ବାଜିରାଉତ ଛାତ୍ରାବାସ ଦେଶର ଶ୍ରଦ୍ଧାର କେନ୍ଦ୍ର: ଧର୍ମେନ୍ଦ୍ର
ଅନୁଗୁଳ : ବାଜିରାଉତ ଛାତ୍ରାବାସ ହେଉଛି, ରାଷ୍ଟ୍ରର ଏକ ଶ୍ରଦ୍ଧାର କେନ୍ଦ୍ର। ବିଶେଷଭାବରେ ଆମ ଓଡ଼ିଆଙ୍କର ପାଇଁ ମୂଲ୍ୟବୋଧଯୁକ୍ତ ରାଜନୀତି ଓ ସମର୍ପିତ ରାଜନୀତିର ପ୍ରତ୍ୟକ୍ଷ ମନ୍ଦିର। କେନ୍ଦ୍ର ଶିକ୍ଷା, ଦକ୍ଷତା ବିକାଶ ଓ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଆଜି ବିଶିଷ୍ଟ ସ୍ୱାଧୀନତା ସଂଗ୍ରାମୀ ତଥା ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ନବକୃଷ୍ଣ ଚୌଧୁରୀ ଓ ନାରୀନେତ୍ରୀ ମାଳତୀ ଚୌଧୁରୀଙ୍କ ଦ୍ୱାରା ପ୍ରତିଷ୍ଠିତ ‘ବାଜି ରାଉତ ଛାତ୍ରାବାସ’ ପରିଦର୍ଶନରେ ଆସି ଏହିଭଳି ମତ ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ କହିଛନ୍ତି, ଦେଶର ମହାନ ସ୍ବାଧୀନତା ସଂଗ୍ରାମୀଙ୍କ ସହିତ ଜଡ଼ିତ ଏ ଅନୁଷ୍ଠାନ କେବଳ ଗୋଟିଏ ଛାତ୍ରାବାସ ନୁହେଁ, ଏ ଅଞ୍ଚଳର ନାରୀ ସଶକ୍ତୀକରଣ, ସମାଜବାଦ, ଚାଷୀ, ଭୂଦାନ ଆନ୍ଦୋଳନର ମଧ୍ୟ ପ୍ରତ୍ୟକ୍ଷଦର୍ଶୀ। ମାଳତୀ ଦେବୀ ଥିଲେ ନାରୀ ସଶକ୍ତୀକରଣର ଅନ୍ୟତମ ପ୍ରତୀକ। ଦେଶର ସ୍ୱାଧୀନତା ସଂଗ୍ରାମରେ ଶିକ୍ଷା ଓ ନାରୀ ଶକ୍ତିକୁ ଯଥେଷ୍ଟ ଗୁରୁତ୍ୱ ଦେବାସହ ସମାଜବାଦ, ଚାଷୀ ଓ ଭୂଦାନ ସହ ଅନେକ ଆନ୍ଦୋଳନରେ ସେ ସକ୍ରିୟ ଭୂମିକା ଗ୍ରହଣ କରିଥିଲେ। ଓଡ଼ିଶା ପାଇଁ ଏହି ମହାନ ସ୍ୱାଧୀନତା ସଂଗ୍ରାମୀଙ୍କ ଜୀବନବ୍ୟାପୀ ଅବଦାନ ଚିର ଆଦର୍ଶ। କିନ୍ତୁ, ସେମାନଙ୍କର କର୍ମଭୂମି ଯେତିକି ବିକଶିତ ହେବା କଥା, ସେତିକି ହୋଇନାହିଁ। ଏ ଆଶ୍ରମର ବିକାଶ ପାଇଁ ଆମେମାନେ ସମସ୍ତେ ଦାୟିତ୍ବ ନେବା ଉଚିତ୍ ବୋଲି ଶ୍ରୀ ପ୍ରଧାନ କହିଛନ୍ତି।
ଏହି ଅବସରରେ କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ ସଂଗ୍ରାମୀଙ୍କର ପୁଣ୍ୟ ସଂଗ୍ରାମୀ ସ୍ଥଳରେ ପୁଷ୍ପମାଲ୍ୟ ଅର୍ପଣ କରିବା ସହିତ ପୂରା ଆଶ୍ରମ ବୁଲି ଦେଖିଥିଲେ। ନୁମା-ମାଳତୀ କୁଟୀର ବି ବୁଲିଥିଲେ। କିଛିଦିନ ତଳେ ଆଶ୍ରମର ବିକାଶ ପାଇଁ ନିଜସ୍ବ ହାତପାଣ୍ଠିରୁ ୨୫ଲକ୍ଷ ଟଙ୍କାର ଅନୁଦାନ ଦେଇଥିବା ବେଳେ ଚଳିତ ଆର୍ଥିକ ବର୍ଷରେ ଆହୁରି ଅଧିକ ଅନୁଦାନ ବଢ଼ାଇବାକୁ ପ୍ରତିଶ୍ରୁତି ମଧ୍ୟ ଦେଇଥିଲେ।