ଚିତା ମୃତ୍ୟୁ ପ୍ରସଙ୍ଗରେ କେନ୍ଦ୍ର ସରକାରଙ୍କୁ ସୁପ୍ରିମ୍‌ କୋର୍ଟଙ୍କ ନିର୍ଦ୍ଦେଶ: ଏହାକୁ ସମ୍ମାନର ପ୍ରସଙ୍ଗ କରନ୍ତୁ ନାହିଁ

ନୂଆଦିଲ୍ଲୀ: ଦକ୍ଷିଣ ଆଫ୍ରିକା ଓ ନାମିବିଆରୁ ମଧ୍ୟପ୍ରଦେଶର କୁନୋ ଜାତୀୟ ଉଦ୍ୟାନ (କେଏନ୍‌ପି)କୁ ସ୍ଥାନାନ୍ତରିତ ହୋଇଥିବା ଚିତାମାନଙ୍କ ମୃତ୍ୟୁକୁ ନେଇ ସୁପ୍ରିମକୋର୍ଟ ଚିନ୍ତା ପ୍ରକଟ କରିଛନ୍ତି। ଏହାକୁ ଏକ ସମ୍ମାନର ପ୍ରସଙ୍ଗ ନ କରିବା ସହ ଏହାର ସମାଧାନ ପାଇଁ କିଛି ସକାରାତ୍ମକ ପଦକ୍ଷେପ ନେବାକୁ ଶୀର୍ଷ କୋର୍ଟ କେନ୍ଦ୍ରକୁ କହିଛନ୍ତି।
ଗତ ୪ ମାସ ମଧ୍ୟରେ ୩ଟି ଛୁଆଙ୍କ ସମେତ ସମୁଦାୟ ୮ଟି ଚିତାଙ୍କ ମୃତ୍ୟୁ ଘଟିଛି।

ସୁପ୍ରିମକୋର୍ଟର ବିଚାରପତି ଜଷ୍ଟିସ୍‌ ବିଆର୍‌ ଗଭାଇଙ୍କ ଅଧ୍ୟକ୍ଷତାରେ ଗଠିତ ତିନି ଜଣିଆ ଖଣ୍ଡପୀଠ ଅତିରିକ୍ତ ସଲିସିଟର ଜେନେରାଲ ଐଶ୍ୱର୍ଯ୍ୟା ଭାଟିଙ୍କୁ ପଚାରିଥିଲେ, ଗତ ସପ୍ତାହରେ ଆଉ ଦୁଇଟି ଚିତାଙ୍କ ମୃତ୍ୟୁ ଘଟିଛି? କାହିଁକି ଏହା ଏକ ସମ୍ମାନର ପ୍ରସଙ୍ଗ ପାଲଟିଛି? ଦୟାକରି କିଛି ସକାରାତ୍ମକ ପଦକ୍ଷେପ ନିଅନ୍ତୁ। ଏହାସହ ସମସ୍ତଙ୍କୁ ବିସ୍ତାର କରିବା ପରିବର୍ତ୍ତେ ଗୋଟିଏ ସ୍ଥାନରେ କାହିଁକି ରଖାଗଲା? ରାଜସ୍ଥାନକୁ ସୁରକ୍ଷିତ ସ୍ଥାନାନ୍ତର ପାଇଁ ସୁବିଧା ବ୍ୟବସ୍ଥା କରାଯାଇଛି କି ବୋଲି କୋର୍ଟ ପ୍ରଶ୍ନ କରିଛନ୍ତି? ସରକାରଙ୍କ ପକ୍ଷରୁ ହାଜର ହୋଇଥିବା ଏଏସଜି ଖଣ୍ଡପୀଠଙ୍କୁ କହିଥିଲେ, ଏକ ସରକାର ଭାବରେ ଆମେ ଏହି ସମ୍ମାନଜନକ ପ୍ରକଳ୍ପ ପାଇଁ ଯଥାସମ୍ଭବ ଚେଷ୍ଟା କରୁଛୁ।
ଖଣ୍ଡପୀଠ କହିଛନ୍ତି, ବର୍ଷକରୁ କମ୍‌ ସମୟ ମଧ୍ୟରେ ହେଉଥିବା ମୃତ୍ୟୁର ୪୦ ପ୍ରତିଶତ ଭଲ ଚିତ୍ର ଦେଇ ନଥାଏ। ୨୦ ଜଣ ଚିତାଙ୍କ ମଧ୍ୟରୁ ୮ ଜଣଙ୍କ ମୃତ୍ୟୁ ଘଟିଛି।
ଏହା ଆଶାନୁରୂପ ଥିଲା। ସ୍ଥାନାନ୍ତରରେ ୫୦% ମୃତ୍ୟୁ ସ୍ୱାଭାବିକ ବୋଲି ଭାଟି ଉତ୍ତର ଦେଇଛନ୍ତି।

ଏହାପରେ ଜଷ୍ଟିସ ପାର୍ଦିୱାଲା କହିଥିଲେ, ତେବେ ସମସ୍ୟା କ’ଣ? ଆମର ଜଳବାୟୁ କ’ଣ ସେମାନଙ୍କ ପାଇଁ ଅନୁକୂଳ ନୁହେଁ କି? କିଡନି ନା ଶ୍ୱାସଜନିତ ସମସ୍ୟା? ଏହାର ଜବାବରେ ଏଏସଜି ଖଣ୍ଡପୀଠଙ୍କୁ ଅବଗତ କରାଇଥିଲେ ଯେ ସଂକ୍ରମଣ ଯୋଗୁଁ ସେମାନଙ୍କ ମୃତ୍ୟୁ ଘଟୁଛି। ସେ ଖଣ୍ଡପୀଠଙ୍କୁ ଏହା ମଧ୍ୟ କହିଛନ୍ତି ଯେ ପ୍ରତ୍ୟେକ ମୃତ୍ୟୁର ବିସ୍ତୃତ ବିଶ୍ଳେଷଣ ଚାଲିଛି।

ଏବେ ରାଜସ୍ଥାନକୁ ଜଙ୍ଗଲୀ ବିଲେଇ ସ୍ଥାନାନ୍ତର କରିବା ସମେତ ଜବାବ ଦାଖଲ କରିବାକୁ କୋର୍ଟ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେବା ସହ ମାମଲାର ପରବର୍ତ୍ତୀ ଶୁଣାଣି ଅଗଷ୍ଟ ୧ ତାରିଖକୁ ଧାର୍ଯ୍ୟ କରିଛନ୍ତି। ଜାତୀୟ ବ୍ୟାଘ୍ର ସଂରକ୍ଷଣ କର୍ତ୍ତୃପକ୍ଷ (ଏନ୍‌ଟିସିଏ) ୨୦୨୦ରେ ସୁପ୍ରିମ୍‌କୋର୍ଟଙ୍କ ଦ୍ୱାରା ନିଯୁକ୍ତ ବିଶେଷଜ୍ଞ କମିଟିର ପରାମର୍ଶ ନେବା ବାଧ୍ୟତାମୂଳକ ନୁହେଁ ବୋଲି ଅନୁରୋଧ କରି କେନ୍ଦ୍ର ସରକାରଙ୍କ ଆବେଦନର ଶୁଣାଣି କରୁଥିବା ବେଳେ ଏହି ମାମଲା ପ୍ରଥମେ ଉଠିଥିଲା।

ଭାରତରେ ଚିତା

ଗତ ସେପ୍ଟେମ୍ବର ୧୭ ତାରିଖରେ ୫ଜଣ ମାଈ ଓ ୩ ଜଣ ଅଣ୍ଡିରାଙ୍କ ସମେତ ୮ ଜଣ ନାମିବିଆ ଚିତାଙ୍କୁ କେଏନ୍‌ପିରେ ସଙ୍ଗରୋଧ ଗୃହରେ ଛାଡ଼ି ଦିଆଯାଇଥିଲା। ଚଳିତ ବର୍ଷ ଫେବ୍ରୁଆରିରେ ଦକ୍ଷିଣ ଆଫ୍ରିକାରୁ ଆଉ ୧୨ଟି ଚିତା ଆସି କେଏନ୍‌ପିରେ ପହଞ୍ଚିଥିଲେ।

୪ଟି ଛୁଆ ଜନ୍ମ ହେବା ପରେ ସମୁଦାୟ ଚିତା ସଂଖ୍ୟା ୨୪ରେ ପହଞ୍ଚିଥିବା ବେଳେ ୮ଚିତାଙ୍କ ମୃତ୍ୟୁ ପରେ ଏହି ସଂଖ୍ୟା ଏବେ ୧୬କୁ ଖସି ଆସିଛି। ୧୯୫୨ ରେ ଦେଶରୁ ଚିତା ବିଲୁପ୍ତ ହୋଇ ଯାଇଥିବା ଘୋଷଣା କରାଯାଇଥିଲା।