ସମ୍ବଲପୁର, ଅନୁଗୁଳ ପାଇଁ ୬୯୧ ପ୍ରକଳ୍ପ: ଅଭିଯୋଗ ପାଇଲା ମାତ୍ରେ ପ୍ରକଳ୍ପ ମଞ୍ଜୁର କରି ଇତିହାସ ରଚିଲେ ମୁଖ୍ୟମନ୍ତ୍ରୀ
ଲୋକଙ୍କ ସରକାର, ଲୋକ ଯାହା ଚାହିବେ ହେବ: ପାଣ୍ଡିଆନ
ଭୁବନେଶ୍ବର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ଆଜି ୫-ଟି ଓ ନବୀନ ଓଡ଼ିଶା ଅଧ୍ୟକ୍ଷ ଭି କେ ପାଣ୍ଡିଆନ ଆଭାସୀ(ଭିସି) ଜରିଆରେ ଅନୁଗୁଳ ଓ ସମ୍ବଲପୁର ଲୋକଙ୍କ ସହ ଆଲୋଚନା କରିଛନ୍ତି। ଅନୁଗୁଳ ଜିଲ୍ଲାର କିଶୋରନଗରର ବଡ଼ପଡ଼ିଆ ଓ ଛେଣ୍ଡିପଦାର ବଡ଼ସାହି ଏବଂ ସମ୍ବଲପୁର ଜିଲ୍ଲାର ରେଙ୍ଗାଲି ହାଇସ୍କୁଲ୍ ପଡ଼ିଆ, ଜମାଦାରପାଲି ପଡ଼ିଆ ଓ ହୀରାକୁଦର ସୁବାସ ମଇଦାନରେ ଉପସ୍ଥିତ ଲୋକଙ୍କ ସହ ସେ କଥା ହୋଇଥିଲେ। ଲୋକଙ୍କ ଠାରୁ ମିଳିଥିବା ଅଭିଯୋଗ ଓ ପ୍ରସ୍ତାବକୁ ଭିତ୍ତି କରି ଆଜି ହିଁ ବହୁ ପ୍ରକଳ୍ପକୁ ମଞ୍ଜୁରୀ ଦିଆଯାଇଛି। ଏହା ରାଜ୍ୟ ଶାସନରେ ଏକ ନୂଆ ଅଧ୍ୟାୟ ଯୋଡ଼ିଛି।
Sambad is now on WhatsApp
Join and get latest news updates delivered to you via WhatsApp
ଭିସି ଜରିଆରେ ଲୋକଙ୍କ ସହ କଥା ହେଲେ ପାଣ୍ଡିଆନ
ଅନୁଗୁଳ ଜିଲ୍ଲାରେ ୧୦.୪୭ କୋଟିରେ ୨୮୩ଟି ପ୍ରକଳ୍ପ ଓ ସମ୍ବଲପୁରରେ ୧୨.୫୯ କୋଟି ଟଙ୍କାରେ ୪୦୮ଟି ପ୍ରକଳ୍ପକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଞ୍ଜୁର କରିଛନ୍ତି। ଅଭିଯୋଗ/ପ୍ରସ୍ତାବ ଦେଇଥିବା ବ୍ୟକ୍ତିଙ୍କ ମୋବାଇଲ୍କୁ ଆଜି ହିଁ ମଞ୍ଜୁରୀ ନିର୍ଦ୍ଦେଶ ଯାଇଛି। ଶ୍ରୀ ପାଣ୍ଡିଆନ ସୂଚନା ଦେଇଥିଲେ ଯେ ଗତ ବର୍ଷ ଜୁଲାଇରେ ଅନୁଗୁଳ ଓ ସମ୍ବଲପୁର ଜିଲ୍ଲା ଗସ୍ତ ସମୟରେ ଲୋକଙ୍କ ଅଭିଯୋଗ/ମତାମତକୁ ଆଧାର କରି ୮୮୬ କୋଟି ଟଙ୍କାର ପ୍ରକଳ୍ପ କାର୍ଯ୍ୟ ହାତକୁ ନିଆଯାଇଛି। ମୁଖ୍ୟମନ୍ତ୍ରୀ ନେଇଥିବା ଗୁରୁତ୍ବପୂର୍ଣ୍ଣ ନିଷ୍ପତ୍ତି ସମ୍ପର୍କରେ ସୂଚନା ଦେଇ ୫-ଟି ଅଧ୍ୟକ୍ଷ କହିଥିଲେ, ମୁଖ୍ୟମନ୍ତ୍ରୀ ସାମାଜିକ ସୁରକ୍ଷା ପେନ୍ସନକୁ ୫୦୦ ଟଙ୍କା ବୃଦ୍ଧି କରିଛନ୍ତି। ଏହା ଦ୍ବାରା ୫୮ ଲକ୍ଷ ହିତାଧିକାରୀ ଉପକୃତ ହେବେ। ସେହିପରି ମମତା ଯୋଜନାରେ ସହାୟତା ରାଶି ୫ ହଜାରରୁ ୧୦ ହଜାର ଟଙ୍କାକୁ ବୃଦ୍ଧି କରାଯାଇଛି। ଏହା ଦ୍ବାରା ଉଭୟ ମହିଳା ଓ ଶିଶୁ ଉପକୃତ ହେବେ। ମିସନ୍ ଶକ୍ତି ଗୋଷ୍ଠୀ ଏବେ ବିନା ସୁଧରେ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ପାଇପାରିବେ। ଆଶା କର୍ମୀ ଓ ମିସନ୍ ଶକ୍ତି କମ୍ୟୁନିଟି କ୍ୟାଡର୍ ଖୁବ୍ ଶୀଘ୍ର ସେମାନଙ୍କ ପ୍ରାପ୍ୟ ବୃଦ୍ଧି ନେଇ ଭଲ ଖବର ପାଇବେ ବୋଲି ଶ୍ରୀ ପାଣ୍ଡିଆନ ପ୍ରତିଶ୍ରୁତି ଦେଇଥିଲେ।