ଗୋଟିଏ ଦିନରେ ଚାଲିଗଲେ ବାପା, ପୁଅ
ଗୋପାଳପ୍ରସାଦ : ଅନୁଗୁଳ ଜିଲ୍ଲା ତାଳଚେର ବ୍ଲକ୍ ପଦ୍ମାବତୀପୁର ପଞ୍ଚାୟତ କନ୍ଧବେରେଣି ଗାଁରେ ଶନିବାର ଦିନ ଏକ ଦୁଃଖଦ ଘଟଣା ଘଟିଛି। ସଡ଼କ ଦୁର୍ଘଟଣାରେ ଗାଁର ଅଜୟ ସାହୁ(୪୩)ଙ୍କର ଆଜି ଭୋରରେ ପ୍ରାଣହାନି ହୋଇଥିବା ବେଳେ ତାଙ୍କ ବାପା ଗୋଲୋକ ବିହାରୀ ସାହୁ(୭୮)ଙ୍କ ସନ୍ଧ୍ୟାରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଛି।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ଗୋଲୋକ ଅସୁସ୍ଥ ଥିବାରୁ ପୁଅ ଅଜୟ ତାଙ୍କୁ ଶନିବାର ଭୋରରେ ଏକ କାର୍ରେ ଭୁବନେଶ୍ବରର ଏକ ଘରୋଇ ଡାକ୍ତରଖାନାକୁ ନେଉଥିଲେ। ଆଠଗଡ଼ ନିକଟରେ କୌଣସି ଗାଡ଼ି ତାଙ୍କ କାର୍କୁ ଧକ୍କା ଦେଇଥିଲା। ଘଟଣାସ୍ଥଳରେ ଅଜୟଙ୍କ ମୃତ୍ୟୁ ଘଟିଥିଲା। ତାଙ୍କ ମରଶରୀର ଗାଁକୁ ଆଣି ସନ୍ଧ୍ୟାବେଳେ ଅନ୍ତିମ ସଂସ୍କାର ପାଇଁ ନେବା ସମୟରେ ଗୋଲୋକଙ୍କ ଭୁବନେଶ୍ବରର ସେହି ଘରୋଇ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଥିବା ଖବର ମିଳିଥିଲା। ଅଜୟ ଗାଁ ବିଜେଡିର ସଭାପତି ଓ ବିଜେଡିର ଜଣେ ବଳିଷ୍ଠ ସଂଗଠକ ଥିଲେ। ଜଣେ ସମାଜସେବୀ, ମିଷ୍ଟଭାଷୀ ବ୍ୟକ୍ତି ଭାବେ ସେ ଜଣାଶୁଣା ଥିଲେ।
କନ୍ଧବେରେଣୀସ୍ଥିତ ତାଙ୍କ ବାସଭବନରେ ସାଂସଦ ମହେଶ ସହୁ, ତାଳଚେର ବିଧାୟକ ବ୍ରଜକିଶୋର ପ୍ରଧାନ, ବିଜେପି ନେତା ମନୋଜ ପ୍ରଧାନ ପ୍ରମୁଖ ଯୋଗଦେଇ ତାଙ୍କର ଅନ୍ତିମ ଦର୍ଶନକରି ଶ୍ରଦ୍ଧାଞ୍ଜଳି ଦେଇଥିଲେ। ତାଳଚେର ପୌରାଧ୍ୟକ୍ଷ, କାଉନସିଲର୍, ତାଳଚେର ଓ କଣିହାଁ ପଞ୍ଚାୟତ ସମିତି ଅଧ୍ୟକ୍ଷ, ଜିଲ୍ଲାପରିଷଦ ସଭ୍ୟ, ସରପଞ୍ଚ, ସମିତି ସଭ୍ୟ, ୱାର୍ଡସଭ୍ୟଙ୍କ ସମେତ ବିଜେଡିର ବହୁ କର୍ମକର୍ତ୍ତା ପହଞ୍ଚି ଶୋକସନ୍ତପ୍ତ ପରିବାରକୁ ସମବେଦନା ଜଣାଇଥିଲେ। ବାପ, ପୁଅଙ୍କ ବିୟୋଗରେ ଅଞ୍ଚଳରେ ଶୋକ ପ୍ରକାଶ ପାଇଛି।