ଲଣ୍ଡନ: କରୋନା ଭୂତାଣୁ ମୁକାବିଲା ପାଇଁ ଟୀକାକୁ ସାରା ବିଶ୍ୱ ଅପେକ୍ଷା କରି ରହିଛି । ଏପରି ସମୟରେ ବିଶ୍ୱ ସ୍ୱାସ୍ଥ୍ୟ ସଂଗଠନ – ଡବ୍ଲୁଏଚଓର କରୋନା ଭୂତାଣୁ ଗବେଷଣା ମୁଖ୍ୟ ଡକ୍ଟର ଡେଭିଡ୍ ନାବାରେ କହିଛନ୍ତି କରୋନା ଭୂତାଣୁ ମୁକାବିଲା ପାଇଁ କେବେ ବି କୋଭିଡ୍ ୧୯ ଭାକସିନ୍ ବା ଟୀକା ପ୍ରସ୍ତୁତ ହୋଇ ନପାରେ । ବିଶ୍ୱ ସ୍ୱାସ୍ଥ୍ୟ ସଂଗଠନର ଏହି ନିର୍ଦ୍ଦିଷ୍ଟ ଭୂତାଣୁର ଗବେଷଣା ଟିମର ମୁଖ୍ୟଙ୍କ ମତରେ କୋଭିଡ୍ ୧୯ ଭୂତାଣୁ ସଂକ୍ରମଣକୁ ରୋକିବା ଲାଗି କୌଣସି ଟୀକା ବା ଭାକସିନ୍ ବାହାରି ନ ପାରେ । ଏବେ ସାରାବିଶ୍ୱରେ ୧୦୦ରୁ ଅଧିକ ଟୀକା ବିଭିନ୍ନ ପରୀକ୍ଷାଗାରରେ ପରୀକ୍ଷାମୂଳକ ଅବସ୍ଥାରେ ରହିଛି । କିଛି ଟୀକାକୁ ମନୁଷ୍ୟ ଶରୀରରେ ପରୀକ୍ଷା ବି କରାଯାଇଛି, ମାତ୍ର ଚୂଡ଼ାନ୍ତ ପ୍ରତିଷେଧକ ଟୀକା ବାହାରି ପାରିନାହିଁ।
Sambad is now on WhatsApp
Join and get latest news updates delivered to you via WhatsApp
ଏପରି ଅବସ୍ଥାରେ ବିଶ୍ୱର ଶୀର୍ଷ ସ୍ୱାସ୍ଥ୍ୟ ବିଶେଷଜ୍ଞ ମତ ରଖି କହିଛନ୍ତି, ଯେପରି ଏଚଆଇଭି ଓ ଡେଙ୍ଗୁ ନିରାକରଣ ଲାଗି ବର୍ଷ ବର୍ଷ ଧରି ଗବେଷଣା ପରେ ବି କୌଣସି ନିର୍ଦ୍ଦିଷ୍ଟ ଟୀକା ବାହାରି ପାରିନି, ସେହିପରି କୋଭିଡ୍ ୧୯ ଭୂତାଣୁ ଉପଚାର ପାଇଁ ବି କୌଣସି ଟୀକା ବାହାରି ନ ପାରେ । କିଛି ଭୂତାଣୁର ପ୍ରତିରୋଧ ଲାଗି ବିଶ୍ୱରେ ଏବେ ବି ଟୀକା ବାହାରି ପାରିନି । ଏହାର ପ୍ରତିରୋଧକ ଭାବେ ଆଗକୁ ବି କୌଣସି ସଫଳ ଟୀକା ବାହାରି ପାରିବ ସେ ନେଇ କିଛି ସ୍ପଷ୍ଟ କରି କହିହେବନି । ବିଶ୍ୱ ସ୍ୱାସ୍ଥ୍ୟ ସଂଗଠନର କୋଭିଡ୍ ୧୯ ସ୍ପେଶାଲ ଏନଭୟ ଡକ୍ଟର ଡେଭିଡ୍ ନାବାରୋ ଏପରି ମତ ରଖିଛନ୍ତି । ଗତ ୪ ଦଶନ୍ଧୀରେ ବିଶ୍ୱରେ ଏଚଆଇଭିରେ ୩୨ ମିଲିୟନ ଲୋକଙ୍କ ଜୀବନ ଗଲାଣି ।
ସାରାବିଶ୍ୱ ଏବେ ବି ଏଚଆଇଭି ନିରାକରଣ ଲାଗି ଟୀକା ପ୍ରସ୍ତୁତିକୁ ଅପେକ୍ଷା କରି ରହିଛି । ସମାନ ଅବସ୍ଥା ଡେଙ୍ଗୁ କ୍ଷେତ୍ରରେ ବି ଦେଖାଯାଇଛି । ବିଶ୍ୱ ସ୍ୱାସ୍ଥ୍ୟ ସଂଗଠନର ରିପୋର୍ଟ ଅନୁସାରେ ଏବେ ବି ବାର୍ଷିକ ପ୍ରାୟ ୪ ଲକ୍ଷ ଲୋକ ଡେଙ୍ଗୁର ଶିକାର ହେଉଛନ୍ତି । ଏହି ରୋଗ ଆସିବାର ଦଶନ୍ଧି ପରେ ବି ବୈଜ୍ଞାନିକ ଏହାକୁ ରୋକିବାକୁ ଟୀକା ଉଦ୍ଭାବନରେ ଲାଗିଛନ୍ତି । ବିଶ୍ୱସ୍ୱାସ୍ଥ୍ୟ ସଂଗଠନର ସୂଚନା ଅନୁସାରେ ବର୍ତମାନ ବିଶ୍ୱରେ ୧୦୨ଟି ଟୀକା ପ୍ରସ୍ତୁତି ଚାଲିଛି । ଏହା ମଧ୍ୟରୁ ମାତ୍ର ୮ଟିକୁ ମନୁଷ୍ୟ ଦେହରେ ବ୍ୟବହାର କରାଯାଇଛି । ଏହା ପରୀକ୍ଷଣ ଅବସ୍ଥାରେ ରହିଛି । ଏହା ଯଦି ସଫଳ ହୁଏ ତେବେ ମାନବ ସମାଜ ବଡ ଧରଣର ଉପକୃତ ହେବ ।