ସୁନ୍ଦରଗଡ଼ ଜିଲ୍ଲାର ତିନି ଗାଁରେ ହାତୀପଲଙ୍କ ଉତ୍ପାତ ଘର ଭାଙ୍ଗି ଖାଇଲେ ବଣ୍ଟନ ଚାଉଳ
ରାଉରକେଲା : କୋଇଡା ରେଞ୍ଜ ଅନ୍ତର୍ଗତ ପାଟମୁଣ୍ଡା ପଞ୍ଚାୟତର ତିନୋଟି ଗାଁରେ ହାତୀପଲଙ୍କ ଉତ୍ପାତ ଅତିଷ୍ଠ ହେବାରେ ଲାଗିଛି । ଗତକାଲି ରାତିରେ ଏକ ହାତୀପଲ ଚକଧର ଗ୍ରାମର ବିରଗା ମୁଣ୍ଡାଙ୍କ ଘର ଭାଙ୍ଗି ଚାଉଳ ଧାନ ଖାଇବା ସହିତ ବିଭିନ୍ନ ଆସବାବପତ୍ର ନଷ୍ଟ କରିଛନ୍ତି । ଠିକ ସେହିପରି ସେହି ଗ୍ରାମର ଜୁନାଶ ମୁଣ୍ଡା ଙ୍କ ଘର ହାତୀପଲ ଭାଙ୍ଗିବା ସହିତ ସଞ୍ଚିତ ଧାନ ଖାଇବା ସହ ଲକଡାଉନରେ ମିଳିଥିବା ଚାଉଳ ଖାଇ ଘରର ବିଭିନ୍ନ ସାମଗ୍ରୀ ନଷ୍ଟ କରିଛନ୍ତି । ପରେ ବଡ଼ପାଟୁଳି ଗ୍ରାମର ଗିରିପୋଷ ସାହିରେ ହାତୀପଲ ପଶି ଘରର କାନ୍ଥ ଭାଙ୍ଗି ଦେଇଥିବା ବେଳେ ଆମ୍ବିଳିଆମ ଗ୍ରାମର ରଞ୍ଜିତ ପାତ୍ରଙ୍କ ଘରର କାନ୍ଥ ଭାଙ୍ଗି ଚାଉଳ ଖାଇ ବିଭିନ୍ନ ସାମଗ୍ରୀ ନଷ୍ଟ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଘଟଣା ବିଷୟରେ ସ୍ଥାନୀୟ ସରପଞ୍ଚ ଅଭିନାଶ ସୁମନ ବାଗେ ତିନୋଟି ଗ୍ରାମର କ୍ଷତିଗ୍ରସ୍ତ ପରିବାର ଲୋକଙ୍କ ପାଖରେ ପହଁଚି କ୍ଷତିଗ୍ରସ୍ତ ପରିବାରକୁ ପଞ୍ଚାୟତ ତରଫରୁ ଚାଉଳ ପ୍ରଦାନ କରିଥିଲେ । ଲକଡାଉନ ସମୟରେ ହାତୀ ମାନଙ୍କ ଉପଦ୍ରବ ବୋଝ ଉପରେ ନଳିତା ବିଡା ସାଜିଥିବାବେଳେ ଘଟଣାକୁ ଦୁଇଦିନ ବିତି ଯାଇଥିଲେ ସୁଦ୍ଧା ବନ ବିଭାଗର କ୍ଷତିଗ୍ରସ୍ତ ଲୋକଙ୍କ ପାଖରେ ନପହଂଚିବା ଏକ ବଡ଼ ପ୍ରଶ୍ନବାଚୀ ସୃଷ୍ଟି ହୋଇଛି l
ଏପଟେ କ୍ଷତିଗ୍ରସ୍ତ ପରିବାର ଲୋକଙ୍କ କହିବା ଅନୁସାରେ ବନ ବିଭାଗକୁ ଯୋଗାଯୋଗ କରାଯାଇଥିଲେ ସୁଦ୍ଧା ଗାଡି ଖରାପ ଥିବାରୁ ସେ ଘଟଣା ସ୍ଥଳକୁ ଯାଇ ପାରୁନଥିବା ସଫେଇ ଦେଇଛନ୍ତି l ଯଥାଶୀଘ୍ର କ୍ଷତିଗ୍ରସ୍ତ ପରିବାରକୁ କ୍ଷତିପୂରଣ ଯୋଗାଇ ଦେବାକୁ ଗ୍ରାମବାସୀ ଜିଲ୍ଲା ପ୍ରଶାସନକୁ ଅନୁରୋଧ କରିଛନ୍ତି ।