ଯବାନଙ୍କ ପାଇଁ ଖୁସି ଖବର: ସାମରିକ ତାଲିମ ସମୟରେ ଗୁରୁତର ଆହତ ହେଲେ କ୍ୟାଡେଟ ପାଇବେ ପୁନଃଥଇଥାନ ସୁବିଧା, ପ୍ରସ୍ତାବକୁ ପ୍ରତିରକ୍ଷା ମନ୍ତ୍ରଣାଳୟର ଅନୁମୋଦନ
ନୂଆଦିଲ୍ଲୀ:ସାମରିକ ତାଲିମ ସମୟରେ ଆଘାତ କାରଣରୁ ମେଡିକାଲ ଆଧାରରେ ବାହାର କରାଯାଉଥିବା କ୍ୟାଡେଟମାନଙ୍କୁ ଏବେ ପୁନଃଥଇଥାନ ସୁବିଧା ଯୋଗାଇ ଦିଆଯିବ। ପ୍ରତିରକ୍ଷା ମନ୍ତ୍ରଣାଳୟ ଏକ ବିବୃତ୍ତି ଜାରି କରି କହିଛି ଯେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଏହି ପ୍ରସ୍ତାବକୁ ଅନୁମୋଦନ କରିଛନ୍ତି। ତଥାପି, ଏଥିରେ ଅକ୍ଷମତା ପେନସନ କିମ୍ବା ଇସିଏଚଏସ ସୁବିଧା ଅନ୍ତର୍ଭୁକ୍ତ ନାହିଁ। ଏଥିରେ କିଛି ନାହିଁ ଯାହା ସେବା ମୁଖ୍ୟାଳୟ ସେନା, ନୌସେନା, ବାୟୁସେନା ସେମାନଙ୍କ ପ୍ରସ୍ତାବରେ ପଠାଇଥିଲେ।
Sambad is now on WhatsApp
Join and get latest news updates delivered to you via WhatsApp
ପ୍ରତିରକ୍ଷା ମନ୍ତ୍ରଣାଳୟର କହିବାନୁସାରେ, ଏଭଳି କ୍ୟାଡେଟମାନଙ୍କ ପାଇଁ ସୁଯୋଗ ବଢ଼ାଇବା ପାଇଁ, ପୁନର୍ବାସ ମହାନିର୍ଦ୍ଦେଶାଳୟ ଦ୍ୱାରା ପରିଚାଳିତ ଯୋଜନାଗୁଡ଼ିକର ଲାଭ ବୃଦ୍ଧି ପାଇଁ ଅନୁମତି ଦିଆଯାଇଛି। ଏହି ଯୋଜନା ଦ୍ବାରା ମେଡିକାଲ ଆଧାରରେ ବହିଷ୍କୃତ ୫୦୦କ୍ୟାଡେଟ ଉପକୃତ ହୋଇପାରିବେ। ସମାନ ପରିସ୍ଥିତିରେ ଭବିଷ୍ୟତର କ୍ୟାଡେଟମାନଙ୍କୁ ମଧ୍ୟ ସମାନ ସୁବିଧା ପାଇବେ ।
ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ କ୍ୟାଡେଟମାନଙ୍କୁ ତୈଳ ଉତ୍ପାଦ ଏଜେନ୍ସିରେ ଆବଣ୍ଟନ ପାଇଁ ୮% କୋଟା ପାଇବାକୁ ଯୋଗ୍ୟ ପ୍ରମାଣପତ୍ର ପ୍ରଦାନ କରାଯିବ। ସେମାନଙ୍କୁ ମଦର ଡାଏରୀ ମିଲ୍କ ବୁଥ, ସଫଲ ଫଳ ଏବଂ ପନିପରିବା ଦୋକାନ ବଣ୍ଟନ କରାଯିବ । ସିଏନଜି ଷ୍ଟେସନର ପରିଚାଳନା, ଏଲପିଜି ବଣ୍ଟନ ଏବଂ ଏନସିଆରରେ ପେଟ୍ରୋଲ ଏବଂ ଡିଜେଲ ଖୁଚୁରା ଆଉଟଲେଟ୍ ବଣ୍ଟନ ପାଇଁ ଯୋଗ୍ୟତା ପ୍ରମାଣପତ୍ର ଦିଆଯିବ। ସୁରକ୍ଷା ଏଜେନ୍ସି ସ୍କିମ୍ ଏବଂ ବୈଷୟିକ ସେବା ଯୋଜନାରେ ଅନ୍ତର୍ଭୂକ୍ତ କରାଯିବ । ଏହି ସମସ୍ତ ସମ୍ପ୍ରତି ଅକ୍ଷମ ପୂର୍ବତନ ସୈନିକ ଏବଂ ସେମାନଙ୍କ ବିଧବାମାନଙ୍କ ପାଇଁ ପ୍ରଯୁଜ୍ୟ ହେବ। ପ୍ରତିରକ୍ଷା ମନ୍ତ୍ରଣାଳୟକୁ ପଠାଯାଇଥିବା ପ୍ରସ୍ତାବରେ ଅକ୍ଷମତା ପେନସନ୍ ଦେବାକୁ କୁହାଯାଇଥିଲା। ୨୦୧୫ ରେ ପ୍ରତିରକ୍ଷା ମନ୍ତ୍ରୀ ଏହି ପ୍ରସଙ୍ଗରେ ଏକ ବିଶେଷଜ୍ଞ କମିଟି ଗଠନ କରିଥିଲେ, ତଥାପି କମିଟି ଭିନ୍ନକ୍ଷମ କ୍ୟାଡେଟମାନଙ୍କୁ ଅକ୍ଷମତା ପେନସନ ଏବଂ ଆର୍ଥିକ ସହାୟତା ପାଇଁ ସୁପାରିଶ କରିଥିଲେ। କିନ୍ତୁ ଏହାକୁ ଗ୍ରହଣ କରାଯାଇ ନ ଥିଲା। ସେବା ମୁଖ୍ୟାଳୟ ପୁନର୍ବାର ଏହି ପ୍ରସ୍ତାବ ପଠାଇଥିଲେ। ଯେଉଁଥିରେ କୁହାଯାଇଥିଲା ଯେ ଯଦି ଜଣେ କ୍ୟାଡେଟ୍ ଅକ୍ଷମ ହୋଇଯାଆନ୍ତି କିମ୍ବା ତାଙ୍କର ମୃତ୍ୟୁ ଘଟିଥାଏ, ତେବେ ଆର୍ଥିକ ସହାୟତା (ଏକ୍ସ ଗ୍ରାସିଆ) ପ୍ରଦାନ କରାଯିବା ଉଚିତ୍। ଏଥିପାଇଁ ତାଙ୍କୁ ଲେଫ୍ଟନାଣ୍ଟଙ୍କ ଦରମା ଅନୁଯାୟୀ ପେନସନ ଦିଆଯାଇପାରେ ।
ବର୍ତ୍ତମାନ ଭାରତୀୟ ସେନାରେ ଲେଫ୍ଟନାଣ୍ଟଙ୍କ ଦରମା ୫୬,୫୧୦ ଟଙ୍କା। ପେନସନ ଏହାର ଅଧା ଅଟେ। କ୍ୟାଡେଟ୍ସମାନେ କେବଳ ଲେଫ୍ଟନାଣ୍ଟ ଭାବରେ ସେନାରେ ନିଯୁକ୍ତ ହୁଅନ୍ତି। ପ୍ରସ୍ତାବରେ ଏହା ମଧ୍ୟ କୁହାଯାଇଛି ଯେ ପୂର୍ବତନ ସୈନିକଙ୍କ ପରି ଭିନ୍ନକ୍ଷମ କ୍ୟାଡେଟମାନଙ୍କୁ ସ୍ୱାସ୍ଥ୍ୟ ଯୋଜନା ଇସିଏଚଏସରେ ଅନ୍ତର୍ଭୁକ୍ତ କରାଯିବା ଉଚିତ। ସରକାର ୪ ଅଗଷ୍ଟ, ୨୦୨୧ରେ ସଂସଦକୁ କହିଥିଲେ ଯେ ମନ୍ତ୍ରଣାଳୟରେ ଭିନ୍ନକ୍ଷମ ପେନସନ ପ୍ରଦାନ ପ୍ରସ୍ତାବ ଉପରେ ବିଚାର ଚାଲିଛି। ତେବେ ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ଶନିବାର ଘୋଷଣା କରାଯାଇଥିବା ପୁନଃଥଇଥାନ ସୁବିଧାରେ ଏହିପରି କିଛି ଅନ୍ତର୍ଭୂକ୍ତ କରାଯାଇ ନାହିଁ।