ଦୁଷ୍କର୍ମ ଶିକାର ଛାତ୍ରୀଙ୍କ ବଳପୂର୍ବକ ଗର୍ଭପାତ!
ଡାକ୍ତରଖାନାରେ ମୃତ୍ୟୁ ସହ ଲଢ଼ୁଛନ୍ତି ପୀଡ଼ିତା, ଅଭିଯୁକ୍ତ ଯୁବକ ଓ ବାପା, ମା’ ଥାନାରେ ଅଟକ
ବେତନଟୀ : ବାରମ୍ବାର ଦୁଷ୍କର୍ମର ଶିକାର ହୋଇ ଜଣେ ଅଷ୍ଟମ ଶ୍ରେଣୀ ଛାତ୍ରୀ ୬ ମାସର ଗର୍ଭବତୀ ହେବା ପରେ ବଳପୂର୍ବକ ଔଷଧ ଖୁଆଇ ତାଙ୍କର ଗର୍ଭପାତ କରାଇ ଦେଇଛି ଅଭିଯୁକ୍ତ ଯୁବକ। ଏହି ଜଘନ୍ୟ କାଣ୍ଡରେ ସହଯୋଗ କରିଛନ୍ତି ଅଭିଯୁକ୍ତର ବାପା, ମା। ପୀଡ଼ିତା ନାବାଳିକା ଏବେ ସଙ୍କଟାପନ୍ନ ଅବସ୍ଥାରେ ଚିକିତ୍ସିତ ହେଉଥିବା ବେଳେ ତାଙ୍କ ମା ଏ ସଂକ୍ରାନ୍ତରେ ଥାନାରେ ଏତଲା ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ମୟୂରଭଞ୍ଜ ଜିଲ୍ଲା ବୈଶିଙ୍ଗା ଅଞ୍ଚଳର ଏହି ପୀଡ଼ିତା ନାବାଳିକା (୧୩)ଙ୍କୁ ବିଭିନ୍ନ ପ୍ରଲୋଭନ ଦେଖାଇ ଅଭିଯୁକ୍ତ ଯୁବକ ବାରମ୍ବାର ଦୁଷ୍କର୍ମ କରିଥିଲେ। ଦୁଷ୍କର୍ମ ବେଳର ଭିଡିଓକୁ ନିଜ ମୋବାଇଲ୍ରେ କୌଶଳକ୍ରମେ ଉଠାଇ ରଖିଥିଲା। ନାବାଳିକା ଜଣକ ୬ ମାସର ଅନ୍ତଃସତ୍ତ୍ବା ଥିବା ଜାଣିବା ପରେ ତାଙ୍କ ଗର୍ଭନଷ୍ଟ କରିବାକୁ ଯୋଜନା କରିଥିଲା ଅଭିଯୁକ୍ତ। ପୀଡ଼ିତାଙ୍କୁ ନିଜ ଘରକୁ ଡାକି ବାପାମା’ଙ୍କ ସହଯୋଗରେ ବଳପୂର୍ବକ ଏକ ଔଷଧ ଖୁଆଇ ଦେଇଥିଲା। ସେଠାରୁ ନିଜ ଘରକୁ ଫେରିବା ପରେ ପୀଡ଼ିତାଙ୍କ ସ୍ୱାସ୍ଥ୍ୟାବସ୍ଥା ବିଗିଡ଼ି ଯାଇଥିଲା। ପରିବାର ଲୋକ ଝିଅକୁ ପ୍ରଥମେ ବାଲେଶ୍ୱର ମୁଖ୍ୟ ଚିକିତ୍ସାଳୟ ଓ ପରେ ଏକ ଘରୋଇ ଡାକ୍ତରଖାନାରେ ଭର୍ତ୍ତି କରିଥିଲେ। ପରୀକ୍ଷା ପରେ ପେଟରେ ଥିବା ପିଲାଟି ମରିଯାଇଥିବା ଜଣାପଡ଼ିଥିଲା। ପୀଡ଼ିତାଙ୍କ ଜୀବନ ବଞ୍ଚାଇବା ପାଇଁ ମୃତ ପିଲାଟିକୁ ଅସ୍ତ୍ରୋପଚାର କରି ବାହାର କରାଯାଇଛି। ତେବେ ପୀଡ଼ିତା ନାବାଳିକା ଜଣକ ସଙ୍କଟାପନ୍ନ ଅବସ୍ଥାରେ ଏବେ ବି ଡାକ୍ତରଖାନାରେ ମୃତ୍ୟୁ ସହ ସଂଗ୍ରାମ କରୁଛନ୍ତି।
ବୈଶିଙ୍ଗା ପୁଲିସ ପୋକ୍ସୋ ଆକ୍ଟରେ ମାମଲା ରୁଜୁ କରି ଅଭିଯୁକ୍ତ ଓ ତାର ବାପା ଓ ମାଙ୍କୁ ଥାନାରେ ଅଟକ ରଖି ତଦନ୍ତ ଚଳାଇଛି।