୪୩୫୦ କୋଟି ଟଙ୍କାରେ ରୁଚି ସୋୟାକୁ କିଣିଲା ପତଞ୍ଜଳି, ବାବା ରାମଦେବ ହେଲେ ନିର୍ଦ୍ଦେଶକ
ନୂଆଦିଲ୍ଲୀ: ଯୋଗ ଗୁରୁ ବାବା ରାମଦେବଙ୍କ କମ୍ପାନୀ ପତଞ୍ଜଳି ଆୟୁର୍ବେଦ ଖାଦ୍ୟ ଉପଯୋଗୀ ତେଲ ଓ ସୋୟାବିନ ପ୍ରସ୍ତୁତ କରୁଥିବା କମ୍ପାନୀ ରୁଚି ସୋୟାକୁ କିଣିଛି | ପତଞ୍ଜଳି ଆୟୁର୍ବେଦ ୪୩୫୦ କୋଟି ଟଙ୍କାରେ ରୁଚି ସୋୟାକୁ କିଣିଥିବା ବେଳେ ପତଞ୍ଜଳି ଆୟୁର୍ବେଦ ଦ୍ୱାରା ଏହା ପ୍ରଥମ ବଡ଼ ଅଧିଗ୍ରହଣ ବୋଲି କୁହାଯାଉଛି | ରୁଚି ସୋୟାକୁ ପତଞ୍ଜଳି ଅଧିଗ୍ରହଣ କରିବା ପରେ ଆଚାର୍ଯ୍ୟ ବାଳକୃଷ୍ଣ ନୂତନ କମ୍ପାନୀର ଅଧ୍ୟକ୍ଷ ହୋଇଥିବାବେଳେ ବାବା ରାମଦେବ ନବଗଠିତ ପରିଚାଳନା ବୋର୍ଡର ନିର୍ଦ୍ଦେଶକ ହୋଇଛନ୍ତି | ବର୍ତ୍ତମାନ ରୁଚି ସୋୟାର ଦେଶରେ ୨୦ଟି ପ୍ଲାଣ୍ଟ ଥିବା ବେଳେ ୧୧.୫୦ ଲକ୍ଷ ରିଟେଲ ଆଉଟଲେଟ ମାଧ୍ୟମରେ କମ୍ପାନୀ ସାମଗ୍ରୀ ବିକ୍ରି କରୁଛି |
Sambad is now on WhatsApp
Join and get latest news updates delivered to you via WhatsApp
ଏହି ଚୁକ୍ତିନାମା ସଂପନ୍ନ ହେବା ପରେ ୧୪ ପ୍ରତିଶତ ବଜାର ଅଂଶଧନ ସହ ପତଞ୍ଜଳି ଦେଶର ଦ୍ଵିତୀୟ ବୃହତମ ଖାଇବା ତେଲ ପ୍ରସ୍ତୁତ କରୁଥିବା କମ୍ପାନୀ ହୋଇପାରିଛି | ବର୍ତ୍ତମାନ ୧୯ ପ୍ରତିଶତ ବଜାର ଅଂଶଧନ ସହ ଅଦାନୀ ୱେଲମର ପ୍ରଥମ ସ୍ଥାନରେ ରହିଛି | ଏଠାରେ ସୂଚନା ଥାଉ କି ରୁଚି ସୋୟା ଉପରେ ବିଭିନ୍ନ ବ୍ୟାଙ୍କର ୯୩୪୫ କୋଟି ଟଙ୍କାର ଋଣ ରହିଛି |
ଷ୍ଟାଣ୍ଡାର୍ଡ ଚାଟାର୍ଡ ବ୍ୟାଙ୍କ ଓ ଡ଼ିବିଏସ ବ୍ୟାଙ୍କର ଅଭିଯୋଗ ଆଧାରରେ ରୁଚି ସୋୟା ଋଣ ଖିଲାପ ମାମଲା ରାଷ୍ଟ୍ରୀୟ କମ୍ପାନୀ ଆଇନ ନ୍ୟାୟାଧିକରଣ(ଏନସିଏଲଟି) ପାଖକୁ ପଠାଯାଇଥିଲା। ଏହା ପରେ ୨୦୧୭ ମସିହାରେ ଏନସିଏଲଟି ରୁଚିସୋୟାକୁ ଦେବାଳିଆ ଘୋଷଣା କରିବା ସହ ଏହାର ନିଲାମୀ ଆଦେଶ ଦେଇଥିଲେ | ୨୦୧୯ ମସିହାରେ ପତଞ୍ଜଳି ରୁଚି ସୋୟାକୁ ଅଧିଗ୍ରହଣ କରିବାକୁ ମଞ୍ଜୁରୀ ହାସଲ କରିଥିଲା |