୨ଟି ପର୍ଯ୍ୟାୟରେ ଖୋଲିବ ମାଲଦୋଗାମ: ବନ୍ଦ ରହିବ ୧୦୦ ଗୋଦାମ, ନିଅଣ୍ଟ ପଡ଼ିପାରେ ଡାଲି
କଟକ: ଭିଡ଼ ଯୋଗୁଁ କରୋନା ସଂକ୍ରମଣ ହେବାର ଆଶଙ୍କା ଥିବାରୁ ମାଲଗୋଦାମ ଆଜିଠାରୁ ଦୁଇଟି ପର୍ଯ୍ୟାୟରେ ଖୋଲାଯିବ। ଖୁଚୁରା ଦୋକାନ ସକାଳ ୬ଟାରୁ ଦିନ ୨ଟା ପର୍ଯ୍ୟନ୍ତ ଖୋଲା ରଖିବେ। ହୋଲସେଲ୍ ଗୋଦାମ ଦିନ ୧୨ଟାରୁ ଗ୍ରାହକ ଆସିବା ଯାଏ ଖୋଲା ରହିବ। କେବଳ ଡାଲି, ଚାଉଳ, ଚିନି, ତେଲ, ଲୁଣ ଭଳି ଅତ୍ୟାବଶ୍ୟକ ସାମଗ୍ରୀ ବିକ୍ରି କରୁଥିବା ବ୍ୟବସାୟୀ ନିଜ ଦୋକାନ ଖୋଲି ପାରିବେ। ଅନ୍ୟ ଦୋକାନ ଓ ଗୋଦାମଗୁଡ଼ିକ ବନ୍ଦ ରହିବ। ଏବେ ମାଲଗୋଦାମକୁ ଡାଲି ଯୋଗାଣରେ ନୂଆ ସମସ୍ୟା ଦେଖାଦେଇଛି। ରାଜ୍ୟ ବାହାର ମଣ୍ଡିରେ ଶ୍ରମିକମାନେ ଭୟରେ ଆସୁ ନଥିବାରୁ ମାଲ ଲୋଡିଂରେ ସମସ୍ୟା ଦେଖାଦେଇଛି। ତେବେ ଯେତିକି ପରିମାଣରେ ଡାଲି ମାଲଗୋଦାମରେ ଗଚ୍ଛିତ ରହିଛି, ଆଗାମୀ ୨୦ରୁ ୨୫ଦିନ ପର୍ଯ୍ୟନ୍ତ ରାଜ୍ୟ ସାରା ଯୋଗାଯାଇପାରିବ ବୋଲି କଟକ ବଣିକ ସଂଘ ପକ୍ଷରୁ ସୂଚନା ମିଳଛି।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, କରୋନା ଭୟାବହତା ବ୍ୟାପିବାରେ ଲାଗିଥିବାରୁ ମାଲଗୋଦାମରେ ଗ୍ରାହକଙ୍କ ଅସମ୍ଭବ ଭିଡ଼ ସୃଷ୍ଟି ହେଲାଣି। ଏଭଳି ସ୍ଥିତିର ମୁକାବିଲା କରିବା ପାଇଁ ଜିଲ୍ଲାପାଳଙ୍କ କାର୍ଯ୍ୟାଳୟରେ କଟକ ବଣିକ ସଂଘ ପକ୍ଷରୁ ଆଜି ଦିନ ପ୍ରାୟ ୧୨ଟା ବେଳେ ଏକ ଗୁରୁତ୍ବପୂର୍ଣ୍ଣ ବୈଠକ ବସିଥିଲା। ଏହି ବୈଠକରେ ମାଲଗୋଦାମରେ ଅତ୍ୟାବଶ୍ୟକ ସାମଗ୍ରୀ ବିକ୍ରି ଉପରେ ଗୁରୁତ୍ବା ଦିଆଯାଇଥିଲା। ୭୦୦ ପାଖାପାଖି ଅତ୍ୟାବଶ୍ୟକ ସାମଗ୍ରୀ ବାଦ୍ ୧୦୦ ପାଖାପାଖି ଅନ୍ୟାନ୍ୟ ହୋଲସେଲର୍ ଓ ଖୁଚୁରା ଦୋକାନ ବନ୍ଦ ରହିବ। ଭିଡ଼ ନିୟନ୍ତ୍ରଣ ପାଇଁ ଆସନ୍ତା ୨୯ ତାରିଖ ପର୍ଯ୍ୟନ୍ତ ଏ ପ୍ରକାର ନିଷ୍ପତ୍ତି ଗ୍ରହଣ କରାଯାଇଛି। ମହରାଷ୍ଟ୍ରର ନାଗପୁର, ଛତିଶଗଡ଼ର ରାୟପୁରରୁ ମାଲଗୋଦାମକୁ ଡାଲି ଆସିଥାଏ। ସେହି ମଣ୍ଡିଗୁଡ଼ିକରେ ମାଲ୍ ଲୋଡିଂ କରିବାରେ ସମସ୍ୟା ସୃଷ୍ଟି ହେଉଛି। କରୋନା ଭୟରେ ଶ୍ରମିକମାନେ ମଣ୍ଡିକୁ ଆସୁ ନଥିବା କୁହାଯାଉଛି। ଏଭଳି ସ୍ଥିତିର ମୁକାବିଲା ପାଇଁ ବଣିକ ସଂଘ ପକ୍ଷରୁ କଟକ ଜିଲ୍ଲାପାଳଙ୍କୁ ଅବଗତ କରାଯାଇଥିଲା। ଏହା ରାଜ୍ୟ ବାହାରର ପ୍ରସଂଗ ହୋଇଥିବାରୁ ଜିଲ୍ଲାପାଳ ସଚିବସ୍ତରରେ ଆଲୋଚନା କରି ସମସ୍ୟାର ସମାଧାନ ପାଇଁ ପ୍ରତିଶ୍ରୁତି ଦେଇଛନ୍ତି। ଆସନ୍ତାକାଲିଠାରୁ ଦୁଇଟି ପର୍ଯ୍ୟାୟରେ ବ୍ୟବସାୟ ହେବା ପାଇଁ ଯେଉଁ ନିଷ୍ପତ୍ତି ଗ୍ରହଣ କରାଯାଇଛି, ଏ ସଂକ୍ରାନ୍ତରେ ଆସନ୍ତାକାଲିଠାରୁ ମାଇକ ଯୋଗେ ମାଲଗୋଦାମରେ ପ୍ରଚାର କରିବା ପାଇଁ ମାଲଗୋଦାମ ଥାନା ପୁଲିସକୁ ଏକ ଗାଡ଼ି ଯୋଗାଇ ଦେବାକୁ ସଂଘ ପକ୍ଷରୁ ଅନୁରୋଧ କରାଯାଇଥିଲା। ଗାଡ଼ି ମିଳିଥିବା ବେଳେ ସମସ୍ତ ବ୍ୟବସାୟୀଙ୍କୁ ନିଷ୍ପତ୍ତି ସଂକ୍ରାନ୍ତରେ ପ୍ରଚାର କରି ଅବଗତ କରାଯିବା ନେଇ ବଣିକ ସଂଘର ସାଧାରଣ ସମ୍ପାଦକ ପ୍ରଫୁଲ୍ଲ କୁମାର ଛାଟୋଇ ସୂଚନା ଦେଇଛନ୍ତି।