ନୂଆଦିଲ୍ଲୀ : ଭାରତୀୟ ରେଳବାଇର ୱାର୍କସପ୍, ପ୍ରଡକ୍ସନ ୟୁନିଟ ଏବଂ ଗୋଦାମ ଗୁଡ଼ିକରେ ଏବେ ଡିଜୋଲଭଡ ଏସିଟିଲିନ୍, ଏଲପିଜି, ବିଏମସିଜି, ଫର୍ଣ୍ଣେସ ଅଏଲ୍, ହାଇସ୍ପିଡ୍ ଡିଜେଲ ପରିବର୍ତ୍ତେ ପରିବେଶ ଅନୁକୂଳ ପ୍ରାକୃତିକ ଗ୍ୟାସ୍ ବ୍ୟବହାର କରାଯିବ । ଏଥିପାଇଁ ନୂଆଦିଲ୍ଲୀସ୍ଥିତ ରେଲ ଭବନରେ ଆଜି ଭାରତୀୟ ରେଳବାଇ ଓ ଗେଲ୍ ଇଣ୍ଡିଆ ଲିମିଟେଡ ମଧ୍ୟରେ ଏକ ଚୁକ୍ତିନାମା ସ୍ୱାକ୍ଷର ହୋଇଛି । ପ୍ରାକୃତିକ ଗ୍ୟାସ୍ ବ୍ୟବହାର ଲାଗି ମୌଳିକ ଭତ୍ତିଭୂମି ସୁବିଧା ଗେଲ୍ ଯୋଗାଇ ଦେବ ।
Sambad is now on WhatsApp
Join and get latest news updates delivered to you via WhatsApp
ଚୁକ୍ତିନାମାରେ ଭାରତୀୟ ରେଳବାଇ ପକ୍ଷରୁ ଇଣ୍ଡିଆନ ରେଲୱେ ଅର୍ଗାନାଇଜେସନ ଫର ଅଲଟରନେଟ ଫୁଏଲ୍ସର ଚେତରାମ ଏବଂ ଗେଲ୍ ଇଣ୍ଡିଆ ପକ୍ଷରୁ ନିର୍ଦ୍ଦେଶକ (ମାର୍କେଟିଙ୍ଗ) ଗଜେନ୍ଦ୍ର ସିଂ ସ୍ୱାକ୍ଷର କରିଥିଲେ ।
ଭାରତୀୟ ରେଳବାଇକୁ ଉଭୟ ଔଦ୍ୟୋଗିକ ଓ ଘରୋଇ ବ୍ୟବହାର ପାଇଁ ସିଏନଜି/ଏଲ୍ଏନଜି/ପିଏନଜି ଯୋଗାଣ ସହ ଏଥି ସକାଶେ ମୌଳିକ ଭିତ୍ତିଭୂମି ଗେଲ୍ ପ୍ରସ୍ତୁତ କରିବ । ରେଲୱେରେ ଥିବା ମୋଟ ୫୪ଟି ୱାର୍କସପ୍ ମଧ୍ୟରୁ ପ୍ରଥମ ପର୍ଯ୍ୟାୟରେ ୨୩ଟିରେ ଔଦ୍ୟୋଗିକ ଗ୍ୟାସ୍ ପରିବର୍ତ୍ତେ ପ୍ରାକୃତିକ ଗ୍ୟାସ୍ ବ୍ୟବହାର ପାଇଁ ଚିହ୍ନଟ କରାଯାଇଛି । ଘରୋଇ ବ୍ୟବହାର ପାଇଁ ଭୁବନେଶ୍ୱରର ରେଲୱେ କଲୋନିରେ ପ୍ରାୟ ୧୧୦୦ ଘରକୁ ଡି-ପିଏନଜି ଯୋଗାଣ ହେଉଛି ।
ରେଳବାଇରେ ବାର୍ଷିକ ବ୍ୟବହାର ହେଉଥିବା ପ୍ରାୟ ୮୪୪୦୨୭ କ୍ୟୁବିକ୍ ମିଟର ଏସିଟିଲିନ୍, ୨୩୫୪୪୨୫ କି.ଗ୍ରା. ଏଲପିଜି, ୧୪୦୯୯୧ କି.ଗ୍ରା. ବିଏମସିଜି, ୫୫୦୦ କିଲୋଲିଟର ଏଚଏସଡି/ଫର୍ଣ୍ଣେସ୍ ଅଏଲ୍ (ମୋଟ ୭୦ କୋଟି ଟଙ୍କା) ବଦଳରେ ପ୍ରାକୃତିକ ଗ୍ୟାସ୍ ବ୍ୟବହାର କରାଯିବାର ପ୍ରସ୍ତାବ ରହିଛି । ପ୍ରାକୃତିକ ଗ୍ୟାସ୍ ବ୍ୟବହାର ଦ୍ୱାରା ରେଳବାଇର ବାର୍ଷିକ ୨୦ କୋଟି ଟଙ୍କା ସଂଚୟ ହୋଇପାରିବ ।