ଭାରତକୁ ଖୁସି କରିବାକୁ ମାଲେସିଆର ଉଦ୍ୟମ, ଭାରତରୁୁ ଚିନି ଆମଦାନି ତିନିଗୁଣ ବଢାଇଲା
ନୂଆଦିଲ୍ଲୀ : ଭାରତ ସହ କୂଟନୈତିକ ତିକ୍ତତାକୁ ହ୍ରାସ କରିବାକୁ ମାଲେସିଆ ସରକାର ଉଦ୍ୟମ ଆରମ୍ଭ କରିଛନ୍ତି । ଭାରତ ସହ ବାଣିଜ୍ୟ କାରବାର ବୃଦ୍ଧି କରିବାକୁ ମାଲେସିଆ ଏବେ ଭାରତଠାରୁ ଅଧିକ ପରିମାଣରେ ଚିନି କିଣୁଛି । ଗତ ୨୦୧୯ରେ ମାଲେସିଆ ଭାରତଠାରୁ ଯେତିକି ଚିନି କିଣିଥିଲା ଚଳିତ ୨୦୨୦ ମାତ୍ର ଅଢେଇ ମାସ ମଧ୍ୟରେ ତାହା ତିନିଗୁଣ ବୃଦ୍ଧି ପାଇଛି । ୨୦୧୯ରେ ମାଲେସିଆ ଭାରତକୁ ୧୧୦,୦୦୦ ଟନ ଚିନି ଆମଦାନି କରିଥିବାବେଳେ ଚଳିତ ବର୍ଷ ତାହା ରେକର୍ଡ ୩୨୪,୪୦୫ ଟନକୁ ବୃଦ୍ଧି ପାଇଛି ।
Sambad is now on WhatsApp
Join and get latest news updates delivered to you via WhatsApp
ଗତ ଜାନୁଆରି ମାସରେ ମାଲେସିଆର ରାଷ୍ଟ୍ରାୟତ୍ତ ପାମ ଅଏଲ (ତାଳତେଲ) ବିଶୋଧନକାରୀ କମ୍ପାନି ଏଫଜିବି ହୋଲଡିଂର ଶାଖା କମ୍ପାନି ତଥା ମାଲେସିଆର ବୃହତ୍ତମ ଚିନି ବିଶୋଧନକାରୀ କମ୍ପାନି ଏମଏସଏମ ମାଲେସିଆ ହୋଲଡିଂ ବେରହାଡ ଭାରତରୁ ପ୍ରାୟ ୧ ଲକ୍ଷ ୩୦ ହଜାର ଟନ ଚିନି କିଣିବାକୁ ପ୍ରସ୍ତାବ ଦେଇଥିଲା । ଏହାର ମୂଲ୍ୟ ପ୍ରାୟ ୪୯.୨୦ ନିୟୁତ ଡଲାର ହେବ ।
ମାଲେସିଆର ପୂର୍ବତନ ପ୍ରଧାନମନ୍ତ୍ରୀ ମହାଥୀର ମହମ୍ମଦଙ୍କ ଭାରତ ବିରୋଧୀ ବୟାନ ଯୋଗୁଁ ଦୁଇଦେଶ ମଧ୍ୟରେ ସଂପର୍କ ଖରାପ ହୋଇଥିଲା ଓ ଭାରତ ଖାଇବା ତେଲ ଆମଦାନୀ କମାଇଥିଲା । ଭାରତ ମାଲେସିଆର ବୃହତ୍ତମ ଖାଇବା ତେଲ ଗ୍ରାହକ ହୋଇଥିବାରୁ ଭାରତର ଏହି ପଦକ୍ଷେପ ଦ୍ୱାରା ମାଲେସିଆର ଅର୍ଥନୀତି ଗୁରୁତରଭାବେ ପ୍ରଭାବିତ ହେଉଛି । କିନ୍ତୁ ଏହାର ଫାଇଦା ପଡ଼ୋଶୀ ଇଣ୍ଡୋନେସିଆ ନେଉଛି ।