୫-ଟି ଅଧ୍ୟକ୍ଷଙ୍କୁ ଭେଟିଲେ ଆଶୀର୍ବାଦ, ସଞ୍ଜୟ ଓ ୧୦ କର୍ପୋରେଟର୍
ସାଂସଦ ଓ ବିଧାୟକ ପ୍ରାର୍ଥୀଙ୍କ ବିଜୟ ପାଇଁ କାମ କରିବୁ: ସଞ୍ଜୟ
କଟକ: ବାରବାଟୀ-କଟକ ବିଜେଡିରେ ନେତୃତ୍ବକୁ ନେଇ ଗତ କିଛିଦିନ ଧରି ବିବାଦ ଦେଖାଯାଇଥିବା ବେଳେ ଆଜି ଓଡ଼ିଶା ଅଲମ୍ପିକ ଆସୋସିଏସନ୍ ସମ୍ପାଦକ ଆଶୀର୍ବାଦ ବେହେରା ଓ ଓସିଏ ସମ୍ପାଦକ ସଞ୍ଜୟ ବେହେରାଙ୍କ ସହିତ ପାଖାପାଖି ୧୦ଜଣ ବିଜେଡି କର୍ପୋରେଟର୍ ନବୀନ ନିବାସ ଯାଇଥିଲେ। ଆଜି ପୂର୍ବାହ୍ନରେ ଆଶୀର୍ବାଦ ଓ ସଞ୍ଜୟଙ୍କ ନେତୃତ୍ବରେ ସେମାନେ ୫-ଟି ଅଧ୍ୟକ୍ଷଙ୍କୁ ଭେଟିଥିଲେ। ବୈଠକରେ କେଉଁ ବିଷୟରେ ଆଲୋଚନା କରାଯାଇଥିଲା, ତାହାକୁ ନେଇ କୌଣସି କର୍ପୋରେଟର୍ ମୁହଁ ଖୋଲୁ ନଥିବା ବେଳେ ବିଗତ ଦିନରେ ବାରବାଟୀ-କଟକରେ ନେତୃତ୍ବକୁ ନେଇ ଦେଖାଯାଇଥିବା ବିବାଦ ଉପରେ ଆଲୋଚନା ହୋଇଥିବା ଚର୍ଚା ହେଉଛି।
Sambad is now on WhatsApp
Join and get latest news updates delivered to you via WhatsApp
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କଟକ ଲୋକସଭା ପ୍ରାର୍ଥୀ ଓ ବାରବାଟୀ-କଟକ ବିଧାୟକ ପ୍ରାର୍ଥୀ ଭାବେ ଯାହାଙ୍କୁ ଟିକେଟ ଦେଇଛନ୍ତି ତାଙ୍କ ବିଜୟ ପାଇଁ ଆମେ କାମ କରିବୁ। ତେବେ, ମେୟର୍ ସୁବାସ ସିଂହ, ଆଶୀର୍ବାଦ ବେହରା ଓ ସଞ୍ଜୟ ବେହେରାଙ୍କ ଦିଗଦର୍ଶନରେ କାମ କରିବୁ ବୋଲି କେତେଜଣ କର୍ପୋରେଟର୍ ଆଗରୁ କହିଥିଲେ। ଏନେଇ ମେୟର୍, ଆଶୀର୍ବାଦ ଓ ସଞ୍ଜୟଙ୍କୁ ଗତ ଶୁକ୍ରବାର ଭେଟି କର୍ପୋରେଟର୍ମାନେ ଆଲୋଚନା କରିଥିଲେ। ଅନ୍ୟପଟେ ବିଧାୟକ ପ୍ରାର୍ଥୀ ୱାର୍ଡ ବୁଲିବା ସମୟରେ କର୍ପୋରେଟର୍ଙ୍କୁ ସାଙ୍ଗରେ ନେଉ ନାହାନ୍ତି ବୋଲି କେତେଜଣ କର୍ପୋରେଟର୍ ଅଭିଯୋଗ କରିବା ସହ ୧୪ ତାରିଖରେ ମୁଖ୍ୟମନ୍ତ୍ରୀ ଓ ୫-ଟି ସଚିବଙ୍କୁ ଭେଟିବେ ବୋଲି କହିଥିଲେ। ଏଥିପାଇଁ ଆଜି ଆଶୀର୍ବାଦ, ସଞ୍ଜୟଙ୍କ ସହିତ ପାଖାପାଖି ୧୦ଜଣ କର୍ପୋରେଟର ନବୀନ ନିବାସ ଯାଇଥିଲେ। କଟକ ଲୋକସଭା ସାଂସଦ ପ୍ରାର୍ଥୀ ଓ ବାରବାଟୀ-କଟକ ବିଧାୟକ ପ୍ରାର୍ଥୀଙ୍କ ପାଇଁ ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଦେଇଛୁ। ରାଜ୍ୟ ଯାଦବ ସଙ୍ଗଠନକୁ ଜମି ଦେବା ଓ କ୍ରୀଡାର ବିକାଶ ପାଇଁ ମୁଖ୍ୟମନ୍ତ୍ରୀ ଓ ୫-ଟି ଅଧ୍ୟକ୍ଷଙ୍କ ସହିତ ଆଜି ଆଲୋଚନା ହୋଇଛି। ନିର୍ବାଚନରେ ସମସ୍ତେ ଏକାଠି ହୋଇ କାମ କରିବୁ ବୋଲି ସାକ୍ଷାତକାରେ ଆଲୋଚନା କରାଯାଇଥିବା ଓସିଏ ସମ୍ପାଦକ ସଞ୍ଜୟ ବେହେରା କହିଛନ୍ତି। ଆଜିର ସାକ୍ଷାତକାରରେ ଆଶୀର୍ବାଦ ଓ ସଞ୍ଜୟ ବେହେରାଙ୍କ ସହିତ କର୍ପୋରେଟର୍ ବିକାଶ ବେହେରା, ଏ. ଶ୍ରୀଦେବୀ, ମହମ୍ମଦ୍ ଇଫତକାର୍ ଆଲମ, ବସନ୍ତ କୁମାର ବେହେରା, ନମିତା ବାରିକ, ପୁଷ୍ପଲତା ମହାନ୍ତି, ପ୍ରଦୀପ କୁମାର ରାଉତ, ପ୍ରିୟମ୍ବଦା ମହାନ୍ତି, ଲକ୍ଷ୍ମୀପ୍ରିୟା ବେହେରା ଓ ଅନ୍ୟମାନେ ଉପସ୍ଥିତ ଥିଲେ।