ଭୁବନେଶ୍ୱର: ଦେଶରେ ପ୍ରଥମ ଥର ପାଇଁ ମାଲବାହୀ ୱାଗନ ଲୁହା ବଦଳରେ ଆଲୁମିନିୟମରୁ ନିର୍ମିତ ହୋଇଛି | ଆଉ ଆଜି ଭୁବନେଶ୍ୱର ରେଳ ଷ୍ଟେସନରୁ କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ପତାକା ଦେଖାଇ ଏହାର ଶୁଭାରମ୍ଭ କରିଛନ୍ତି । ଆରଡ଼ିଏସଓ, ବିଏସସିଓ ଓ ହିଣ୍ଡାଲକୋ ସହାୟତାରେ ଏହି ୱାଗନ ପ୍ରସ୍ତୁତ କରାଯାଇଛି | ମେକ୍ ଇନ୍ ଇଣ୍ଡିଆ ଅଧୀନରେ ଏହି ୱାଗନକୁ ପ୍ରସ୍ତୁତ କରାଯାଇଥିବାବେଳେ ଏହି ୱାଗନ ପୂର୍ବ ଅପେକ୍ଷା ହାଲୁକା କିନ୍ତୁ ଅଧିକ ମାଲ ପରିବହନ କରିବାର କ୍ଷମତା ରଖିଛି ।
Sambad is now on WhatsApp
Join and get latest news updates delivered to you via WhatsApp
ରେଳ ମନ୍ତ୍ରାଳୟ ପକ୍ଷରୁ କୁହାଯାଇଛି ଯେ ଏହି ଆଲୁମିନିୟମ ୱାଗନ ବର୍ତ୍ତମାନର ଷ୍ଟିଲ୍ ୱାଗନ ତୁଳନାରେ ୩.୨୫ ଟନ୍ ହାଲୁକା ହୋଇଥିବାବେଳେ ସମାନ ଦୂରତା ପାଇଁ ଟ୍ରେନର ଗତି ବଢ଼ାଇଥାଏ ଏବଂ କମ୍ ବିଦ୍ୟୁତ୍ ବ୍ୟବହାର ହୋଇଥାଏ | ସେହିପରି ବଡ କଥା ହେଉଛି ଯେ ଏହି ୱାଗନ ୧୮୦ ଟନ୍ ଅତିରିକ୍ତ ପେଲୋଡ୍ ବହନ କରିପାରିବ ଏବଂ ଏହାର ରକ୍ଷଣାବେକ୍ଷଣ ମୂଲ୍ୟ କମ୍ ରହିବ | ରେଳବାଇ କହିଛି ଯେ ନୂତନ ୱାଗନର ୮୦ ପ୍ରତିଶତ ପୁନଃ ବିକ୍ରୟ ମୂଲ୍ୟ ରହିଛି ଏବଂ ସାଧାରଣ ୱାଗନଠାରୁ ୧୦ ବର୍ଷ ଅଧିକ ସମୟ ଏହା ସୁରକ୍ଷିତ ରହିପାରିବ କାରଣ ଏଥିରେ କଳଙ୍କି ଲାଗିବ ନାହିଁ | ତଥାପି ଏହାର ନିର୍ମାଣ ମୂଲ୍ୟ ୩୫ ପ୍ରତିଶତ ଅଧିକ ରହିଛି |
ଆଲୁମିନିୟମ ୱାଗନର ବିଶେଷତ୍ୱ
ସାଧାରଣ ଷ୍ଟିଲ୍ ୱାଗନ ଅପେକ୍ଷା ଏଗୁଡ଼ିକ ୩.୨୫ ଟନ୍ ହାଲୁକା |
୧୮୦ ଟନ୍ ଅତିରିକ୍ତ ଭାର ବହନ କରିପାରିବ |
ଆଲୁମିନିୟମ୍ ୱାଗନ ଇନ୍ଧନ ସଞ୍ଚୟ କରିବ |
ଏହାଦ୍ୱାରା ଅଙ୍ଗାରକାମ୍ଳ ନିର୍ଗମନ ମଧ୍ୟ ହ୍ରାସ ପାଇବ |
ଆଲୁମିନିୟମ୍ ୱାଗନର ପୁନଃ ବିକ୍ରୟ ମୂଲ୍ୟ ହେଉଛି ୮୦ ପ୍ରତିଶତ |
ସାଧାରଣ ୱାଗନଠାରୁ ଆଲୁମିନିୟମ୍ ୱାଗନର ଜୀବନକାଳ ମଧ୍ୟ ୧୦ ବର୍ଷ ଅଧିକ, ଯାହାର ରକ୍ଷଣାବେକ୍ଷଣ ମୂଲ୍ୟ ମଧ୍ୟ କମ୍ | କାରଣ ଏଥିରେ କଳଙ୍କି ଲାଗିବାର ଭୟ ନଥାଏ |