ରାଉରକେଲା: ଗଣେଶ ପୂଜାରେ ନକ୍ସଲଙ୍କ ବଡ଼ ଧରଣର ହିଂସା ଯୋଜନା ପଣ୍ଡ ହୋଇଛି। ଓଡ଼ିଶା-ଝାଡ଼ଖଣ୍ଡ ସୀମାନ୍ତ ଜଙ୍ଗଲରେ ସ୍ଥାନୀୟ ପୁଲିସ ଓ ସିଆର୍ପିଏଫ୍ର ସର୍ଚ୍ଚ ଅପରେସନ୍ବେଳେ ଗୋଏଲକେରା ବେଡାଦୁଇଆ ଗାଁ ନିକଟ ଜଙ୍ଗଲ ରାସ୍ତାରୁ ନକ୍ସଲମାନେ ଖଞ୍ଜିଥିବା ଟିଫିନ୍ ବୋମା ଉଦ୍ଧାର ହୋଇଛି। ଟିଫିନ୍ ବୋମାର ଓଜନ ପ୍ରାୟ ୮ କିଲୋଗ୍ରାମରୁ ଅଧିକ ହେବ ବୋଲି ଜଣାପଡ଼ିଛି। ଏଥିସହ କିଛି ତାର ଓ ପେନ୍ସିଲ୍ ବ୍ୟାଟେରି ମଧ୍ୟ ଉଦ୍ଧାର ହୋଇଛି। ଘଟଣାସ୍ଥଳରେ ବୋମା ନିଷ୍କ୍ରିୟକାରୀ ଦଳ ଟିଫିନ୍ ବୋମାକୁ ନଷ୍ଟ କରିଦେଇଛନ୍ତି। ପରେ ସ୍ଥାନୀୟ ଅଞ୍ଚଳରେ ଉଭୟ ପୁଲିସ ଓ ସିଆର୍ପିଏଫ୍ ଯବାନଙ୍କ ପକ୍ଷରୁ ସର୍ଚ୍ଚ ଅପରେସନ୍କୁ ଜୋରଦାର କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ସ୍ଥାନୀୟ ପୁଲିସ ଅଧୀକ୍ଷକଙ୍କ କହିବାନୁଯାୟୀ ନକ୍ସଲ ସଙ୍ଗଠନ ନେତା ମିସ୍ରି ବେସ୍ରା, ଅନମୋଲ, ମୋଚ୍ଛୁ, ଚମନ, ଅଜୟ ମହାତୋ, ସାଗେନ୍ ଅଙ୍ଗାରିଆ ଓଡ଼ିଶା-ଝାଡ଼ଖଣ୍ଡ ସୀମାନ୍ତ କୋହ୍ଲାଣ ଜଙ୍ଗଲରେ ନକ୍ସଲ ଶିବିରମାନ କରୁଛନ୍ତି। ଆଗାମୀ ଦିନରେ ଏସବୁ ଅଞ୍ଚଳରେ ନକ୍ସଲ ଅଭିଯାନକୁ ଜୋରଦାର କରାଯିବ ବୋଲି ସେ କହିଛନ୍ତି।
ସୂଚନାଯୋଗ୍ୟ, ପୂର୍ବରୁ କୋହ୍ଲାଣ ଜଙ୍ଗଲରେ ନକ୍ସଲ ଓ ଯବାନଙ୍କ ମଧ୍ୟରେ ଗୁଳିବିନିମୟରେ ଓଡ଼ିଆ ଯବାନ ସହିଦ ହୋଇଥିଲେ। ଆଇଇଡି ବିସ୍ଫୋରଣରେ ଝାଡ଼ଖଣ୍ଡର ଜାଗୁଆର ଦୁଇ ଯବାନ ମଧ୍ୟ ସହିଦ ହୋଇଥିଲେ।