ଲଇଡ଼ା ପ୍ରସିଦ୍ଧ ବଏଲ୍ ଯାତ୍ରା ଆଜି
ଲଇଡ଼ା: ରେଙ୍ଗାଲି ବ୍ଲକ୍ ଲଇଡ଼ାର ପ୍ରସିଦ୍ଧ ବଏଲ୍ ଯାତ୍ରା ରବିବାର ୯ ତାରିଖ ଦିନ ଅନୁଷ୍ଠିତ ହେବ। ଗତ ସପ୍ତମୀ ଦିନ ମା’ ପାଟଖଣ୍ଡା ଓ ଶୁକ୍ଲପକ୍ଷ ଅଷ୍ଟମୀ ଦିନ ଷୋହଳ ଖଣ୍ଡା ବିଧିବିଧାନ ବସାଯାଇଥିଲା। ଦଶହରା ସନ୍ଧ୍ୟାରେ ରଞ୍ଜିତା ଶୋଭାଯାତ୍ରା ହୋଇଥିଲା। ଏଥିପାଇଁ ଲଇଡ଼ାର ଅଧିଷ୍ଠାତ୍ରୀ ଦେବୀ ମା’ ସମଲେଶ୍ବରୀ ମନ୍ଦିରକୁ ରଙ୍ଗିନ ଆଲୋକରେ ସଜାଯାଇଛି। ସେହିପରି ଲଇଡ଼ାର ଚାରିପାଖ ମୁଖ୍ୟରାସ୍ତା ଓ ଛକଗୁଡ଼ିକରେ ବଡ଼ ବଡ଼ ରଙ୍ଗିନ ଆଲୋକର ତୋରଣ ମଧ୍ୟ ଲଗାଯାଇଛି। ଲଇଡ଼ା ଓ ଏହାର ଆଖପାଖ ଅଞ୍ଚଳ ଏବେ ଉତ୍ସବମୁଖର ହୋଇପଡ଼ିଛି। ଏହି ଅବସରରେ ଶନିବାରଠାରୁ ଆଧାର ମେମୋରିଏଲ ଦୁଇଦିନିଆ ଫୁଟ୍ବଲ୍ ପ୍ରତିଯୋଗିତା ଅନୁଷ୍ଠିତ ହେଉଛି। ଗତ ୬ରୁ ୧୦ ତାରିଖ ପର୍ଯ୍ୟନ୍ତ ଚକୋଲେଟ ରଙ୍ଗମଞ୍ଚ ଅପେରା ଅନୁଷ୍ଠିତ ହେଉଛି।
Sambad is now on WhatsApp
Join and get latest news updates delivered to you via WhatsApp
୯ ତାରିଖ ରବିବାର ବଏଲ୍ ଯାତ୍ରା ଦିନ ରକ୍ଷ୍ଟାର ଅର୍କେଷ୍ଟ୍ରା, ଭୁବନେଶ୍ବରର ନାଇଟ କିଙ୍ଗ୍ ଡ୍ୟାନ୍ ଗ୍ରୁପ, ମା’ ବାସନ୍ତୀ ଦଣ୍ଡନୃତ୍ୟ, ତିଲକ କୃଷ୍ଣଗୁରୁ, ମା’ ଶକ୍ତିମୟୀ ଦଣ୍ଡନୃତ୍ୟ ଓ ମା’ ଶେରାବାଳୀ କୃଷ୍ଣଗୁରୁ ଅନୁଷ୍ଠିତ ହେବ। ସେହିପରି ବଏଲ ଯାତ୍ରା ପରଦିନ ସୋମବାର ମା’ ତୋର ସାହାରା ଅର୍କେଷ୍ଟ୍ରା ଓ ଖୁସି ଏଣ୍ଡ ଖୁସି ଡ୍ୟାନ୍ ଗ୍ରୁପର କାର୍ଯ୍ୟକ୍ରମ ଅନୁଷ୍ଠିତ ହେବ ବୋଲି ଯାତ୍ରା କମିଟି ପକ୍ଷରୁ ସୂଚନା ଦିଆଯାଇଛି। ରବିବାର ସନ୍ଧ୍ୟାରେ ବରୁଆ ମନ୍ଦିରରୁ ଲଇଡାର ସମସ୍ତ ପଡା ଓ ରଙ୍ଗଟିକ୍ରା ଗ୍ରାମ ପରିକ୍ରମା କରି ମଢ଼େଇ ଗ୍ରହଣ କରିବେ। ସୋମବାର ଅପରାହ୍ଣ ମନ୍ଦିରକୁ ଫେରିଆସିଲା ପରେ ଯାତ୍ରା ସମ୍ପନ୍ନ ହେବ। ଯାତ୍ରାର ସମସ୍ତ ପୂଜାର୍ଚ୍ଚନାରେ ଜମିଦାତା ପୃଥ୍ବୀରାଜ ସିଂହ ମୁଖ୍ୟ କର୍ତ୍ତା ଓ କ୍ଷୀରୋଦ ପୂଝାରୀ ମୁଖ୍ୟ ପୂଜକ ଭାବେ ଉପସ୍ଥିତ ରହି କାର୍ଯ୍ୟ ସଂପାଦନା କରୁଛନ୍ତି। ଶାନ୍ତି ଶୃଙ୍ଖଳା ପାଇଁ କତରବଗା ଥାନା ଓ ଲଇଡା ଫାଣ୍ଡି ପକ୍ଷରୁ ବ୍ୟାପକ ପୁଲିସ ବ୍ୟବସ୍ଥା କରାଯାଇଛି ବୋଲି କମିଟି ତରଫରୁ ସୂଚନା ଦିଆଯାଇଛି।