ସଲ୍‌ମାନଙ୍କ ଘର ଆଗରେ ଗୁଳି କରିଥିବା ବ୍ୟକ୍ତି ଜଣେ ‘ୱାଣ୍ଟେଡ୍‌ ଗ୍ୟାଙ୍ଗ୍‌ଷ୍ଟାର୍‌’: ସୂତ୍ର

ମୁମ୍ବାଇ: ଗତକାଲି ସକାଳେ ବଲିଉଡ ସୁପରଷ୍ଟାର ସଲମାନ ଖାନଙ୍କ ଘର ବାହାରେ ଗୁଳି ଫୁଟିଥିଲା। କିଛି ଅଜଣା ଦୁର୍ବୃତ୍ତ କ‌ାଲି ଗୁଳି ଫୁଟାଇ ସେଠାରୁ ଫେରାର ହୋଇଯାଇଥିଲେ।

ସୂତ୍ରରୁ ପ୍ରକାଶ ଯେ ରବିବାର ଦିନ ମୁମ୍ବାଇରେ ବଲିଉଡ ଅଭିନେତା ସଲମାନ ଖାନଙ୍କ ଘର ବାହାରେ ସିସିଟିଭି ଫୁଟେଜରେ ଗୁଳି ଚଳାଇଥିବାର ଦେଖାଯାଇଥିବା ଦୁଇ ଜଣ ଗୁଳିମାଡ଼କାରୀଙ୍କ ମଧ୍ୟରୁ ଜଣେ ହେଉଛନ୍ତି ହରିଆଣାର ଗୁରୁଗ୍ରାମର ଜଣେ ଗ୍ୟାଙ୍ଗଷ୍ଟର। ଏହି ଗ୍ୟାଙ୍ଗଷ୍ଟର ବିଶାଲ ରାହୁଲ, ଯିଏକି ଲରେନ୍ସ ବିଷ୍ନୋଇ ଗ୍ୟାଙ୍ଗ ସହ ଜଡିତ ଗ୍ୟାଙ୍ଗଷ୍ଟର ରୋହିତ ଗୋଦାରାଙ୍କ ଗୁଳିମାଡ଼କାରୀ।

ସଲମାନ ଖାନଙ୍କ ଗାଲାକ୍ସି ଆପାର୍ଟମେଣ୍ଟ ଘର ବାହାରେ ଗୁଳି ବିନିମୟର କିଛି ଘଣ୍ଟା ପରେ ଜେଲରେ ଥିବା ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୁଙ୍କ ଭାଇ ଅନମୋଲ ବିଷ୍ଣୁଙ୍କୁ ଏହି ଘଟଣା ପାଇଁ ସୋସିଆଲ ମିଡିଆ ପୋଷ୍ଟରେ ଦାୟୀ କରାଯାଇଛି।

ସେ ‌ନିଜେ ସଲମାନ ଖାନଙ୍କ ଘର ବାହାରେ ଗୁଳି ଚଳାଇଥିବା ଦାବି ହୋଇଛି। ଆମେରିକାରେ ଲରେନ୍ସର ଭାଇ ଅନମୋଲ ରହୁଥିବା ବେଳେ ସୋସିଆଲ ମିଡିଆ ପୋଷ୍ଟ ମାଧ୍ୟମରେ ସଲମାନଙ୍କ ଘର ବାହାରେ ଗୁଳି ଚଳାଇଥିବା ସ୍ପଷ୍ଟ କରିଛି। ପୋଷ୍ଟରେ ଲେଖାଯାଇଛି ଯେ, ଏହା କେବଳ ଟ୍ରେଲର ଥିଲା ଏବଂ ତୁମ ପାଇଁ ପ୍ରଥମ ଓ ଶେଷ ଚେତାବନୀ।

ଏମଧ୍ୟରେ ସଲମାନ ଖାନଙ୍କ ବାପା ସଲିମ୍ ଖାନ୍ ନିଜର ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି ଯେ, “ଘଟଣାକୁ ନେଇ କିଛି କହିବାର ନାହିଁ। ସେମାନେ କେବଳ ସଲମାନଙ୍କ ନାଁ ନେଇ ନିଜର ପ୍ରଚାର କରିବାକୁ ଚାହୁଁଛନ୍ତି। ଚିନ୍ତା କରିବାର କୌଣସି ଆବଶ୍ୟକତା ନାହିଁ।”