ଆଜି ବିଦାୟ ନେଉଛନ୍ତି ମା ମହାଲକ୍ଷ୍ମୀ
ଢେଙ୍କାନାଳ: କୁମାରପୁର୍ଣ୍ଣିମାଠାରୁ ଆରମ୍ଭ ହୋଇ ୧୦ ଦିନ ବ୍ୟାପି ଚାଲିଥିବା ଢେଙ୍କାନାଳ ପ୍ରସିଦ୍ଧ ଗଜଲକ୍ଷ୍ମୀ ପୂଜାର ଭସାଣି ଉତ୍ସବ ଆଜି ଅନୁଷ୍ଠିତ ହେଉଛି l ଧନଦାତ୍ରୀ ମା ମହାଲକ୍ଷ୍ମୀ ଆଜି ଧରା ପୃଷ୍ଠାରୁ ବିଦାୟ ନେଉଛନ୍ତି | ବିଭିନ୍ନ ପ୍ରକାରର ବ୍ୟାଣ୍ଡପାର୍ଟି, ଡିଜେ ସାଉଣ୍ଡ, ପାରମ୍ପରିକ ଲୋକନୃତ୍ୟ, ଘଣ୍ଟ ଘଣ୍ଟା ବାଦ୍ୟରେ ତାଳେ ତାଳେ ମା ଙ୍କୁ ବିଦାୟ ଦେଉଛନ୍ତି ସହରବାସୀ | ବାଜା ଘଣ୍ଟା ଘଣ୍ଟ, ଡିଜେରେ ଢେଙ୍କାନାଳ ସହର ଦୁଲୁକୁଛି l ପୂର୍ବାହ୍ନ ୯ ଘଟିକାରେ ମିଳିତ ବଜାର ପୂଜା କମିଟିର ୧ ନମ୍ବର ମାନ୍ୟତାପ୍ରାପ୍ତ ମୀନାବଜାର ପୂଜା ପ୍ରତିଷ୍ଠାନରେ ନଡ଼ିଆ ଭାଙ୍ଗି ଭସାଣି ଶୋଭାଯାତ୍ରାର ଶୁଭାରମ୍ଭ କରିଥିଲେ ଜିଲ୍ଲାପାଳ ସରୋଜ କୁମାର ସେଠି |
Sambad is now on WhatsApp
Join and get latest news updates delivered to you via WhatsApp
ଅନ୍ୟମାନଙ୍କ ମଧ୍ୟରେ ଏସପି ଲଗାନୟାଗୀ ଦିବ୍ୟା ଭି, ମିଳିତ ବଜାର ପୂଜା କମିଟିର ସଭାପତି ଗୋପାଳ ଚନ୍ଦ୍ର ପାତ୍ରଙ୍କ ସମେତ ବରିଷ୍ଠ ଅଧିକାରୀ ଓ ବିଭିନ୍ନ ପୂଜା ପ୍ରତିଷ୍ଠାନର କର୍ମକର୍ତ୍ତାମାନେ ଉପସ୍ଥିତ ରହିଥିଲେ | ଚଳିତ ବର୍ଷ ସହରରେ ୩୮ ଗୋଟି ପୂଜା ମଣ୍ଡପରେ ମା’ ଲକ୍ଷ୍ମୀ ପୂଜା ପାଇଥିବାବେଳେ ୨୫ରୁ ଉର୍ଦ୍ଧ ପୂଜା ମଣ୍ଡପ ଭସାଣି ଶୋଭାଯାତ୍ରାରେ ସାମିଲ ହୋଇଛନ୍ତି | ରାତି ୧୧ ଟା ୩୦ ସୁଦ୍ଧା ଭସାଣି ଉତ୍ସବ ସମାପନ ପାଇଁ ପ୍ରଶାସନିକ ସ୍ତରରେ ନିଷ୍ପତି ହୋଇଛି l ଶାନ୍ତି ଶୃଙ୍ଖଳା ରକ୍ଷା ପାଇଁ ୨୪ ପ୍ଲାଟୁନ ପୁଲିସ ଫୋର୍ସ ମୁତୟନ କରାଯାଇଛି।