ଆଫ୍ରିକା ମହାଦ୍ୱୀପ ଦୁଇ ଖଣ୍ଡରେ ବାଣ୍ଟି ହୋଇଯିବ ବୋଲି ଗବେଷକମାନେ ମତ ଦେଇଛନ୍ତି। ଆଉ ଆଗାମୀ ଏକ କୋଟି ବର୍ଷ ମଧ୍ୟରେ ଏହି ଦୁଇ ଖଣ୍ଡ ମଧ୍ୟରେ ଏକ ମହାସାଗର ସୃଷ୍ଟି ହୋଇଯିବ । ତେବେ ଏହି ପ୍ରକ୍ରିୟା ଏବେ ଠାରୁ ଆରମ୍ଭ ହୋଇସାରି ଥିବା ଦେଖିବାକୁ ମିଳିଛି। ଦକ୍ଷିଣ ପଶ୍ଚିମ ଇଲାକାରେ ଏକ ଦୀର୍ଘକାୟ ଫାଟ ସୃଷ୍ଟି ହୋଇଛି ଏବଂ ଲଗାତର ଭାବେ ଏହାର ଆକାର ପ୍ରକାର ବୃଦ୍ଧି ପାଇବାରେ ଲାଗିଛି। ଏଠାକାର ନୌରବି-ଲରିକ ହାଇୱେ ସଂପୂର୍ଣ୍ଣ ଭାବରେ ନଷ୍ଟ ଭ୍ରଷ୍ଟ ହୋଇଯାଇଛି । ଭୂମିକମ୍ପର ଗତିବିଧି ମଧ୍ୟ ଏଠାରେ ଦ୍ରୁତ ଗତିରେ ବଢି ଚାଲିଛି ବୋଲି ସୂଚନା ମିଳିଛି।
Sambad is now on WhatsApp
Join and get latest news updates delivered to you via WhatsApp
ଉଲ୍ଲେଖଯୋଗ୍ୟ, ପୃଥିବୀ ପୃଷ୍ଠରେ ଥିବା ଲିଥେସ୍ପେୟର ବିଭିନ୍ନ Tectonic platesରେ ବିଭାଜିତ ହୋଇଥାଏ । ଏହି ପ୍ଲେଟଗୁଡିକ ଭିନ୍ନ ଭିନ୍ନ ବେଗରେ ପରସ୍ପର ଆଡକୁ ଗତି କରିଥାନ୍ତି । ଏଗୁଡ଼ିକ ଏଥେନୋସ୍ପିୟର ଉପରେ ଚଳପ୍ରଚଳ କରିଥାନ୍ତି । କୁହାଯାଏ କି, ଏଥେନୋସ୍ପିୟର ପରିକ୍ରମା ଏବଂ ପରିଧିରୁ ସୃଷ୍ଟି ହୋଇଥିବା ବଲ୍ ଏଗୁଡିକୁ ଆହୁରି ଗତିଶୀଳ କରିଥାଏ । ଏହି ଶକ୍ତି ପ୍ଲେଟର ସାମାନ୍ୟ ରୂପରେ ଗତି କରି ନଥାଏ ବରଂ କେବେ କେବେ ପ୍ଲେଟର ପରିଧିକୁ ଭାଙ୍ଗି ମଧ୍ୟ ଦେଇଥାଏ । ଯାହାଦ୍ୱାରା ପୃଥିବୀରେ ଫାଟ ସୃଷ୍ଟି ହୋଇଥାଏ। ଫଳରେ ଆଉ ଏକ ନୂତନ ପ୍ଲେଟ ବାଉଣ୍ଡ୍ରି ସୃଷ୍ଟି ହେବାର ସ୍ଥିତି ଉପୁଜିଥାଏ ।
ପୃଥିବୀ ପୃଷ୍ଠରେ ଏଭଳି ଧରଣର ଫାଟ ସୃଷ୍ଟି ହେବାର କାରଣ କୌଣସି ମହାଦ୍ୱୀପର ବିଭାଜନର ଆରମ୍ଭ ଅଟେ । ଯଦି ଏହି ପ୍ରକ୍ରିୟା ଜାରି ରହେ ତେବେ ଏହାର ଫଳସ୍ୱରୂପ ସେଠାରେ ଏକ ନୂଆ ମହାସାଗର ସୃଷ୍ଟି ହୋଇଯାଇଥାଏ । ୧୩ କୋଟି ୮୦ଲକ୍ଷ ବର୍ଷ ପୂର୍ବରୁ ଏହି ପ୍ରକ୍ରିୟା କାରଣରୁ ଦକ୍ଷିଣ ଆମେରିକା ଏବଂ ଆଫ୍ରିକା ମହାଦ୍ୱୀପ ଅଲଗା ହୋଇଯାଇଥିଲା । ଏହି ଦୁଇଟି ମହଦ୍ୱୀପ ତଟବର୍ତ୍ତୀ ଅଞ୍ଚଳ ଦୃଶ୍ୟ ଏହାକୁ ପ୍ରମାଣିତ କରୁଛି ।