ନୂଆଦିଲ୍ଲୀ : ଲଦାଖସ୍ଥିତ ପ୍ରକୃତ ନିୟନ୍ତ୍ରଣ ରେଖା (ଏଲଏସି) ନିକଟରେ ଗତବର୍ଷଠାରୁ ଭାରତ ଓ ଚୀନ ମଧ୍ୟରେ ଉତ୍ତେଜନା ଦେଖାଯିବା ପରେ ସତର୍କ ହୋଇଉଠିଛି ଭାରତୀୟ ନୌସେନା । ଭାରତ ମହାସାଗରରେ ବୁଲୁଥିବା ଚୀନ ଯୁଦ୍ଧ ଜାହାଜଗୁଡ଼ିକ ଉପରେ କଡ଼ା ନଜର ରଖାଯାଇଛି ବୋଲି କହିଛନ୍ତି ନବନିଯୁକ୍ତ ନୌସେନା ମୁଖ୍ୟ ଆଡମିରାଲ ଆର.ହରି କୁମାର ।
Sambad is now on WhatsApp
Join and get latest news updates delivered to you via WhatsApp
ଦାୟିତ୍ବ ଗ୍ରହଣ କରିବା ପରେ ପ୍ରଥମ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରି ସେ କହିଛନ୍ତି ଯେ ଗତ ବର୍ଷ ଲଦାଖରେ ସଂଘର୍ଷ ହେବା ପରେ ନୌସେନା ସତର୍କ ହୋଇଉଠିଥିଲା । ସ୍ଥିତି ଯଦି ଆହୁରି ଖରାପ ଆଡ଼କୁ ଗତି କରେ ଅର୍ଥାତ ଯୁଦ୍ଧ ଆଡ଼କୁ ଗତି କରେ ସେଥିପାଇଁ ନୌସେନା ପ୍ରସ୍ତୁତ ରହିଥିଲା । ଏହା ସହିତ ଭାରତ ମହାସାଗରରେ ଚୀନର ସବୁ ଗତିବିଧି ଉପରେ ନଜର ରଖାଯାଇଥିଲା । ଏବେ ବି ଭାରତ ମହାସାଗରରେ ମୁତୟନ ଥିବା ଚୀନ ଜାହାଜଗୁଡ଼ିକ ଉପରେ ନଜର ରଖିଛି ଭାରତୀୟ ନୌସେନା ବୋଲି ସେ କହିଛନ୍ତି ।
ସେ କହିଛନ୍ତି ଯେ ଚୀନର ନୌସେନା ୨୦୦୮ରୁ ଭାରତ ମହାସାଗରରେ ଉପସ୍ଥିତ ରହିଛି । ଚୀନର ୩ରୁ ୮ଟି ଯୁଦ୍ଧ ଜାହାଜ ନିୟମିତଭାବେ ଭାରତ ମହାସାଗରରେ ରହୁଛନ୍ତି । ଏଣୁ ଏ ଅଞ୍ଚଳରେ ଭାରତୀୟ ନୌସେନା ବି ନିଜର ଜାହାଜ ସଂଖ୍ୟା ବଢାଇଦେଇଛି । ଚୀନ ପକ୍ଷରୁ ଯେକୌଣସି ଆହ୍ବାନର ମୁକାବିଲା କରିବାକୁ ଭାରତୀୟ ନୌସେନା ପ୍ରସ୍ତୁତ ବୋଲି ସେ କହିଛନ୍ତି ।