ଆସିକା ପ୍ରାଣୀ ଚିକିତ୍ସା ଅଧିକାରୀ ଗିରଫ, ୯ ହଜାର ଲାଞ୍ଚ ନେଇ ଧରାପଡ଼ିଲେ
ଆସିକା : ଗଞ୍ଜାମ ଜିଲ୍ଲା ଆସିକା ବ୍ଲକ୍ ପ୍ରାଣୀ ଚିକିତ୍ସା ଅଧିକାରୀଙ୍କ କାର୍ଯ୍ୟାଳୟରେ ଶୁକ୍ରବାର ଦିନ ଭିଜିଲାନ୍ସ ଟିମ୍ ଚଢ଼ାଉ କରିଛନ୍ତି। ଭ୍ରାମ୍ୟମାଣ ପ୍ରାଣୀ ଚିକିତ୍ସା ପାଇଁ ବ୍ୟବହୃତ ବୋଲେରୋ ଗାଡ଼ି ମାଲିକଙ୍କଠାରୁ ୯ ହଜାର ଟଙ୍କା ଲାଞ୍ଚ ନେଉଥିବା ବେଳେ ଚିକିତ୍ସାଧିକାରୀ ଡା. ରବିନାରାୟଣ ସାହୁଙ୍କୁ ଧରିଛନ୍ତି। ଏ ନେଇ ବ୍ରହ୍ମପୁର ଭିଜିଲାନ୍ସ ବିଭାଗ କେସ୍ ନମ୍ବର ୭/୨୩ରେ ଏକ ମାମଲା ରୁଜୁ କରିଛି।
Sambad is now on WhatsApp
Join and get latest news updates delivered to you via WhatsApp
ଚିକିତ୍ସା ଅଧିକାରୀ ଡା. ସାହୁ ୨୦୨୩-୨୪ ବର୍ଷ ନିମନ୍ତେ ବୋଲେରୋ ଗାଡ଼ି ଚୁକ୍ତିର ନବୀକରଣ ପାଇଁ ଗାଡ଼ି ମାଲିକଙ୍କୁ ୧୦ହଜାର ଟଙ୍କା ଲାଞ୍ଚ ମାଗିଥିଲେ। ତେବେ,ଏହି ଟଙ୍କା ନମିଳିବାରୁ ସେ ଏ ସମ୍ପର୍କିତ କାଗଜପତ୍ର ମୁଖ୍ୟ ପ୍ରାଣୀ ଚିକିତ୍ସା ଅଧିକାରୀଙ୍କ କାର୍ଯ୍ୟାଳୟକୁ ପଠାଇ ନଥିଲେ।
ଏ ନେଇ ଗାଡ଼ି ମାଲିକ ବ୍ରହ୍ମପୁର ଭିଜିଲାନ୍ସ ନିକଟରେ ଅଭିଯୋଗ କରିଥିଲେ। ଆଜି ଅପରାହ୍ନରେ ଗାଡ଼ି ମାଲିକ ଲାଞ୍ଚ ବାବଦ ଟଙ୍କା ନେଇ ବ୍ଲକ୍ ପ୍ରାଣୀ ଚିକିତ୍ସା ଅଧିକାରୀଙ୍କ କାର୍ଯ୍ୟାଳୟକୁ ଯାଇଥିଲେ। ଡା. ସାହୁଙ୍କୁ ସେ ଲାଞ୍ଚ ଟଙ୍କା ଦେଇସାରିବା ପରେ ପୂର୍ବ ଯୋଜନା ଅନୁଯାୟୀ ଭିଜିଲାନ୍ସ ଟିମ୍ ସେଠାରେ ଚଢ଼ଉ କରିଥିଲେ। ଭିଜିଲାନ୍ସ ଟିମ୍ ଲାଞ୍ଚ ବାବଦ ୯ହଜାର ଟଙ୍କା ଜବତ କରିବା ସହିତ ଡା.ସାହୁଙ୍କୁ ଗିରଫ କରିଛନ୍ତି। ଏହାପରେ ଭିଜିଲାନ୍ସ ଟିମ୍ ଡା.ସାହୁଙ୍କ ଅଫିସ୍ ଚାମ୍ବର ଓ ଘର ସମେତ ୩ଟି ସ୍ଥାନରେ ଯାଞ୍ଚ କରୁଥିବା ସୂଚନା ମିଳିଛି।