କାଳିଆପାଣି : କାଳିଆପାଣି ଥାନା ଖଣିଅଞ୍ଚଳ ଟମକା-ମଙ୍ଗଳପୁର ସଡ଼କରେ ଗୁରୁବାର ପୁଣି ରାସ୍ତାଜାମ୍ ହୋଇଛି। କୋଇପଶିରୁ କାଳିଆପାଣି ମଧ୍ୟରେ ନାହିଁ ନଥିବା ଟ୍ରାଫିକ ଜାମ୍ ପାଇଁ ୯ ଜଣ ମହିଳା ଅଧାବାଟରେ ଅଢ଼େଇ ଘଣ୍ଟା ଅଟକି ରହିଥିଲେ। କଅଁସ ପଞ୍ଚାୟତ ସାରୁଆବିଲ ଗାଁର ଗୀତାଞ୍ଜଳି ପ୍ରଧାନ, କୁନି ପ୍ରଧାନ, ରିତାରାଣୀ ସାହୁ, ଭାଲୁକୁଣି ଦେହୁରୀ, ସୁଲୋଚନା ଦେହୁରୀ, କୌଶଲ୍ୟା ପ୍ରଧାନ, ଶ୍ରୀମତୀ ପ୍ରଧାନ ଓ ଅନ୍ୟ ୨ ସହଯୋଗୀ ୟୁନିଅନ ବ୍ୟାଙ୍କ କାଳିଆପାଣି ଶାଖା ଆସିବା ପାଇଁ ସାରୁଆବିଲରୁ ଏକ ବୋଲେରୋରେ ସକାଳ ୧୦ଟାରେ ବାହାରିଥିଲେ। ଘରଠାରୁ କିଛିବାଟ ଆସିବା ପରେ ଟ୍ରକ୍ ଭିଡ଼ ମଧ୍ୟରେ ଗାଡ଼ିଟି ଫସି ଯାଇଥିଲା। ସଡ଼କ ଉପରେ ୩ ରୁ ୪ ଧାଡ଼ିରେ ମାଳମାଳ ଟ୍ରକ୍ ସବୁ ରହିଥିଲେ। ଏ କ୍ଷେତ୍ରରେ ମହିଳାମାନେ ପୂର୍ବତନ ସରପଞ୍ଚ ରବୀନ୍ଦ୍ର କୁମାର ସାହୁଙ୍କ ସହାୟତା ଲୋଡ଼ିଥିଲେ ବି ସେ କିଛି କରିପାରିନଥିଲେ। ଶେଷରେ ସେମାନେ ଏକ କିଲୋମିଟରରୁ ଅଧିକ ବାଟ ଚାଲିଚାଲି କାଳିଆପାଣି ହନୁମାନ ବଜାର ପହଞ୍ଚିଥିଲେ।
Sambad is now on WhatsApp
Join and get latest news updates delivered to you via WhatsApp
ଏ ସମସ୍ୟା ସଂପର୍କରେ ପୁଲିସ ଓ ଥାନା ଅଧିକାରୀଙ୍କୁ ବାରମ୍ବାର ଯୋଗାଯୋଗ ଉଦ୍ୟମ କରିଥିଲେ ମଧ୍ୟ କେହି ଫୋନ୍ ଧରିନଥିଲେ ବୋଲି ପୂର୍ବତନ ସରପଞ୍ଚ ଶ୍ରୀ ସାହୁ ଓ ମହିଳାମାନେ ଅଭିଯୋଗ କରନ୍ତି। ବିଭାଗୀୟ ଉଚ୍ଚ କର୍ତ୍ତୃପକ୍ଷ ଓ ଜିଲ୍ଲା ପ୍ରଶାସନ ଏ ଦିଗରେ ସ୍ଥାୟୀ ପଦକ୍ଷେପ ନେବାକୁ ସ୍ଥାନୀୟ ବୁଦ୍ଧିଜୀବୀ ଦାବି କରିଛନ୍ତି।