ଜୀବନ ବଞ୍ଚାଉ ବଞ୍ଚାଉ ଜୀବିକା ବୁଡ଼ି ନଯାଉ, ଅର୍ଥନୈତିକ କାର୍ଯ୍ୟକ୍ରମକୁ ସାଧାରଣ କରିବାକୁ ସରକାର ପଦକ୍ଷେପ ନେଇଛନ୍ତି : ଏସ୍ଆରସି
ଭୁବନେଶ୍ୱର: ଲକ୍ଡାଉନକୁ ୬ ସପ୍ତାହ ପୂରିଛି । ପ୍ରଥମ ପର୍ଯ୍ୟାୟରେ ଦେଶରେ କୌଣସି ପ୍ରକାରର ଅର୍ଥନୈତିକ କାର୍ଯ୍ୟକ୍ରମ କରାଯାଇ ନଥିଲା । କିନ୍ତୁ ତୃତୀୟ ପର୍ଯ୍ୟାୟରେ ଏହାକୁ ଗୁରୁତ୍ୱ ଦେଇଛନ୍ତି ରାଜ୍ୟ ସରକାର । ଆଜି ଜୀବନ ଓ ଜୀବିକା ୨ଟା ଜିନିଷ ଆମ ପାଇଁ ଗୁରୁତ୍ୱପୂର୍ଣ୍ଣ । କିନ୍ତୁ ଏଥିରେ ସନ୍ତୁଳନ ରହିବା ଦରକାର । ଜୀବନ ବଞ୍ଚାଉ ବଞ୍ଚାଉ ଜୀବିକା ବୁଡ଼ି ନଯିବା ଦରକାର । ଜୀବନ ଯୁଦ୍ଧରେ ଯେପରି ଜୀବିକା ବିପଦଆଡ଼କୁ ଠେଲି ନହୁଏ, ସେଥିପାଇଁ ପଦକ୍ଷେପ ନିଆଯିବା ଆବଶ୍ୟକ । ଅର୍ଥନୈତିକ କାର୍ଯ୍ୟକ୍ରମ ସାଧାରଣ ଅବସ୍ଥାକୁ ଆଣିବା ପାଇଁ ରାଜ୍ୟ ସରକାର ପଦକ୍ଷେପ ନେଇଛନ୍ତି । ସ୍ୱତନ୍ତ୍ର ରିଲିଫ କମିସନର ପ୍ରଦୀପ ଜେନା ଆଜି ରାଜ୍ୟ ସରକାରଙ୍କ ସାମ୍ବାଦିକ ସମ୍ମିଳନୀରେ ଏହା କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ସ୍ଥାନୀୟ ଗୀତଗୋବିନ୍ଦ ସଦନରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଏସଆରସି ଶ୍ରୀ ଜେନା କହିଛନ୍ତି, ଅର୍ଥନୀତି ଓ ଜୀବିକା ମଧ୍ୟରେ ସନ୍ତୁଳନ ପ୍ରତି ଗୁରୁତ୍ୱ ଦିଆଯିବାର ଦରକାର । ଜୀବନ ଯୁଦ୍ଧ ଲଢ଼ୁଲଢ଼ୁ ଯେପରି ଜୀବିକା ନ ହାରିଯାଏ ସେଥିପାଇଁ କାମ କରିବାକୁ ପଡ଼ିବ । ସରକାର ଏ ନେଇ ୨୬ଟି ନିର୍ଦ୍ଦେଶାବଳୀ ଦେଇଛନ୍ତି । କଣ୍ଟେନମେଣ୍ଟ ଜୋନକୁ ଛାଡ଼ିଦେଲେ ଅନ୍ୟ ସ୍ଥାନରେ ଅର୍ଥନୈତିକ କାର୍ଯ୍ୟକଳାପ ଆରମ୍ଭ କରିବା ପାଇଁ ଅନୁମତି ଦିଆଯାଇଛି । ସହରାଞ୍ଚଳରେ ଶିଳ୍ପାନୁଷ୍ଠାନରେ ସାମାନ୍ୟ କଟକଣା କରାଯାଇଛି । କିନ୍ତୁ ଅରେଞ୍ଜ ଓ ଗ୍ରୀନ ଜୋନରେ ସବୁ ପ୍ରକାରର ଆର୍ଥିକ କାର୍ଯ୍ୟକୁ ଅନୁମତି ମିଳିଛି । କୃଷି, ଶିଳ୍ପ ଓ ନିର୍ମାଣ କାମ କରିବାରେ କୌଣସି ଅସୁବିଧା ନାହିଁ ବୋଲି ଶ୍ରୀ ଜେନା କହିଛନ୍ତି ।
ଶ୍ରୀ ଜେନା କହିଛନ୍ତି, ରେଡ ଜୋନର ସହରାଞ୍ଚଳରେ ନିର୍ମାଣ କାମ ଉପରେ କିଛି କଟକଣା ରହିଛି । ଜୀବୀକାକୁ ପୁଣି ଥରେ ସ୍ୱାଭାବିକ କରିବାକୁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି । ଗ୍ରୀନ ଜୋନରେ ବସ ଚଳାଚଳ କରିବା ପାଇଁ ସରକାର ଅନୁମତି ଦେଇଛନ୍ତି । ଶ୍ରମିକମାନଙ୍କ ଯାତାୟତ ସୁବିଧା ପାଇଁ ବସ ଚଳାଚଳକୁ ଅନୁମତି ଦିଆଯାଇଛି । ସେହିଭଳି ଗାଁ ଗାଁରେ ଲାଗିଥିବା ବେରିକେଡକୁ ସିଆରସି ଶ୍ରୀ ଜେନା ବେଆଇନ କହିଛନ୍ତି । ବେରିକେଡ ଲଗାଇ ଶ୍ରମିକଙ୍କ ଗତିପଥ ଉପରେ କଟକଣା ଲଗାଇବା ଉଚିତ ନୁହେଁ ।
ଶ୍ରମିକମାନେ ନିଜ ଜିଲ୍ଲାରୁ ଅନ୍ୟ ଜିଲ୍ଲାକୁ ଯାଇପାରିବେ । ଠିକାଦାରମାନେ ନିଦ୍ଦିଷ୍ଟ ଗାଡ଼ିରେ ଶ୍ରମିକମାନଙ୍କୁ ନେଇପାରିବେ । ସେହିଭଳି ଆବଶ୍ୟକ ପଡ଼ିଲେ ଜିଲ୍ଲାପାଳମାନେ ଶ୍ରମିକଙ୍କ ପାଇଁ ଗାଡ଼ି ଯୋଗାଇ ଦେବେ । ଶ୍ରମିକମାନଙ୍କ ଯିବାଆସିବାରେ ବାଧା ସୃଷ୍ଟି କଲେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ । ଦୁଇ ରାଜ୍ୟର ସହମତିରେ ବାହାର ରାଜ୍ୟରୁ କୁଶଳୀ ଶ୍ରମିକ ଆମ ରାଜ୍ୟକୁ ଅଣାଯାଇପାରିବ । ମନେରଗା ଅଧିକରେ ଦୈନିକ ୭.୫ ଲକ୍ଷ ଶ୍ରମ ଦିବସ ସୃଷ୍ଟି କରାଯାଉଛି । ଆଗାମୀ ଦିନରେ ଏହାକୁ ବଢ଼ାଇବା ପାଇଁ ନିର୍ଦ୍ଦେଶ ହୋଇଛି ବୋଲି କହିଛନ୍ତି ଏସଆରସି ଶ୍ରୀ ଜେନା ।
ଏସଆରସି ଶ୍ରୀ ଜେନା କହିଛନ୍ତି, କୃଷି କାର୍ଯ୍ୟ ପାଇଁ ଶ୍ରମିକମାନେ ନିଜ ଜିଲ୍ଲାର ଅନ୍ୟ ଜିଲ୍ଲାକୁ ଯାଇପାରିବେ । ଖରିଫ ଫସଲ ପାଇଁ ରାଜ୍ୟ ସରକାରଙ୍କ ପାଖରେ ଯଥେଷ୍ଟ ପରିମାଣରେ ସାର, ଔଷଧ, ବିହନ ଓ ମଞ୍ଜି ମହଜୁଦ ଅଛି । ଶ୍ରମିକମାନେ ଗୋଟିଏ ସ୍ଥାନରୁ ଅନ୍ୟତ୍ର ଯିବା ପାଇଁ ଅନୁମତି ଦରକାର ନାହିଁ ।
କୃଷି, ଶିଳ୍ପ ଓ ନିର୍ମାଣ କାମ କରାଯାଇପାରିବ । କିନ୍ତୁ ଏପର୍ଯ୍ୟନ୍ତ ଏହା ସାଧାରଣ ଅବସ୍ଥାକୁ ଆସିପାରି ନାହିଁ । କାରଣ ଶ୍ରମିକମାନେ କାର୍ଯ୍ୟସ୍ଥଳକୁ ଯାଇପାରି ନାହାନ୍ତି । ରାଜ୍ୟ ସରକାର ଗ୍ରୀନ ଜୋନରେ ବସ ଚଳାଚଳକୁ ଅନୁମତି ଦେଇଛନ୍ତି । ଏହା ଦ୍ୱାରା ଶ୍ରମିକମାନେ ଯାତାୟତ କରିପାରିବେ । କୃଷି କାମ ପାଇଁ ଟୋଲଫ୍ରି ନମ୍ବର ୧୮୦୦୧୦୨୫୧୬୬କୁ ଫୋନ କଲେ ଚାଷୀମାନେ ବିଭିନ୍ନ ପ୍ରକାରର ପରାମର୍ଶ ଓ ଉପଦେଶ ପାଇପାରିବେ । ମୁଗ, ବିରି, ଚିନାବାଦମ ଓ ସୂର୍ଯ୍ୟମୁଖୀ ମଞ୍ଜି କିଣିବା ପାଇଁ ରାଜ୍ୟ ସରକାର ପ୍ରସ୍ତୁତି ଆରମ୍ଭ କରିଦେଇଛନ୍ତି । ନାଫେଡ ଓ ଲ୍ୟାମ୍ପ ଜରିଆରେ ଏହା କିଣାଯିବ ।