ଜାତୀୟ ରାଜନୀତିରେ ବିଜେଡି
ଜାତୀୟ ରାଜନୀତିରେ ବିଜେଡିର ରଣନୀତିକୁ ରାଜନୀତି ବିଶେଷଜ୍ଞମାନେ ବୁଝିବାକୁ ସକ୍ଷମ ହୋଇନାହାନ୍ତି। ପ୍ରାଥମିକ ଅବସ୍ଥାରେ ବିଜେଡି ଏନ୍ଡିଏରେ ସାମିଲ ହୋଇ ଅଟଳ ବିହାରୀ ବାଜପେୟୀଙ୍କ ସରକାରରେ ମନ୍ତ୍ରୀ ପଦ ପାଇଥିଲା। କିନ୍ତୁ ୨୦୦୪ ପରେ ଆଉ କୌଣସି ସରକାରରେ ସାମିଲ ହୋଇ ନାହିଁ ବିଜେଡି। ଏପରିକି ଏନ୍ଡିଏରୁ ବାହାରି ଆସିଛି ଦଳ। ୨୦୦୪ ପରେ ୟୁପିଏ ଦୁଇ ଥର ଶାସନ କରିଥିଲା ବେଳେ ଏନ୍ଡିଏର ଦ୍ବିତୀୟ ପାଳି ଚାଲିଛି। କିନ୍ତୁ ଉଭୟ ୟୁପିଏ ଓ ଏନ୍ଡିଏ ଠାରୁ ସମଦୂରତା ଅବଲମ୍ବନ କରିଛି ବିଜେଡି। ଏନ୍ଡିଏ ପ୍ରତି ଦଳର ମନୋଭାବ ଅପେକ୍ଷାକୃତ ସକରାତ୍ମକ ଥିବା କୁହାଯାଉଥିଲେ ବି ଏନ୍ଡିଏରେ ବିଜେଡି ସାମିଲ ହୋଇ ନାହିଁ। କିନ୍ତୁ ଉଭୟ କଂଗ୍ରେସ ଓ ବିଜେପିର ସର୍ବୋଚ୍ଚ ନେତାଙ୍କ ସହ ବିଜେଡି ସଭାପତି ନବୀନ ପଟ୍ଟନାୟକଙ୍କ ସୁସମ୍ପର୍କ ସବୁବେଳେ ରାଜ୍ୟ ତଥା ଜାତୀୟ ରାଜନୀତିରେ ଚର୍ଚ୍ଚାରେ ରହିଛି।
Sambad is now on WhatsApp
Join and get latest news updates delivered to you via WhatsApp
ସଂସଦରେ ବିଭିନ୍ନ ଗୁରୁତ୍ବପୂର୍ଣ୍ଣ ବିଲ୍କୁ ପାରିତ କରାଇବାରେ ବିଜେଡି ସବୁବେଳେ ଏନ୍ଡିଏ ସରକାରକୁ ସହଯୋଗର ହାତ ବଢ଼ାଇଛି। ଏଥି ପାଇଁ ଦଳ ସମାଲୋଚନାର ଶୀକାର ବି ହୋଇଛି। ଲଗାତର ଭାବେ ରାଷ୍ଟ୍ରପତି ନିର୍ବାଚନରେ ଏନ୍ଡିଏ ପ୍ରାର୍ଥୀଙ୍କୁ ଦଳ ସମର୍ଥନ କରିଆସୁଛି। କିନ୍ତୁ କିଛି ପ୍ରସଙ୍ଗରେ କେନ୍ଦ୍ର ବିରୋଧରେ କଠୋର ଆଭିମୁଖ୍ୟ ଗ୍ରହଣ କରି ସମାଲୋଚକଙ୍କୁ ଦ୍ବନ୍ଦ୍ବରେ ପକାଇ ଦେଇଛନ୍ତି ବିଜେଡି ସଭାପତି। ତେବେ ବିଭିନ୍ନ ପ୍ରସଙ୍ଗରେ ଦଳର ରଣନୀତି ବିଜେଡିକୁ ଜାତୀୟ ରାଜନୀତିରେ ଚର୍ଚ୍ଚାରେ ରଖିବାକୁ ସକ୍ଷମ ହୋଇଛି। କେନ୍ଦ୍ରରେ ଉଭୟ ଶାସକ ଓ ବିରୋଧୀ ଦଳ ସବୁ ଗୁରୁତ୍ବପୂର୍ଣ୍ଣ ପ୍ରସଙ୍ଗରେ ବିଜେଡିର ଆଭିମୁଖ୍ୟ ଉପରେ ନଜର ରଖୁଛନ୍ତି।