ହୀରାକୁଦର ୨୦ ଗେଟ୍ ଖୋଲିଲା, ଛାଡୁଛି ୩ ଲକ୍ଷ କ୍ୟୁସେକ୍ ପାଣି
ସମ୍ବଲପୁର : ଉପରମୁଣ୍ଡରେ ପ୍ରବଳ ବର୍ଷାଫଳରେ ହୀରାକୁଦ ଜଳଭଣ୍ଡାରକୁ ଜଳ ପ୍ରବେଶ ବୃଦ୍ଧି ପାଇଚାଲିଛି । ଏହା ଫଳରେ ସୋମବାର ୩ଟି ପର୍ଯ୍ୟାୟରେ ଆଉ ୮ଟି ଗେଟ୍ ଖୋଲା ଯାଇଛି। ଫଳରେ ମୋଟ ୨୦ଟି ଗେଟ୍ ଦେଇ ମହାନଦୀକୁ ୩ ଲକ୍ଷ କ୍ୟୁସେକ୍ରୁ ଅଧିକ ଜଳ ନିଷ୍କାସିତ ହେଉଛି। ଗତ ୧୫ ଓ ୧୬ ତାରିଖ ଦିନ ହୀରାକୁଦର ଉପର ମୁଣ୍ଡରେ ପ୍ରବଳ ବର୍ଷା ହୋଇଥିଲା। ଫଳରେ ଜଳ ପ୍ରବେଶ ବୃଦ୍ଧି ପାଇଛି। ରବିବାର ୧୨ଟି ଗେଟ୍ ଖୋଲାଥିବାବେଳେ ସୋମବାର ଦିନ ୧୨ଟାରୁ ୧ଟା ମଧ୍ୟରେ ୩ଟି, ୨ଟାରୁ ୩ଟା ମଧ୍ୟରେ ୩ଟି ଓ ରାତି ୯ଟା ବେଳେ ଆଉ ୨ଟି ଗେଟ୍ ଖୋଲା ଯାଇଛି ।
Sambad is now on WhatsApp
Join and get latest news updates delivered to you via WhatsApp
ସୋମବାର ରାତି ୯ଟା ସୁଦ୍ଧା ହୀରାକୁଦ ଜଳସ୍ତର ୬୧୬.୦୮ ଫୁଟ୍ରେ ପହଞ୍ଚିଛି। ସେହି ସମୟରେ ଜଳଭଣ୍ଡାର ମଧ୍ୟକୁ ହାରାହାରି ୩ ଲକ୍ଷ ୩୩ ହଜାର ୪୩୧ କ୍ୟୁସେକ୍ ପାଣି ପ୍ରବେଶ କରୁଥିଲାବେଳେ ବିଭିନ୍ନ ମାର୍ଗ ଦେଇ ୩ ଲକ୍ଷ ୨୩ ହଜାର ୮୯୬ କ୍ୟୁସେକ୍ ଜଳ ନିଷ୍କାସିତ ହେଉଥିଲା। ସେଥିରୁ ବାମ ସ୍ପିଲ୍ୱେର ୧୩ ଓ ଡାହାଣ ସ୍ପିଲ୍ୱେର ୭କୁ ମିଶାଇ ମୋଟ ୨୦ ସ୍ଲୁଇସ୍ ଗେଟ୍ ଦେଇ ୩ ଲକ୍ଷ ୬ ହଜାର ୯୨୦ କ୍ୟୁସେକ୍ ଜଳ ମହାନଦୀକୁ ନିଷ୍କାସିତ ହେଉଥିଲା। ଏହାଛଡ଼ା ପାୱାର୍ ଚାନେଲରେ ୧୫,୧୫୭ କ୍ୟୁସେକ୍, ବରଗଡ଼ କେନାଲ୍ରେ ୧୫୦୦ କ୍ୟୁସେକ୍, ଶାସନ କେନାଲ୍ରେ ୧୦୦ କ୍ୟୁସେକ୍, ସମ୍ବଲପୁର ଡିଷ୍ଟ୍ରିବ୍ୟୁଟାରିରେ ୪୯ କ୍ୟୁସେକ୍ ଓ ଶିଳ୍ପ ସଂସ୍ଥା ପାର୍ଇ ୧୭୦ କ୍ୟୁସେକ୍ ପାଣି ଛଡ଼ା ଯାଉଥିଲା।
ସୋମବାର ରାତି ୯ଟା ବେଳକୁ ମହାନଦୀ ତଳମୁଣ୍ଡ ବେଲଗାଁଠାରେ ୨୦ ହଜାର ୫୦୦ କ୍ୟୁସେକ୍, ପଥର୍ଲାଠାରେ ୬୫ ହଜାର କ୍ୟୁସେକ୍, ଖଇରମାଳଠାରେ ୩ ଲକ୍ଷ ୮୫ ହଜାର କ୍ୟୁସେକ୍, ବରମୂଳଠାରେ ୪ ଲକ୍ଷ ୫୦ ହଜାର କ୍ୟୁସେକ୍, ମୁଣ୍ଡଳିଠାରେ ୪ ଲକ୍ଷ ୩୧ ହଜାର ୪୦୦ କ୍ୟୁସେକ୍ ପାଣି ପ୍ରବାହିତ ହେଉଥିଲା। ସୋମବାର ବୁର୍ଲା ଜଳବିଦ୍ୟୁତ୍ କେନ୍ଦ୍ରରୁ ହାରାହାରି ୯୮.୩୩୩ ମେଗାୱାଟ୍ ଓ ଚିପିଲିମା ଜଳ ବିଦ୍ୟୁତ୍ କେନ୍ଦ୍ରରୁ ୫୧.୨୦୮ ମେଗାୱାଟ୍ ବିଦ୍ୟୁତ୍ ଉତ୍ପାଦିତ ହୋଇଛି। ଗତ ୨୪ ଘଣ୍ଟା ମଧ୍ୟରେ ହୀରାକୁଦ ଉପର ମୁଣ୍ଡରେ ୨୫.୩୫ ମିଲିମିଟର୍ ତଳ ମୁଣ୍ଡରେ ୮.୦୮ ମିଲିମିଟର୍ ବର୍ଷା ହୋଇଥିବା ହୀରାକୁଦ ବନ୍ଧ ନିୟନ୍ତ୍ରଣ କକ୍ଷ ସୂତ୍ରରୁ ପ୍ରକାଶ।