରେ ଅପେକ୍ଷା କରିବା ଯୋଗୁଁ ଉଭୟ ରୋଗୀ ଓ ସମ୍ପର୍କୀୟମାନେ ବଡ଼ କଲବଲ ହୋଇଥାଆନ୍ତି। ତେଣୁ ନାଲ୍କୋ ସହାୟତାରେ ଏହି ଧର୍ମଶାଳା ନିର୍ମାଣ ହୋଇଛି। ଗତବର୍ଷ ଜୁଲାଇରେ ଏହାକୁ କାର୍ଯ୍ୟକ୍ଷମ କରାଯାଇଥିଲା ଏବଂ ୫୮ଜଣଙ୍କ ପାଇଁ ରହିବାର ବ୍ୟବସ୍ଥା ଥିଲା। ସେତେବେଳେ ୫୦ ରୁ ୧୦୦ ଟଙ୍କା ଦେଇ ରୋଗୀ ଓ ସମ୍ପର୍କୀୟ ରହୁଥିଲେ। ଏଠାରେ ପୁରୁଷ ଓ ମହିଳାଙ୍କ ରହିବା ପାଇଁ ଭିନ୍ନ ବ୍ୟବସ୍ଥା କରାଯାଇଛି। ଖାଇବା ପାଇଁ ଡାଇନିଂ ସୁବିଧା ରହିଛି। ୟୁବିଏସ୍ଏସ୍ ସାମାଜିକ ଅନୁଷ୍ଠାନ ଏହାର ପରିଚାଳନା କରୁଛି।