ମୋଦୀଙ୍କୁ ଗୁହାରି କଲେ ଦେବୋଲିନା, ସାଙ୍ଗର ହତ୍ୟାକାରୀ ବିରୋଧରେ କାର୍ଯ୍ୟାନୁଷ୍ଠାନ ପାଇଁ କଲେ ଅନୁରୋଧ
ନୂଆଦିଲ୍ଲୀ: ଜଣାଶୁଣା ଟିଭି ଅଭିନେତ୍ରୀ ଦେବୋଲିନା ଅନେକ ସମୟରେ ନିଜ ଟିଭି ଶୋ, ବ୍ୟକ୍ତିଗତ ଜୀବନ ଏବଂ ଭାଇରାଲ୍ ଫଟୋ ପାଇଁ ଚର୍ଚ୍ଚାରେ ରହିଥା’ନ୍ତି | ତେବେ ବର୍ତ୍ତମାନ ଅଭିନେତ୍ରୀ ଆମେରିକାରେ ତାଙ୍କ ବନ୍ଧୁ ତଥା ନୃତ୍ୟଶିଳ୍ପୀ ଅମରନାଥ ଘୋଷଙ୍କ ହତ୍ୟା ବିଷୟରେ ସୂଚନା ଦେଇଛନ୍ତି | ଏହା ସହ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ବୈଦେଶିକ ମନ୍ତ୍ରୀଙ୍କ ସହାୟତା ଲୋଡିଛନ୍ତି। ବାସ୍ତବରେ, ଦେବୋଲିନା ଶୁକ୍ରବାର ଦିନ ତାଙ୍କ ଟ୍ୱିଟର ଆକାଉଣ୍ଟରେ ଏକ ପୋଷ୍ଟ ସେୟାର କରିଛନ୍ତି। ଏଥିରେ ସେ ମଙ୍ଗଳବାର ସନ୍ଧ୍ୟାରେ ଆମେରିକାରେ ଗୁଳିକାଣ୍ଡରେ ପ୍ରାଣ ହରାଇଥିବା କୋଲକାତାର ବନ୍ଧୁଙ୍କ ହତ୍ୟା ବିଷୟରେ କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଅଭିନେତ୍ରୀ ପୋଷ୍ଟ କରି ଲେଖିଛନ୍ତି, ମୋର ବନ୍ଧୁ ଅମରନାଥ ଘୋଷଙ୍କୁ ମଙ୍ଗଳବାର ସନ୍ଧ୍ୟାରେ ଆମେରିକାର ସେଣ୍ଟ ଲୁଇ ଏକାଡେମୀ ନିକଟରେ ଗୁଳି ଚଳାଇ ହତ୍ୟା କରାଯାଇଥିଲା । ପରିବାରର ସେ ଏକମାତ୍ର ସନ୍ତାନ ଥିଲେ ଓ ତିନି ବର୍ଷ ପୂର୍ବେ ତାଙ୍କ ମାଙ୍କର ମୃତ୍ୟୁ ହୋଇଥିଲା | ତାଙ୍କ ବାପାଙ୍କର ପିଲାଦିନେ ନୃତ୍ୟୁ ହୋଇଯାଇଥିଲା | ଏବେ ପର୍ଯ୍ୟନ୍ତ ଅଭିଯୁକ୍ତଙ୍କ ବିଷୟରେ ସମ୍ପୂର୍ଣ୍ଣ ସୂଚନା ଜଣା ପଡିନାହିଁ | ତାଙ୍କର କିଛି ବନ୍ଧୁଙ୍କ ବ୍ୟତୀତ ତାଙ୍କ ପାଇଁ ଲଢ଼ିବାକୁ କେହି ନାହାଁନ୍ତି |
ସେ ଜଣେ ଉତ୍କୃଷ୍ଟ ନୃତ୍ୟଶିଳ୍ପୀ ଥିଲେ ଓ ପିଏଚଡି କରୁଥିଲେ | ସନ୍ଧ୍ୟାରେ ଚାଲି ଚାଲି ଯାଉଥିବାବେଳେ ଜଣେ ଅଜ୍ଞାତ ବ୍ୟକ୍ତି ତାଙ୍କୁ ଅନେକ ଥର ଗୁଳି କରି ଫେରାର ହୋଇଯାଇଥିଲେ | ଦୟାକରି ଆମକୁ ସାହାଯ୍ୟ କରନ୍ତୁ | ଅନ୍ତତଃ ପକ୍ଷେ ତାଙ୍କ ହତ୍ୟାକାରୀକୁ ଧରିବା ସହ ହତ୍ୟାକାଣ୍ଡର କାରଣ ଲୋକଲୋଚନକୁ ଆସିବାର ଆବଶ୍ୟକତା ରହିଛି |