ହରିଆନା ମୁଖ୍ୟମନ୍ତ୍ରୀ ମନୋହର ଲାଲ ଖଟ୍ଟରଙ୍କ ଇସ୍ତଫା, ଲୋକସଭା ନିର୍ବାଚନ ଲଢ଼ିବା ସମ୍ଭାବନା
ନୂଆଦିଲ୍ଲୀ: ଲୋକସଭା ନିର୍ବାଚନ ପୂର୍ବରୁ ଆସନ ବୁଝାମଣାକୁ ନେଇ ବିଜେପି ଏବଂ ଜେଜେପି ଭିତରେ ମତାନ୍ତରର ଖବର ଶୁଣିବାକୁ ମିଳୁଛି। ଏହି କାରଣରୁ ହରିଆନା ମୁଖ୍ୟମନ୍ତ୍ରୀ ମନୋହର ଲାଲ ଖଟ୍ଟର ଆଜି ରାଜ୍ୟପାଳ ବୃନ୍ଦାବନ ଦତ୍ତାତ୍ରେୟଙ୍କୁ ଭେଟି ତାଙ୍କ ଇସ୍ତଫା ପତ୍ର ଦାଖଲ କରିଛନ୍ତି। କ୍ୟାବିନେଟ ଭଙ୍ଗ କରିବା ପରେ ହରିଆନାରେ ସ୍ୱାଧୀନ ବିଧାୟକଙ୍କ ସମର୍ଥନରେ ବିଜେପି ସରକାର ଗଠନ କରିବ ବୋଲି ଜଣାଯାଇଛି।
Sambad is now on WhatsApp
Join and get latest news updates delivered to you via WhatsApp
ହରିଆନାର ସ୍ୱାଧୀନ ବିଧାୟକ ନୟନ ରାୱତ କହିଛନ୍ତି, “ଆମେ ପୂର୍ବରୁ ମୁଖ୍ୟମନ୍ତ୍ରୀ ମନୋହର ଲାଲଙ୍କ ନେତୃତ୍ୱାଧୀନ ସରକାରଙ୍କୁ ସମର୍ଥନ ଦେଇଛୁ। ଲୋକସଭା ନିର୍ବାଚନ ପାଇଁ ରଣନୀତି ବିଷୟରେ ମଧ୍ୟ ଆଲୋଚନା କରିଛୁ। ଜେଜେପି ସହ ମେଣ୍ଟ ଭାଙ୍ଗିବା ପ୍ରକ୍ରିୟା ଆରମ୍ଭ ହୋଇସାରିଛି।” ଶ୍ରୀ ଖଟ୍ଟରଙ୍କୁ ଭେଟିବା ପରେ ସାମ୍ବାଦିକମାନଙ୍କୁ ଏହା କହିଛନ୍ତି। ତେବେ ଏହା ନିଶ୍ଚିତ ନୁହେଁ ଯେ ଶ୍ରୀ ଖଟ୍ଟର ପୁଣିଥରେ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିବେ କି?
ଦଳର ସୂତ୍ରରୁ ପ୍ରକାଶ ଯେ ବରିଷ୍ଠ ନେତା ମନୋହର ଲାଲ ଖଟ୍ଟର କର୍ଣ୍ଣଲରୁ ଲୋକସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିପାରନ୍ତି। ଜେଜେପି ନେତା ଦୁଷ୍ୟନ୍ତ ଚୌତାଲା ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ ପି ନଡ୍ଡାଙ୍କୁ ଭେଟି ରାଜ୍ୟର ଦୁଇ ସହଯୋଗୀଙ୍କ ମଧ୍ୟରେ ଆସନ ବୁଝାମଣା ବିଷୟରେ ଆଲୋଚନା କରିବାର ଗୋଟିଏ ଦିନ ପରେ ଏହା ଘଟିଛି।
ସୂଚନାଯୋଗ୍ୟ, ୨୦୧୯ ନିର୍ବାଚନରେ ବିଜେପି ରାଜ୍ୟର ସମସ୍ତ ଦଶଟି ଲୋକସଭା ଆସନ ଜିତିଥିଲା। ବିଧାନସଭା ନିର୍ବାଚନ ପରେ ଜେଜେପି ସହ ମେଣ୍ଟ ହୋଇଥିଲା।