ଭୁବନେଶ୍ବର : ବିରୋଧୀ ଦଳ ନେତା ଜୟନାରାୟଣ ମିଶ୍ର କହିଛନ୍ତି ଯେ ନବ ଦାସ ହତ୍ୟାକାଣ୍ଡର ୨୪ଦିନ ପରେ ମୁଖ୍ୟମନ୍ତ୍ରୀଙ୍କ ନିଦ ଭାଙ୍ଗିଲା। ମୁଖ୍ୟମନ୍ତ୍ରୀଙ୍କର ଲୋକ ଯେଉଁ କାଗଜ ଦେଲେ ତାକୁ ସେ ପଢ଼ିଦେଲେ। ତା’ଭିତରେ କ’ଣ ଅଛି ପଚାରିଲେ କହିପାରିବେନି। ମୁଖ୍ୟମନ୍ତ୍ରୀ ଆଜି ଯାହା କହିଲେ ସେଥିରେ କିଛି ନୂତନତ୍ବ ନାହିଁ। ସେ କ୍ରାଇମବ୍ରାଞ୍ଚ ତଦନ୍ତ କଥା କହିଛନ୍ତି। ହେଲେ ହତ୍ୟାର ଉଦ୍ଦେଶ୍ୟ କ’ଣ, ହତ୍ୟା ପଛରେ କିଏ ଅଛି ଏ ଦିଗରେ କ୍ରାଇମବ୍ରାଞ୍ଚ ଆଦୌ ତଦନ୍ତ କରୁନାହିଁ। ମୁଖ୍ୟମନ୍ତ୍ରୀ ଏଫ୍ବିଆଇ କଥା କହୁଛନ୍ତି। ସେ ଆମେରିକା ସଂସ୍ଥାକୁ ବିଶ୍ବାସ କରୁଛନ୍ତି, କିନ୍ତୁ ସିବିଆଇକୁ ବିଶ୍ବାସ କରିପାରୁନାହାନ୍ତି। ସବୁ ଟେଷ୍ଟ କେନ୍ଦ୍ରୀୟ ସଂସ୍ଥା ଦ୍ବାରା ହେବ। ଯଦି ଏହି ହତ୍ୟାକାଣ୍ଡ ପଛରେ କିଏ ଅଛି ଯଦି ସିବିଆଇ ତଦନ୍ତ କରନ୍ତା ତେବେ କ’ଣ କ୍ଷତି ହୁଅନ୍ତା।
Sambad is now on WhatsApp
Join and get latest news updates delivered to you via WhatsApp
ମୁଖ୍ୟମନ୍ତ୍ରୀ ଗୃହରେ କହିଛନ୍ତି ଯେ ସରକାର ହାଇକୋର୍ଟଙ୍କୁ ଅନୁରୋଧ କରିଥିଲେ, ଏହାପରେ ହାଇକୋର୍ଟ ଅବସରପ୍ରାପ୍ତ ବିଚାରପତି ଜଷ୍ଟିସ୍ ଜେ.ପି ଦାସଙ୍କୁ ଦାୟିତ୍ବ ଦେଇଛନ୍ତି। ଏହା ସଂପୂର୍ଣ୍ଣ ମିଛ କଥା। ପୂର୍ବରୁ ପରୀ କେସ୍ରେ ହାଇକୋର୍ଟ କହିଥିଲେ ରାଜ୍ୟ ସରକାର ଆମକୁ କିଛି ଚିଠି ଦେଇନାହାନ୍ତି। ତେଣୁ ଏଥିପାଇଁ ହାଇକୋର୍ଟର ଗୋଟିଏ ସ୍ବତନ୍ତ୍ର ଜୁଡିସିଆଲ୍ ଅର୍ଡର ହେବାର ଆବଶ୍ୟକତା ରହିଛି। ଧାରା ୨୨୬ରେ ହାଇକୋର୍ଟ ଗୋଟିଏ ଜୁଡିସିଆଲ୍ ଅର୍ଡର କରିବେ, ସେଥିରେ ବିଭିନ୍ନ ସର୍ତ୍ତ ଧାର୍ଯ୍ୟ ହେବା ଦରକାର। କେଉଁ କେଉଁ ଆଧାରରେ ତଦନ୍ତ ହେବ, କେଉଁ କେଉଁ ବିଷୟରେ ତଦନ୍ତ ହେବ ତାହା ହାଇକୋର୍ଟ ଉଲ୍ଲେଖ କରିବେ। କିନ୍ତୁ ଏଇଟା କିଛି ହୋଇନି। ମୁଖ୍ୟମନ୍ତ୍ରୀ ଭୁଆଁ ବୁଲାଇଛନ୍ତି।