ସିଏସକେର ଅବଶିଷ୍ଟ ମ୍ୟାଚରୁ ବାଦ ପଡିଲେ ପାଥିରାନା
ନୂଆଦିଲ୍ଲୀ: ଚେନ୍ନାଇ ସୁପର କିଙ୍ଗ୍ସ ଆଜି ପଞ୍ଜାବ କିଙ୍ଗସ ବିପକ୍ଷରେ ମ୍ୟାଚ ଖେଳୁଛି | ତେବେ ଆଜିର ମ୍ୟାଚରେ ବୋଲର ମାଥିଶା ପାଥିରାନାଙ୍କୁ ଅନ୍ତର୍ଭୁକ୍ତ କରିନଥିବା ବେଳେ ଅନେକ ପ୍ରଶ୍ନ ଉଠିଥିଲା। ବର୍ତ୍ତମାନ ଚେନ୍ନାଇ ସୁପର କିଙ୍ଗ୍ସର ଅଫିସିଆଲ ୱେବସାଇଟରେ ଏକ ବିବୃତ୍ତି ଜାରି କରାଯାଇଛି ଯେଉଁଥିରେ କୁହାଯାଇଛି ଯେ ପାଥିରାନା ପୁରା ସିଜିନରୁ ବାଦ ପଡିଛନ୍ତି | ଚଳିତ ସିଜିନରେ ମାତ୍ର ୬ଟି ମ୍ୟାଚରେ ପାଥିରାନା ୧୩ଟି ୱିକେଟ୍ ନେଇଥିଲେ, କିନ୍ତୁ ଆହତ କାରଣରୁ ସେ ଶ୍ରୀଲଙ୍କାକୁ ଫେରିଯାଇଛନ୍ତି। ଆଉ ଏହା ସିଏସକେ ପାଇଁ ବଡ ଝଟକା ବୋଲି କୁହାଯାଉଛି |
Sambad is now on WhatsApp
Join and get latest news updates delivered to you via WhatsApp
ସିଏସକେ ଏକ ବିବୃତ୍ତି ଜାରି କରି କହିଛି ଯେ ମାଥିଶା ପାଥିରାନାଙ୍କର ଆଘାତ ଲାଗିଛି ଏବଂ ଅଧିକ ଯାଞ୍ଚ ପାଇଁ ଶ୍ରୀଲଙ୍କା ଫେରିଯାଇଛନ୍ତି। ଚେନ୍ନାଇର ସମସ୍ୟା ବଢିଯାଇଛି କାରଣ ତାଙ୍କ ପୂର୍ବରୁ ଦୀପକ ଚହର ମଧ୍ୟ ଆଘାତ ହେତୁ ବାଦ ପଡିଛନ୍ତି । ତାଙ୍କ ବ୍ୟତୀତ ମୁସ୍ତାଫିଜୁର ରହମାନ ବାଂଲାଦେଶର ଆନ୍ତର୍ଜାତୀୟ ସିରିଜ ଯୋଗୁଁ ବାଂଲାଦେଶ ଦଳରେ ଯୋଗ ଦେଇସାରିଛନ୍ତି। ଏଭଳି ପରିସ୍ଥିତିରେ ଚେନ୍ନାଇ ସୁପର କିଙ୍ଗ୍ସର ଦ୍ରୁତ ବୋଲିଂରେ ବହୁତ କମ୍ ବିକଳ୍ପ ବାକି ଅଛି। ଏଯାଏଁ ଚେନ୍ନାଇ ସୁପର କିଙ୍ଗ୍ସ ୧୦ଟି ମ୍ୟାଚ୍ ଖେଳିଛି, ସେଥିମଧ୍ୟରୁ ଦଳ ୫ଟି ଜିତିଛି, କିନ୍ତୁ ୫ଟିରେ ହାରିଛି।