ଓଡ଼ିଶା ଦେଶରେ ତ୍ରୟୋଦଶ ବୃହତ୍ ଅର୍ଥନୀତି
ପ୍ରଥମ ୩ଟି ସ୍ଥାନରେ ମହାରାଷ୍ଟ୍ର, ତାମିଲନାଡ଼ୁ, ଗୁଜରାଟ
ଭୁବନେଶ୍ବର: ଗତ କିଛି ବର୍ଷ ଭିତରେ ଓଡ଼ିଶା ଅର୍ଥନୀତିରେ ଉଲ୍ଲେଖନୀୟ ପ୍ରଗତି ହୋଇଛି। ଫଳରେ ଏହା ଦେଶର ତ୍ରୟୋଦଶ ବୃହତ୍ ଅର୍ଥନୀତି ଭାବେ ଉଭା ହୋଇଛି। ଏକ୍ଷେତ୍ରରେ ପଞ୍ଜାବ ଓ ବିହାରଠାରୁ ଓଡ଼ିଶା ଆଗରେ ରହିଛି। ୨୦୨୨-୨୩ ଆର୍ଥିକ ବର୍ଷରେ ଓଡ଼ିଶାକୁ ଏହି ସଫଳତା ମିଳିଥିବା ରେଟିଂ ଏଜେନ୍ସି ଇଣ୍ଡିଆ ରେଟିଙ୍ଗ୍ସର ଏକ ରିପୋର୍ଟରୁ ଜଣାପଡ଼ିଛି। ରିପୋର୍ଟ ଅନୁଯାୟୀ ୨୦୦୪-୦୫ ଆର୍ଥିକ ବର୍ଷରେ ଓଡ଼ିଶାର ଅର୍ଥନୀତି ଆକାର ୧୮୩୦ କୋଟି ଡଲାର ଥିଲା। ୨୦୧୩-୧୪ ସୁଦ୍ଧା ତାହା ୪୯୦୦ କୋଟି ଡଲାରକୁ ଏବଂ ୨୦୨୨-୨୩ ସୁଦ୍ଧା ୯୩୭୦ କୋଟି ଡଲାରକୁ ବୃଦ୍ଧି ପାଇଛି। ବିହାର, ପଞ୍ଜାବ, ଆସାମ, ଛତିଶଗଡ଼, ଝାଡ଼ଖଣ୍ଡ, ଉତ୍ତରାଖଣ୍ଡ, ହିମାଚଳପ୍ରଦେଶ, ଗୋଆ, ତ୍ରିପୁରା, ସିକିମ୍, ମେଘାଳୟ, ଅରୁଣାଚଳପ୍ରଦେଶ, ମଣିପୁର, ନାଗାଲ୍ୟାଣ୍ଡ ଓ ମିଜୋରାମ୍ଠାରୁ ଓଡ଼ିଶା ଆଗରେ ରହିଛି। ମୁଣ୍ଡପିଛା ଆୟରେ ମଧ୍ୟ ଓଡ଼ିଶା ଉଲ୍ଲେଖନୀୟ ବୃଦ୍ଧି ହାସଲ କରିଛି। ୨୦୦୪-୦୫ ଆର୍ଥିକ ବର୍ଷରେ ଓଡ଼ିଶାର ମୁଣ୍ଡପିଛା ଆୟ ମାତ୍ର ୪୪୩ ଡଲାର ଥିଲା। ସେହି ସମୟରେ ରାଜ୍ୟଗୁଡ଼ିକ ମଧ୍ୟରେ ଓଡ଼ିଶାର ସ୍ଥାନ ୨୩ ଥିଲା। ୨୦୨୨-୨୩ ସୁଦ୍ଧା ରାଜ୍ୟର ମୁଣ୍ଡପିଛା ଆୟ ୧୮୦୭ ଡଲାରକୁ ବୃଦ୍ଧି ପାଇଥିବା ବେଳେ ରାଜ୍ୟଗୁଡ଼ିକ ମଧ୍ୟରେ ଏହାର ସ୍ଥାନ ୧୮କୁ ଉନ୍ନୀତ ହୋଇଛି।
Sambad is now on WhatsApp
Join and get latest news updates delivered to you via WhatsApp
ଦେଶର ସବୁଠୁ ବଡ଼ ଅର୍ଥନୀତି ହେଉଛି ମହାରାଷ୍ଟ୍ର। ଏହାର ଅର୍ଥନୀତି ଆକାର ୨୦୨୨-୨୩ରେ ୪୩,୮୯୦ କୋଟି ଡଲାର ରହିଛି। ଶ୍ରେଷ୍ଠ ୧୦ଟି ବଡ଼ ଅର୍ଥନୀତି ମଧ୍ୟରେ ମହାରାଷ୍ଟ୍ର ପଛକୁ ତାମିଲନାଡ଼ୁ, କର୍ଣ୍ଣାଟକ, ଉତ୍ତରପ୍ରଦେଶ, ଗୁଜରାଟ, ପଶ୍ଚିମବଙ୍ଗ, ରାଜସ୍ଥାନ, ତେଲେଙ୍ଗାନା, ଆନ୍ଧ୍ରପ୍ରଦେଶ ଓ ମଧ୍ୟପ୍ରଦେଶ ରହିଛନ୍ତି। ଓଡ଼ିଶାଠାରୁ ଆଗରେ ଥିବା ଅନ୍ୟ ଦୁଇ ରାଜ୍ୟ ହେଉଛନ୍ତି କେରଳ ଓ ହରିୟାଣା। ଏହି ରିପୋର୍ଟରେ ଆକଳନ କରାଯାଇଛି ଯେ ୨୦୩୨-୩୩ ଆର୍ଥିକ ବର୍ଷ ସୁଦ୍ଧା ମହାରାଷ୍ଟ୍ର, କର୍ଣ୍ଣାଟକ ଓ ଗୁଜରାଟର ଅର୍ଥନୀତି ପ୍ରଥମେ ୧ ଲକ୍ଷ କୋଟି ଡଲାର କ୍ଲବ୍ରେ ପ୍ରବେଶ କରିବ। ୨୦୨୭-୨୮ ସୁଦ୍ଧା ମହାରାଷ୍ଟ୍ର ଏହି ଲକ୍ଷ୍ୟ ହାସଲ କରିନେବ। ଗୁଜରାଟ ୨୦୩୧-୩୨ରେ ଏବଂ କର୍ଣ୍ଣାଟକ ୨୦୩୨-୩୩ ସୁଦ୍ଧା ୧ ଲକ୍ଷ କୋଟି ଡଲାର ଅର୍ଥନୀତିରେ ପରିଣତ ହେବ ବୋଲି ଇଣ୍ଡିଆ ରେଟିଂସ୍ର ପ୍ରମୁଖ ଅର୍ଥନୀତିଜ୍ଞ ସୁନିଲ କୁମାର ସିହ୍ନା କହିଛନ୍ତି। ୨୦୪୬-୪୭ ଆର୍ଥିକ ବର୍ଷ ସୁଦ୍ଧା ଦେଶର ଆଠଟି ରାଜ୍ୟର ଅର୍ଥନୀତି ଏକ ଟ୍ରିଲିଅନ ଡଲାର (୧ ଲକ୍ଷ କୋଟି) ମାଇଲଖୁଣ୍ଟ ହାସଲ କରିବା ସମ୍ଭାବନା ରହିଛି। ଏହି ତାଲିକାରେ ତାମିଲନାଡ଼ୁ, ଉତ୍ତରପ୍ରଦେଶ, ମଧ୍ୟପ୍ରଦେଶ, ତେଲେଙ୍ଗାନା ଓ ଆନ୍ଧ୍ରପ୍ରଦେଶ ନାମ ରହିଛି। ତେବେ ଏହି ଲକ୍ଷ୍ୟ ହାସଲ କରିବା ଲାଗି ରାଜ୍ୟଗୁଡ଼ିକ ଉଚ୍ଚ ଅଭିବୃଦ୍ଧି ହାର ବଜାୟ ରଖିବାକୁ ପଡ଼ିବ ବୋଲି ରିପୋର୍ଟରେ କୁହାଯାଇଛି।