ଆଜିଠୁ ବଦଳିବ ପାଗ: କାଳବୈଶାଖୀ ପ୍ରଭାବରେ ଖସିବ ତାପମାତ୍ରା
ଭୁବନେଶ୍ବର: ସୋମବାରଠାରୁ ପାଗରେ ପରିବର୍ତ୍ତନ ଆସିବ। ମୟୂରଭଞ୍ଜ, ବାଲେଶ୍ବର, ଭଦ୍ରକ, ଗଞ୍ଜାମ, ଗଜପତି, କନ୍ଧମାଳ ଜିଲ୍ଲାରେ କାଳବୈଶାଖୀ ଜନିତ ବର୍ଷା ସହ ସ୍ଥାନେ ସ୍ଥାନେ ଘଣ୍ଟା ପ୍ରତି ୩୦ରୁ ୪୦ କିଲୋମିଟର ବେଗରେ ପବନ ବହିପାରେ। ମେ ୭ରେ ପୁରୀ, ଖୋର୍ଦ୍ଧା, ନୟାଗଡ଼, ଗଞ୍ଜାମ, ଗଜପତି, କଟକ, ଯାଜପୁର, ଢେଙ୍କାନାଳ, କେନ୍ଦୁଝର, ମୟୂରଭଞ୍ଜ, କନ୍ଧମାଳ ଓ କଳାହାଣ୍ଡି ଜିଲ୍ଲାରେ ଘଣ୍ଟା ପ୍ରତି ୪୦ରୁ ୫୦ କିମି ବେଗରେ ପବନ ସହ ବିଜୁଳି ଘଡ଼ଘଡ଼ି ଜନିତ ବର୍ଷା ହୋଇପାରେ। ଏପରିକି ଗଞ୍ଜାମ, କଳାହାଣ୍ଡି, ନବରଙ୍ଗପୁର ଓ କନ୍ଧମାଳ ଜିଲ୍ଲାର ଗୋଟିଏ ଦୁଇଟି ସ୍ଥାନରେ ପ୍ରବଳ ବର୍ଷା(୭ରୁ ୧୧ ସେମି) ହେବାକୁ ଥିବାରୁ ୟେଲୋ ୱାର୍ଣ୍ଣିଂ ଜାରି କରାଯାଇଛି। ବାଲେଶ୍ବର, ଭଦ୍ରକ, କେନ୍ଦ୍ରାପଡ଼ା, ଜଗତ୍ସିଂହପୁର, ଅନୁଗୁଳ, କେରାପୁଟ ଓ ରାୟଗଡ଼ା ଜିଲ୍ଲାରେ ମଧ୍ୟ କାଳବୈଶାଖୀ ପ୍ରଭାବ ରହିବ। ୮ ତାରିଖ ବେଳକୁ କାଳବୈଶାଖୀ ସହ ବର୍ଷା ପ୍ରଭାବ ବଢ଼ିବା ନେଇ ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ପୂର୍ବାନୁମାନ କରାଯାଇଛି।
Sambad is now on WhatsApp
Join and get latest news updates delivered to you via WhatsApp
କାଳବୈଶାଖୀ ପ୍ରଭାବରେ ଖସିବ ତାପମାତ୍ରା
ମତ୍ସ୍ୟଜୀବୀଙ୍କୁ ଉତ୍ତର ଓଡ଼ିଶା ଉପକୂଳ ସମୁଦ୍ର ମନା
୪୦ ଡିଗ୍ରି ଉପରେ ୨୬ ସହର, ଟିଟିଲାଗଡ଼ରେ ୪୫ଂ
ପାଣିପାଗ କେନ୍ଦ୍ର ବୈଜ୍ଞାନିକ ଉମାଶଙ୍କର ଦାସଙ୍କ କହିବାନୁଯାୟୀ କାଳବୈଶାଖୀ ପ୍ରଭାବରେ ଆସନ୍ତାକାଲିଠାରୁ ପାଣିପାଗରେ ପରିବର୍ତ୍ତନ ଆସିବ। ଦିନର ତାପମାତ୍ରା ୪ରୁ ୬ ଡିଗ୍ରି ପର୍ଯ୍ୟନ୍ତ ହ୍ରାସ ପାଇବ। ସମୁଦ୍ର ଆଡ଼ୁ ରାଜ୍ୟ ମଧ୍ୟକୁ ଜଳୀୟବାଷ୍ପ ପୂର୍ଣ୍ଣ ବାୟୁ ପ୍ରବେଶ କରିବାର ସମ୍ଭାବନା ଥିବାରୁ ମେ ୭, ୮ ଓ ୯ ତାରିଖରେ ବର୍ଷା ପରିମାଣ ବଢ଼ିବ। ୬ରୁ ୮ ତାରିଖ ମଧ୍ୟରେ ଉତ୍ତର ଉପକୂଳ ଓଡ଼ିଶା-ପାର୍ଶ୍ୱବର୍ତ୍ତୀ ପଶ୍ଚିମବଙ୍ଗ ଉପକୂଳ ଅଞ୍ଚଳରେ ଘଣ୍ଟାପ୍ରତି ୪୦ରୁ ୫୦ କିମି ବେଗରେ ପବନ ବହିବାର ସମ୍ଭାବନା ରହିଛି। ଏହି ସମୟରେ ସମୁଦ୍ର ଅଶାନ୍ତରୁ ଅତ୍ୟଧିକ ଅଶାନ୍ତ ରହିପାରେ। ତେଣୁ ସମ୍ଭାବ୍ୟ ପରିସ୍ଥିତିକୁ ନଜରରେ ରଖି ୬ରୁ ୮ ତାରିଖ ଯାଏଁ ମତ୍ସ୍ୟଜୀବୀମାନଙ୍କୁ ଉତ୍ତର ଉପକୂଳ ଓଡ଼ିଶାର ସମୁଦ୍ର ଆଖପାଖ ଅଞ୍ଚଳକୁ ସମ୍ପୂର୍ଣ୍ଣ ବାରଣ ହୋଇଛି। ଆସନ୍ତା ୭ ଦିନ ପର୍ଯ୍ୟନ୍ତ କଟକ ଓ ଭୁବନେଶ୍ବର ସହରର ଦିନ ତାପମାତ୍ରା ହ୍ରାସ ପାଇବ। ୯ ତାରିଖ ବେଳକୁ ଉଭୟ ସହରର ପାରଦ ୩୫ ଡିଗ୍ରି ପାଖକୁ ଖସି ଆସିବାର ସମ୍ଭାବନା ରହିଛି।
ଅନ୍ୟପକ୍ଷରେ ଓଡ଼ିଶାରେ ଜାରି ରହିଥିବା ଗ୍ରୀଷ୍ମ ପ୍ରବାହ ଆଜି ୨୧ ଦିନରେ ପହଞ୍ଚିଛି। ଏପ୍ରିଲ ୧୫ରୁ ଆରମ୍ଭ ହୋଇଥିବା ଗ୍ରୀଷ୍ମ ପ୍ରବାହ ଆଜି ବଲାଙ୍ଗୀର, ନୟାଗଡ଼, ନୂଆପଡ଼ା, ଗଞ୍ଜାମ, ମୟୂରଭଞ୍ଜ, କେନ୍ଦୁଝର ଓ ବୌଦ୍ଧ ଜିଲ୍ଲାରେ ଅନୁଭୂତ ହୋଇଛି। ୨୬ଟି ସହରରେ ସର୍ବୋଚ୍ଚ ତାପମାତ୍ରା ୪୦ ଡିଗ୍ରି କିମ୍ବା ଅଧିକ ରେକର୍ଡ ହୋଇଛି। ଟିଟିଲାଗଡ଼ଠାରେ ରାଜ୍ୟର ସର୍ବୋଚ୍ଚ ତାପମାତ୍ରା ୪୫ ଡିଗ୍ରି ରହିଥିଲା। ଏଥିସହ ୧୨ଟି ସହରର ତାପମାତ୍ରା ୪୩ ଡିଗ୍ରି କିମ୍ବା ଅଧିକ ରେକର୍ଡ କରାଯାଇଛି। ଟିଟିଲାଗଡ଼ ବ୍ୟତୀତ ବୌଦ୍ଧରେ ୪୪.୬, ନୂଆପଡ଼ାରେ ୪୪.୪, ବଲାଙ୍ଗୀରରେ ୪୪.୩, ଭବାନୀପାଟଣା ଓ ଝାରସୁଗୁଡ଼ାରେ ୪୪, ବାରିପଦାରେ ୪୩.୮, ସୋନପୁରରେ ୪୩.୫, ସମ୍ବଲପୁରରେ ୪୩.୪, ନୟାଗଡ଼, କେନ୍ଦୁଝର, ସୁନ୍ଦରଗଡ଼ରେ ୪୩ ଡିଗ୍ରି ଲେଖାଏଁ ରହିଥିଲା। ବାରିପଦା ସହରର ତାପମାତ୍ରା ସ୍ବାଭାବିକଠାରୁ ୬ ଡିଗ୍ରି ଅଧିକ ରହିଥିବା ବେଳେ କେନ୍ଦୁଝରରେ ୫.୮ ଡିଗ୍ରି, ଫୁଲବାଣୀରେ ୪.୪, ଭବାନୀପାଟଣାରେ ୩.୨, ବାଲେଶ୍ବରରେ ସ୍ବାଭାବିକଠାରୁ ୩ ଡିଗ୍ରି ଅଧିକ ରେକର୍ଡ ହୋଇଛି।