କେନ୍ଦ୍ର ସରକାରଙ୍କୁ ରାହୁଲ ଗାନ୍ଧୀଙ୍କ ପ୍ରଶ୍ନ- ଗ୍ୟାସ, ଡିଜେଲ ପେଟ୍ରୋଲରୁ କମାଇଥିବା ୨୩ ଲକ୍ଷ କୋଟି ଟଙ୍କା କୁଆଡେ ଗଲା?
ନୂଆଦିଲ୍ଲୀ : ମୋଦୀ ସରକାରଙ୍କୁ ପୁଣି ଥରେ ଟାର୍ଗେଟ କରିଛନ୍ତି ବରିଷ୍ଠ କଂଗ୍ରେସ ନେତା ରାହୁଲ ଗାନ୍ଧୀ । ସେ କହିଛନ୍ତି, କେନ୍ଦ୍ର ସରକାର ତୈଳ ଓ ଗ୍ୟାସର ମୂଲ୍ୟ ବୃଦ୍ଧି କରି ସାଧାରଣ ଲୋକଙ୍କୁ ସିଧାସଳଖ ଲୁଟୁଛନ୍ତି । ଏସବୁ ସାମଗ୍ରୀର ଦରବୃଦ୍ଧି ଫଳରେ ପରିବହନ ମହଙ୍ଗା ହୋଇଛି ଓ ବଜାରରେ ଖାଦ୍ୟ ସାମଗ୍ରୀର ଦର ଅହେତୁକ ଭାବେ ବୃଦ୍ଧି ପାଇଛି ।
Sambad is now on WhatsApp
Join and get latest news updates delivered to you via WhatsApp
ନୂଆଦିଲ୍ଲୀସ୍ଥିତ କଂଗ୍ରେସର କେନ୍ଦ୍ରୀୟ ମୁଖ୍ୟାଳୟରେ ଏକ ସାମ୍ବାଦିକ ସମ୍ମିଳନୀ କରି ରାହୁଲ ଗାନ୍ଧୀ କହିଛନ୍ତି ଯେ ଦେଶରେ ଏବେ ଜିଡିପିର ଅର୍ଥ ଗ୍ୟାସ, ଡିଜେଲ ଓ ପେଟ୍ରୋଲ ବୋଲି ଜନସାଧାରଣ ଧରି ନେଇଛନ୍ତି । କେନ୍ଦ୍ର ସରକାର ତୈଳ ଓ ଗ୍ୟାସ ଦର ବଢାଇ ୨୩ ଲକ୍ଷ କୋଟି ଟଙ୍କା ରୋଜଗାର କରିଥିବା ବେଳେ ସେ ଟଙ୍କା କୁଆଡେ ଗଲା ବୋଲି ସେ କେନ୍ଦ୍ର ସରକାରଙ୍କୁ ପ୍ରଶ୍ନ କରିଛନ୍ତି।
ଅନ୍ୟପଟେ ସେ କେନ୍ଦ୍ରକୁ ଟାର୍ଗେଟ କରି କହିଛନ୍ତି କି ମୁଦ୍ରିକରଣ ଓ ବିମୁଦ୍ରିକରଣ ଏକ ସାଙ୍ଗରେ ହୋଇଛି । ନରେନ୍ଦ୍ର ମୋଦୀଙ୍କ ୪/୫ ଜଣ ବନ୍ଧୁଙ୍କ ମୁଦ୍ରିକରଣ ହେଉଛି ଓ ଜନତାଙ୍କ ପାଇଁ ବିମୁଦ୍ରିକରଣ । ପ୍ରଧାନମନ୍ତ୍ରୀ ପ୍ରଥମେ କହିଥିଲେ କି ବିମୁଦ୍ରିକରଣ ଓ ଏବେ ଅର୍ଥମନ୍ତ୍ରୀ କହୁଛନ୍ତି କି ମୁଦ୍ରିକରଣ କରୁଛୁ ।
ବଢୁଥିବା ବଜାର ଦରକୁ ନେଇ ରାହୁଲ ଗାନ୍ଧୀ କହିଛନ୍ତି ଯେ ୨୦୧୪ ରେ ଯେବେ ୟୁପିଏ ସରକାର ଥିଲା ଗ୍ୟାସର ଦାମ ୪୧୦ ଟଙ୍କା ଥିଲା । ମାତ୍ର ୭ ବର୍ଷରେ ମୋଦୀ ସରକାର ଏହାକୁ ୮୮୫ ରେ ପହଞ୍ଚାଇ ସାରିଲେଣି, ଅର୍ଥାତ ୭ ବର୍ଷ ମଧ୍ୟରେ ଗ୍ୟାସର ଦାମ ୧୧୬ ପ୍ରତିଶତ ବୃଦ୍ଧି ପାଇଛି । ଅନ୍ୟପଟେ ୨୦୧୪ ରୁ ୨୦୨୧ ମଧ୍ୟରେ ପେଟ୍ରୋଲ ୪୨ ପ୍ରତିଶତ ଓ ଡିଜେଲ ୫୫ ପ୍ରତିଶତ ମୂଲ୍ୟ ବୃଦ୍ଧି ହୋଇଛି । ହେଲେ ସେହି ତୁଳନାରେ ଜନତାଙ୍କ ଆୟ କାହିଁକି ବୃଦ୍ଧି ହୋଇନାହିଁ ବୋଲି ସେ ମୋଦୀ ସରକାରଙ୍କୁ ପ୍ରଶ୍ନ କରିଛନ୍ତି ।