ଦିଲ୍ଲୀ ଅନ୍ତର୍ଜାତୀୟ ସରସ ମେଳାରେ ଓରମାସ ଷ୍ଟଲ୍
ଭୁବନେଶ୍ୱର : ନୂଆଦିଲ୍ଲୀର ପ୍ରଗତି ମୈଦାନରେ ଚାଲିଥିବା ଇଣ୍ଡିଆ ଇଣ୍ଟରନ୍ୟାସନାଲ ଟ୍ରେଡ୍ ଫେୟାର (ଆଇଆଇଟିଏଫ୍) ସରସ ମେଳା-୨୦୨୧ରେ ଓଡ଼ିଶାର ଓରମାସ ତରଫରୁ ପାଞ୍ଚଟି ଷ୍ଟଲ୍ ଖୋଲାଯାଇଛି । ଗଞ୍ଜାମ, ଯାଜପୁର, ବାଲେଶ୍ୱର, ମୟୂରଭଞ୍ଜ ଓ କନ୍ଧମାଳ ଜିଲ୍ଲାର ସ୍ୱୟଂ ସହାୟକ ଗୋଷ୍ଠୀ/ଉତ୍ପାଦକ ଗୋଷ୍ଠୀ ସଦସ୍ୟମାନଙ୍କ ଦ୍ୱାରା ପରିଚାଳିତ ଏହି ଷ୍ଟଲରେ ଓଡ଼ିଶାର ପ୍ରସିଦ୍ଧ ହସ୍ତତନ୍ତ, ହସ୍ତଶିଳ୍ପ, ଆଚାର, ବଡ଼ି, ପାମ୍ପଡ଼, ଘରକରଣା ସାମଗ୍ରୀ ସହ ସାଜସଜ୍ଜା ଜିନିଷ ସବୁ ବିକ୍ରି କରାଯାଉଛି। ଏ.ବି.ସି-୭ ହଲ୍ର ୮,୯ ୧୦, ୯୦ ଓ ୨୧ ନମ୍ବର ଷ୍ଟଲରେ ଓଡ଼ିଶା ସାମଗ୍ରୀ ବିକ୍ରି କରାଯାଉଛି ।
Sambad is now on WhatsApp
Join and get latest news updates delivered to you via WhatsApp
ଯାଜପୁର ଜିଲ୍ଲା ଷ୍ଟଲରେ ଟସର ଶାଢ଼ୀ, ଷ୍ଟଲ୍, ଜ୍ୟାକେଟ, ସଲ୍ ଆଦି ବିକ୍ରି ହେଉଥିବା ବେଳେ, ବାଲେଶ୍ୱର ଷ୍ଟଲରେ ଉଲ୍, କପଡ଼ା ଆଦିରୁ ପ୍ରସ୍ତୁତ ଡେକୋରେଟିଭ ସାମଗ୍ରୀ ସହ ଲାଖରୁ ତିଆରି ଜିନିଷ ମଧ୍ୟ ବିକ୍ରି କରାଯାଉଛି । ସେହିପରି ଗଞ୍ଜାମ ଜିଲ୍ଲା ଷ୍ଟଲରେ ବ୍ରହ୍ମପୁରର ପ୍ରସିଦ୍ଧ ଆଚାର, ପାମ୍ପଡ଼, ବଡ଼ି ସହ ପାଟି ସୁଆଦିଆ ଚଟପଟି ସ୍ନାକ୍ସ ଆଦି ବିକ୍ରି କରାଯାଉଛି । ସେହିପରି ମୟୂରଭଞ୍ଜ ଷ୍ଟଲରେ ସବାଇ ଘାସରୁ ତିଆରି ଘରକରଣା ସମାଗ୍ରୀ ସହ ବିଭିନ୍ନ ଆକର୍ଷଣୀୟ ଜିନିଷ ସବୁ ବିକ୍ରି କରାଯାଉଛି। ଜି.ଆଇ ଟ୍ୟାଗ୍ ମାନ୍ୟତାପ୍ରାପ୍ତ କନ୍ଧମାଳର ପ୍ରସିଦ୍ଧ ହଳଦୀ ଗୁଣ୍ଡ ଓ ଗୋଟା ହଳଦୀର ମଧ୍ୟ ଭଲ ବିକ୍ରି ହେଉଛି। ନଭେମ୍ବର ୧୪ରୁ ଆରମ୍ଭ ହୋଇଥିବା ଏହି ମେଳା ୨୭ ପର୍ଯ୍ୟନ୍ତ ଚାଲିବ।