ଚେନ୍ନାଇ: ଭାରସାମ୍ୟ ହରାଇ ରାସ୍ତା ଉପରେ ଓଲଟି ପଡିଲା ୬୬୬ କୋଟି ଟଙ୍କାର ସୁନାଗହଣା ନେଇଯାଉଥିବା ଟ୍ରକ | ଆଉ ଏବାବଦରେ ସୂଚନା ପାଇବା ପରେ ପୁଲିସ ତ୍ୱରିତ ପଦକ୍ଷେପ ନେଇ ଘଟଣାସ୍ଥଳରେ ପହଁଚିଲା ଆଉ ଲୁଟ ହେବା ଆଗରୁ ସୁନାଗହଣାକୁ ଗନ୍ତବ୍ୟ ସ୍ଥଳ ଅଭିମୁଖେ ପଠାଇଲା | ତାମିଲନାଡୁର ଇରୋଡ ନିକଟ ଚିତ୍ତୋଡରେ ଏଭଳି ଘଟଣା ଘଟିଛି | ମିଳିଥିବା ସୂଚନା ମୁତାବକ ୬୬୬ କୋଟି ଟଙ୍କା ମୂଲ୍ୟର ୮୧୦ କିଲୋଗ୍ରାମ ସୁନା ଅଳଙ୍କାର ନେଇଥିବା ଏକ ଟ୍ରକ ଭାରସାମ୍ୟ ହରାଇ ଓଲଟି ପଡିଥିଲା | ପୁଲିସ କହିଛି ଯେ ଏକ ଘରୋଇ ଲଜିଷ୍ଟିକ୍ କମ୍ପାନୀ ପକ୍ଷରୁ ଏହି ବିପୁଳ ପରିମାଣର ଅଳଙ୍କାର ନେଇ କଣ୍ଟେନର କୋଏମ୍ବାଟୁରରୁ ସାଲେମକୁ ଯାଉଥିଲା। ତେବେ ରାସ୍ତାରେ ଭାରସାମ୍ୟ ହରାଇ ଏହା ଓଲଟିପଡିଥିଲା |
Sambad is now on WhatsApp
Join and get latest news updates delivered to you via WhatsApp
ଏହି ଦୁର୍ଘଟଣାରେ ଡ୍ରାଇଭର ଶଶି କୁମାର ଏବଂ ସଶସ୍ତ୍ର ସୁରକ୍ଷା କର୍ମୀ ବଲରାଜ ଗୁରୁତର ଆହତ ହୋଇଛନ୍ତି। ସୂଚନା ମୁତାବକ ଚିତୋଡ ପୁଲିସ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରିଛି। ତେବେ କଣ୍ଟେନରରେ ଥିବା ଅଳଙ୍କାର ସୁରକ୍ଷିତ ରହିଛି | ଦୁର୍ଘଟଣା ପରେ ଅଳଙ୍କାରର ରସିଦ ଦେଖି ପୁଲିସ ଗହଣା ପଠାଇଥିବା ସଂସ୍ଥା ସହ ଯୋଗାଯୋଗ କରିଥିଲା | ଘଟଣା ସମ୍ପର୍କରେ ସଂସ୍ଥା ପକ୍ଷରୁ ସୂଚନା ପାଇବା ପରେ ଏକ ଗାଡି ଏବଂ ସୁରକ୍ଷାକର୍ମୀଙ୍କୁ ଘଟଣାସ୍ଥଳକୁ ପଠାଯାଇଥିଲା। ଏହା ପରେ ଅଳଙ୍କାରକୁ ଅନ୍ୟ ଏକ ଗାଡିରେ ସାଲେମକୁ ପଠାଯାଇଥିଲା।