ଚର୍ଚ୍ଚାରେ ସିମ୍ପାଞ୍ଜି ଜୁଲୁ ଓ ଦୁର୍ଗାର ପ୍ରେମ: ଜୁଲୁକୁ ୩୩, ଦୁର୍ଗାକୁ ୬
ବାରଙ୍ଗ: ଗତ କିଛି ଦିନ ହେଲା ନନ୍ଦନକାନନ ପ୍ରାଣୀ ଉଦ୍ୟାନରେ ଦୁଇ ସିମ୍ପାଞ୍ଜିଙ୍କ ପ୍ରେମକୁ ନେଇ ବେଶ୍ ରୋଚକ ଆଲୋଚନା ଚାଲିଛି। ଜୁଲୁ ଓ ଦୁର୍ଗାର ପ୍ରେମ କାହାଣୀକୁ ନେଇ ଗାଇଡ୍ଙ୍କଠାରୁ ଆରମ୍ଭ କରି ପର୍ଯ୍ୟଟକଙ୍କ ଯାଏଁ ସବୁଠି ଚର୍ଚ୍ଚା। ଜୁଲୁର ବୟସ ୩୩ ବର୍ଷ ଓ ଦୁର୍ଗାର ବୟସ ମାତ୍ର ୬ ବର୍ଷ ହୋଇଥିବାରୁ ସେମାନଙ୍କ ମିଳନକୁ ନେଇ ସରଗରମ ଆଲୋଚନା ହେଉଛି। ପୁଣି ମୁଖ୍ୟ କଥାଟି ହେଉଛି ଦୁର୍ଗା ହେଉଛି ଜୁଲୁ ଓ ମାଈ ସିମ୍ପାଞ୍ଜି ପମ୍ପେଟା ମିଳନରୁ ଜନ୍ମ ହୋଇଥିବା ଛୁଆ। ପମ୍ପେଟାର ୫ମ ଗର୍ଭରୁ ଦୁର୍ଗା ଜନ୍ମ ନେଇଛି। ୧୯୯୪ ଜୁନ୍ ୧୬ ତାରିଖରେ ସିଙ୍ଗାପୁରରୁ ଜୁଲୁ ଓ ପମ୍ପେଟାକୁ ନନ୍ଦନକାନନକୁ ଅଣାଯାଇଥିଲା। ସେତେବେଳେ ଜୁଲୁକୁ ୪ ବର୍ଷ ବୟସ ଓ ପମ୍ପେଟାକୁ ମାତ୍ର ୩ ବର୍ଷ ବୟସ ହୋଇଥିଲା। ଦୁହିଁଙ୍କ ମିଳନରୁ ନନ୍ଦନକାନନରେ ସିମ୍ପାଞ୍ଜି ବଂଶ ବଢ଼ିବଢ଼ି ଏବେ ୧୩ରେ ପହଞ୍ଚିଛି। ୨୦୧୭ ସେପ୍ଟେମ୍ବର ୨୩ରେ ଜୁଲୁ ଓ ପମ୍ପେଟାଙ୍କ ମିଳନରୁ ଜନ୍ମନେଇଥିଲା ଦୁର୍ଗା।
Sambad is now on WhatsApp
Join and get latest news updates delivered to you via WhatsApp
ଏବେ ତାକୁ ୬ ବର୍ଷ ବୟସ। କିନ୍ତୁ ଜୁଲୁ ଓ ଦୁର୍ଗା ପରସ୍ପରର ନିକଟତର ହୋଇଛନ୍ତି। ସିମ୍ପାଞ୍ଜିଙ୍କ ହାରାହାରି ବୟସ ୪୦ ହୋଇଥିବା ବେଳେ ଜୁଲୁକୁ ୩୩ ବର୍ଷ ବୟସ ହେଲାଣି। ତେଣୁ ସେ ଏକପ୍ରକାର ବାର୍ଦ୍ଧକ୍ୟରେ ଉପନୀତ। କିନ୍ତୁ ଏମିତି ଅବସ୍ଥାରେ ମାତ୍ର ୬ ବର୍ଷ ବୟସର ଝିଅ ଦୁର୍ଗା ସହ ତା’ର ମିଳନ ହୋଇଛି। ସୂଚନାଯୋଗ୍ୟ ଯେ ୬୦ ନମ୍ବର ଖୁଆଡ଼ରେ ଜୁଲୁ ହେଉଛି ସିମ୍ପାଞ୍ଜି ପରିବାରର ମୁଖିଆ ଏବଂ ତା’ ଔରସରୁ ଜନ୍ମ ନେଇଥିବା ପୂର୍ଣ୍ଣିମା, ରାକ୍ଷୀ, ଲକ୍ଷ୍ମୀଙ୍କ ସହିତ ଜୁଲୁର ମିଳନ ହୋଇସାରିଛି।