ପୂରଣ ହେଲା ୩୦ ବର୍ଷର ଦାବି: ଉତ୍ତରାଞ୍ଚଳ ରାଜସ୍ବ ଆୟୁକ୍ତଙ୍କ ଅଧୀନକୁ ଆସିଲା ବୌଦ୍ଧ, ନୂଆପଡ଼ା
ସମ୍ବଲପୁର/ବୌଦ୍ଧ : ବୌଦ୍ଧ ଓ ନୂଆପଡ଼ା ଜିଲ୍ଲାବାସୀଙ୍କ ବହୁଦିନର ସ୍ବପ୍ନ ପୂରଣ ହୋଇଛି। ଅନେକବର୍ଷର ଲମ୍ବା ଦାବିପରେ ଶେଷରେ ଉତ୍ତରାଞ୍ଚଳ ରାଜସ୍ବ ଡିଭିଜନ୍ର ପୁନର୍ଗଠନ ହୋଇ ଏଥିରେ ବୌଦ୍ଧ ଓ ନୂଆପଡ଼ା ଜିଲ୍ଲାକୁ ସାମିଲ୍ କରାଯାଇଛି। ଏ ନେଇ ‘ସମ୍ବାଦ’ରେ ମଧ୍ୟ ବାରମ୍ବାର ଖବର ପ୍ରକାଶ ପାଇଥିଲା। ବୌଦ୍ଧ ଓ ନୂଆପଡ଼ାର ଉତ୍ତରାଞ୍ଚଳ ଡିଭିଜନ୍ରେ ମିଶିବାର ଆବଶ୍ୟକତା ନେଇ ଖବରରେ ଦର୍ଶାଯାଇଥିଲା। ଶେଷରେ ସରକାର ଏହି ଦାବି ରକ୍ଷାକରି ଐତିହାସିକ ପଦକ୍ଷେପ ନେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ବର୍ତ୍ତମାନ ଉତ୍ତରାଞ୍ଚଳ ରାଜସ୍ବ ଆୟୁକ୍ତଙ୍କ ଅଧୀନକୁ ୧୨ଟି ଜିଲ୍ଲା ଆସିଥିଲାବେଳେ ଦକ୍ଷିଣାଞ୍ଚଳ ରାଜସ୍ବ ଆୟୁକ୍ତଙ୍କ ପରିସୀମା ୮ ଜିଲ୍ଲାକୁ ହ୍ରାସ ପାଇଛି। ଏବେ ଉତ୍ତରାଞ୍ଚଳ ରାଜସ୍ବ ଆୟୁକ୍ତ ସମ୍ବଲପୁରଙ୍କ ଅଧୀନରେ ବୌଦ୍ଧ ଓ ନୂଆପଡ଼ା ସମେତ ଅନୁଗୁଳ, ବରଗଡ଼, ବଲାଙ୍ଗୀର, ଦେବଗଡ଼, ଢେଙ୍କାନାଳ, ଝାରସୁଗୁଡ଼ା, କେନ୍ଦୁଝର, ସମ୍ବଲପୁର, ସୁବର୍ଣ୍ଣପୁର ଓ ସୁନ୍ଦରଗଡ଼ ଜିଲ୍ଲା ରହିବେ। ସେହିପରି ଦକ୍ଷିଣାଞ୍ଚଳ ରାଜସ୍ବ ଆୟୁକ୍ତଙ୍କ ଅଧୀନରେ ଗଂଜାମ, ଗଜପତି, କଳାହାଣ୍ଡି, କୋରାପୁଟ, ମାଲକାନଗିରି, ନବରଂଗପୁର, କନ୍ଧମାଳ ଓ ରାୟଗଡ଼ା ଜିଲ୍ଲା ରହିବେ। କେନ୍ଦ୍ରାଞ୍ଚଳ ରାଜସ୍ବ ଆୟୁକ୍ତଙ୍କ ୧୦ଟି ଜିଲ୍ଲା ପୂର୍ବ ଭଳି ଅପରିବର୍ତ୍ତିତ ରହିବ। ଏନେଇ ରାଜସ୍ବ ଓ ବିପର୍ଯ୍ୟୟ ପ୍ରଶମନ ବିଭାଗ ତରଫରୁ ପତ୍ର ସଂଖ୍ୟା ୩୯୫୨୨, ତା. ୨୧ ନଭେମ୍ବର ୨୦୨୨ରେ ବିଜ୍ଞପ୍ତି ପ୍ରକାଶ ପାଇଛି।