ନାବାଳିକାଙ୍କୁ ଯୌନ ନିର୍ଯାତନା ଅଭିଯୋଗ: ୟେଦୁରପ୍ପାଙ୍କ ବିରୋଧରେ ମାମଲା ରୁଜୁ
ତଦନ୍ତ ପରେ ହିଁ ବୟାନ ଦେବୁ: କର୍ଣ୍ଣାଟକ ଗୃହମନ୍ତ୍ରୀ
ବେଙ୍ଗାଲୁରୁ: ଜଣେ ୧୭ ବର୍ଷୀୟା ନାବାଳିକାଙ୍କ ମା’ଙ୍କ ଅଭିଯୋଗ ଆଧାରରେ ବିଜେପି ନେତା ତଥା କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ବିଏସ୍ ୟେଦୁରପ୍ପାଙ୍କ ବିରୋଧରେ ପୋକ୍ସୋ ଆଇନ ଅନୁଯାୟୀ ମାମଲା ରୁଜୁ କରାଯାଇଛି। ଅଭିଯୋଗ ଅନୁସାରେ, ୟେଦୁରପ୍ପା ଫେବ୍ରୁଆରି ୨ରେ ତାଙ୍କ ଝିଅକୁ ଯୌନ ନିର୍ଯାତନା ଦେଇଥିଲେ। ସଦାଶିବନଗର ପୁଲିସର ସୂଚନା ଅନୁଯାୟୀ, ବିଜେପି ନେତାଙ୍କ ବିରୋଧରେ ଯୌନ ଅପରାଧରୁ ଶିଶୁ ସୁରକ୍ଷା (ପୋକ୍ସୋ) ଆଇନର ଧାରା ୮ ଏବଂ ଭାରତୀୟ ପିଙ୍ଗଳ କୋଡ୍ (ଆଇପିସି)ର ଧାରା ୩୫୪ଏ ଅନୁଯାୟୀ ମାମଲା ରୁଜୁ କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ପୁଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ନାବାଳିକାଙ୍କ ମା’ ଅତୀତରେ ତତ୍କାଳୀନ ବେଙ୍ଗାଲୁରୁ ପୁଲିସ କମିସନର ଆଲୋକ କୁମାର ଓ ତାଙ୍କ କର୍ମଚାରୀଙ୍କ ସମେତ ବିଭିନ୍ନ ବ୍ୟକ୍ତିଙ୍କ ବିରୋଧରେ ତାଙ୍କୁ ମାଡ଼ ମାରିବା ଓ ଗାଳିଗୁଲଜ କରିବା ନେଇ ୫୦ରୁ ଅଧିକ ଅଭିଯୋଗ କରିଥିଲେ। ୨୦୨୧ ଜାନୁଆରି ୨୯ ଓ ପରେ ସେପ୍ଟେମ୍ବର ୨୧, ୨୦୨୨ରେ ସେ କୁମାରଙ୍କ ବିରୋଧରେ ଦୁଇଥର ଅଭିଯୋଗ କରିଥିଲେ ଏବଂ ୨୦୨୨ ଜାନୁଆରି ୧୮ରେ ବେଙ୍ଗାଲୁରୁର ଅବସରପ୍ରାପ୍ତ ପୁଲିସ କମିସନର ତଥା ବିଜେପି ନେତା ଭାସ୍କର ରାଓଙ୍କ ବିରୋଧରେ ତାଙ୍କ ଜୀବନ ନଷ୍ଟ କରିବାକୁ ଷଡ଼ଯନ୍ତ୍ର କରିଥିବା ଅଭିଯୋଗ ଆଣିଥିଲେ। ୟେଦୁରପ୍ପାଙ୍କୁ ତାଙ୍କ ମା’ଙ୍କ ସହ ତାଙ୍କ ବାସଭବନରେ ଭେଟିବାକୁ ଯାଇଥିବା ବେଳେ ନାବାଳିକା ଜଣକ ଉଠାଇଥିବା ଦୁଇଟି ଭିଡିଓ ମଧ୍ୟ ସାମ୍ନାକୁ ଆସିଛି। ଗୋଟିଏ ଭିଡିଓରେ ଝିଅର ମା’ ୟେଦୁରପ୍ପାଙ୍କୁ ‘ଆପ୍ପା ଜୀ’ ବୋଲି ସମ୍ବୋଧନ କରିବା ସହ ସେ ବିଜେପି ନେତାଙ୍କ ନିଜ ଜିଲ୍ଲା ଶିବମୋଗାର ବାସିନ୍ଦା ବୋଲି କହୁଥିବା ଦେଖିବାକୁ ମିଳିଛି। ତାଙ୍କ ପାଖରେ କୋଟି କୋଟି ଟଙ୍କାର ସମ୍ପତ୍ତି ଅଛି ଏବଂ ସେଗୁଡ଼ିକ ବିବାଦ (ଲିଟିଗେସନ)ରେ ଜଡ଼ିତ ବୋଲି କହି ତାଙ୍କ ସହାୟତା ଲୋଡ଼ିଥିଲେ। ଦ୍ୱିତୀୟ ଭିଡିଓରେ ଦେଖିବାକୁ ମିଳିଛି ଯେ ଝିଅର ମା’ ୟେଦୁରପ୍ପାଙ୍କ ଘରେ ତାଙ୍କ ହାତ ଧରି ତାଙ୍କ ପାଖରେ ବସିଛନ୍ତି।
ଏହା ଉପରେ ପ୍ରତିକ୍ରିୟା ରଖି ୟେଦୁରପ୍ପା କହିଛନ୍ତି ଯେ ମହିଳା ଜଣକ ତାଙ୍କୁ ଭେଟିବାକୁ ଚେଷ୍ଟା କରୁଥିଲେ କିନ୍ତୁ ତାଙ୍କୁ ତାଙ୍କ ଘରକୁ ପ୍ରବେଶ କରିବାକୁ ଅନୁମତି ଦିଆଯାଇ ନ ଥିଲା। ଥରେ ସେ କାନ୍ଦୁଥିବା ବେଳେ ମୁଁ ତାଙ୍କୁ ମୋ ଘର ଭିତରକୁ ଡାକି ପୁଲିସ କମିସନର ବି ଦୟାନନ୍ଦଙ୍କ ସହ କଥା ହୋଇ କହିଥିଲି ଯେ ତାଙ୍କ ସହ କିଛି ଅନ୍ୟାୟ ହୋଇଛି। କିନ୍ତୁ ଯେତେବେଳେ ସେ ମୋ ସାମ୍ନାରେ ମୋ ବିରୋଧରେ କିଛି କହିବା ଆରମ୍ଭ କଲେ, ମୁଁ ବୁଝିଲି ଯେ ଏ ମହିଳା ଠିକ୍ ନୁହନ୍ତି। ପୁଲିସ କମିସନରଙ୍କୁ ଭେଟିବା ପରେ ତାଙ୍କ ବିରୋଧରେ ଷଡ଼୍ଯନ୍ତ୍ରପୂର୍ଣ୍ଣ ଅଭିଯୋଗ ଅଣାଯାଇଛି ବୋଲି ୟେଦୁରପ୍ପା କହିଛନ୍ତି। କର୍ଣ୍ଣାଟକର ଗୃହମନ୍ତ୍ରୀ ଜି ପରମେଶ୍ୱର କହିଛନ୍ତି, ତଦନ୍ତ ଶେଷ ନ ହେବା ପର୍ଯ୍ୟନ୍ତ ଆମେ କିଛି କହିପାରିବୁ ନାହିଁ। ଜଣେ ମହିଳା ଅଭିଯୋଗ କରିଥିବାରୁ ଆମକୁ ସତର୍କତାର ସହ ବୟାନ ଦେବାକୁ ପଡ଼ିବ। ମହିଳା ଜଣକ ଜଣେ ମାନସିକ ରୋଗୀ ବୋଲି ମଧ୍ୟ ଅନେକ ମତ ଦେଇଛନ୍ତି ବୋଲି ଗୃହମନ୍ତ୍ରୀ କହିଛନ୍ତି।