କେନ୍ଦ୍ରମନ୍ତ୍ରୀ ନିଶିଥ ପ୍ରାମାଣିକଙ୍କ ନାଁରେ ରହିଛି ୧୪ଟି ଅପରାଧିକ ମାମଲା: ସତ୍ୟପାଠ
ନୂଆଦିଲ୍ଲୀ: ଆସନ୍ତା ଲୋକସଭା ନିର୍ବାଚନ ପାଇଁ କୁଚବିହାର ଆସନରୁ ବିଜେପି ଦ୍ୱାରା ପୁନର୍ବାର ପ୍ରାର୍ଥୀ ହୋଇଥିବା କେନ୍ଦ୍ରମନ୍ତ୍ରୀ ନିଶିଥ ପ୍ରାମାଣିକଙ୍କ ନାମରେ ୧୪ଟି ଅପରାଧିକ ମାମଲା ରହିଛି ବୋଲି ତାଙ୍କ ନାମାଙ୍କନ ପତ୍ର ସହ ସେ ଦାଖଲ କରିଥିବା ସତ୍ୟପାଠରୁ ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ଥିବା ନିଶିଥ ପ୍ରାମାଣିକଙ୍କ ବିରୋଧରେ ବିଚାରାଧୀନ ଥିବା ୧୪ଟି ମାମଲା ମଧ୍ୟରୁ ୨୦୧୮ରୁ ୨୦୨୦ ମଧ୍ୟରେ ୯ଟି ମାମଲା ରୁଜୁ ହୋଇଛି। ସତ୍ୟପାଠ ଅନୁଯାୟୀ, ୨୦୦୯ରୁ ୨୦୧୪ ମଧ୍ୟରେ ଅନ୍ୟ ମାମଲାଗୁଡ଼ିକ ରୁଜୁ ହୋଇଥିଲା। ୨୦୧୮ରେ କୁଚବିହାର ଜିଲ୍ଲାରେ ଦଳର ମନୋନୀତ ପ୍ରାର୍ଥୀଙ୍କ ବିରୋଧରେ ରାଜ୍ୟରେ ପଞ୍ଚାୟତ ନିର୍ବାଚନରେ ଅନେକ ସ୍ୱାଧୀନ ପ୍ରାର୍ଥୀଙ୍କୁ ପ୍ରାର୍ଥୀ କରିଥିବା ଅଭିଯୋଗରେ ତୃଣମୂଳ କଂଗ୍ରେସ (ଟିଏମ୍ସି)ରୁ ବହିଷ୍କୃତ ହେବା ପରେ ସେ ୨୦୧୯ରେ ବିଜେପିରେ ଯୋଗ ଦେଇଥିଲେ।
ଏହି ଅପରାଧିକ ମାମଲା ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି ଦାବି କରି ବିଜେପିର ଜଣେ ଜିଲ୍ଲା କର୍ମକର୍ତ୍ତା କହିଛନ୍ତି ଯେ ପଶ୍ଚିମବଙ୍ଗରେ ଶାସକ ଟିଏମସି ସହ ସମ୍ପର୍କ ଛିନ୍ନ କରି ବିଜେପିରେ ଯୋଗ ଦେବା ପରେ ପ୍ରାମାଣିକଙ୍କ ବିରୋଧରେ ଅଧିକାଂଶ ଏଫଆଇଆର ରୁଜୁ ହୋଇଥିଲା। କେନ୍ଦ୍ରମନ୍ତ୍ରୀଙ୍କ ବିରୋଧରେ ହତ୍ୟା ଉଦ୍ୟମ ଓ ଦଙ୍ଗାଠାରୁ ଆରମ୍ଭ କରି ଗୃହ ଅନୁପ୍ରବେଶ ଓ ବେଆଇନ ସମାବେଶ ପର୍ଯ୍ୟନ୍ତ ମାମଲା ରୁଜୁ ହୋଇଛି।
ନିଶିଥ ପ୍ରାମାଣିକ ସତ୍ୟପାଠରେ ଦର୍ଶାଇଛନ୍ତି ଯେ ତାଙ୍କ ବିରୋଧରେ ରୁଜୁ ହୋଇଥିବା କୌଣସି ମାମଲାରେ ତାଙ୍କ ବିରୋଧରେ ଅଭିଯୋଗ ପ୍ରମାଣିତ କରାଯାଇ ନାହିଁ। ସେଥିମଧ୍ୟରୁ କୁଚବିହାର ଜିଲ୍ଲାର ବିଭିନ୍ନ ଥାନାରେ ୧୨ଟି ମାମଲା ରୁଜୁ ହୋଇଥିବା ବେଳେ ୨ଟି ଅଲିପୁରଦ୍ୱାରରେ ରହିଛି।
୨୦୧୯ ଲୋକସଭା ନିର୍ବ0ାଚନ ପୂର୍ବରୁ ନିର୍ବାଚନ କମିଶନଙ୍କ ନିକଟରେ ଦାଖଲ କରିଥିବା ସତ୍ୟପାଠରେ ପ୍ରାମାଣିକ ତାଙ୍କ ବିରୋଧରେ ୧୧ଟି ଅପରାଧିକ ମାମଲା ରହିଥିବା ଘୋଷଣା କରିଥିଲେ।