ଭୁବନେଶ୍ବର: ବିବାହ କରିବାକୁ ଜିଦ୍ ଧରିବାରୁ ପ୍ରେମିକାକୁ ଛୁରୀରେ ୪୯ ଚୋଟ। ଏହି କଥାଟି ଶୁଣିଲେ କେଉଁ ଚଳଚ୍ଚିତ୍ର ପରି ଲାଗୁଛି ସିନା, ଭୁବନେଶ୍ବରର ଜଣେ ଜହ୍ଲାଦ ପ୍ରେମିକ ଏପରି ଜଘନ୍ୟ କାଣ୍ଡ ରଚିଥିବା ସୂଚନା ରହିଛି। ଜାଣିବାକୁ ମିଳିଛି ଯେ ପ୍ରେମିକା ବିବାହ କରିବାକୁ ଜିଦ୍ କରିବାରୁ ରାଗରେ ଆସି ପ୍ରେମିକ ଜଣକ ତାକୁ ଗୁଜୁରାଟର ସୁରଟକୁ ନେଇ ଛୁରୀରେ ୪୯ ଥର ଆଘାତ କରି ଅତି ନିର୍ମମ ଭାବେ ହତ୍ୟା କରିଛି।
Sambad is now on WhatsApp
Join and get latest news updates delivered to you via WhatsApp
ଅଭିଯୁକ୍ତ ପ୍ରେମିକ ଜଣକ ଜଗନ୍ନାଥ ଗୌଡ଼ ଓ ପ୍ରେମିକାର ନାମ ଲୁନି। ଜାଣିବାକୁ ମିଳିଛି ଯେ ସେ ହତ୍ୟା ପରେ ସୁରଟର ଅଞ୍ଜନି ଇଣ୍ଡଷ୍ଟ୍ରିଆଲ ଇଷ୍ଟେଟ ପାଖରୁ ଲୁନିଙ୍କ ରକ୍ତାକ୍ତ ମୃତଦେହ ଫୋପାଡ଼ି ଦେଇଥିଲା ଅଭିଯୁକ୍ତ। ମୃତଦେହ ଉଦ୍ଧାର କରି ତଦନ୍ତ ଆରମ୍ଭ କରିଥିଲା ପୁଲିସ୍।
ଏହି ଘଟଣାର ତଦନ୍ତ କରିବାକୁ ସୁରଟ ପୁଲିସ୍ ୫ ଶହରୁ ଅଧିକ ସିସିଟିଭି ଫୁଟେଜ୍ ଯାଞ୍ଚ୍ କରିଛି। ସିସିଟିଭି ଯାଞ୍ଚ୍ ଓ କଲ୍ ନେଟ୍ୱର୍କ ତଦନ୍ତ ପରେ ସୁରଟ ପୁଲିସ୍ ଜାଣିବାକୁ ପାଇଥିଲା ଯେ ଲୁନି ଓଡ଼ିଶାର। ତାପରେ ସେ ଅଭିଯୁକ୍ତ ପ୍ରେମିକକୁ ଗିରଫ କରିଛି।
ଭୁବନେଶ୍ୱରରେ ରହୁଥିବା ଲୁନିଙ୍କ ସହ ଜଗନ୍ନାଥର ୩ ବର୍ଷ ଧରି ପ୍ରେମ ସଂପର୍କରେ ଥିଲା। ଏମିତିକି ପ୍ରେମରେ ଅନ୍ଧ ହୋଇ ଲୁନି ନିଜ ପରିବାର ଲୋକଙ୍କୁ ଛାଡ଼ି ଜଗନ୍ନାଥ ପାଖକୁ ଚାଲି ଆସିଥିଲା। ବାହା ହେବାକୁ ଜିଦ କରିବାରୁ ଲୁନିକୁ ରାସ୍ତାରୁ ହଟାଇବାକୁ ନିଷ୍ପତି ନେଇଥିଲା ପ୍ରେମିକ। ରାଜ୍ୟ ଭିତରେ ହତ୍ୟା କଲେ କାଳେ ଅସୁବିଧାରେ ପଡ଼ିବ ସେଥିପାଇଁ ସୁରଟ ନେଇ ମାରିବାର ଷଧଯନ୍ତ୍ର ରଚିଥିଲା। ଭୁବନେଶ୍ୱରରୁ ସୁରଟ ନେଇ ପ୍ରେମିକାକୁ ୪୯ ଥର ଛୁରୀରେ ଆଘାତ କରି ହତ୍ୟା କରିଥିଲା।