ନଭେମ୍ବର ୬ରୁ ବିକ୍ରି ହେବ ୨୯ତମ ଇଲେକ୍ଟୋରାଲ ବଣ୍ଡ୍

ନୂଆଦିଲ୍ଲୀ: ଏଇ ନିକଟରେ ୫ଟି ରାଜ୍ୟରେ ଅନୁଷ୍ଠିତ ହେବାକୁ ଥିବା ବିଧାନସଭା ନିର୍ବାଚନ ପୂର୍ବରୁ ସରକାର ୨୯ତମ ପର୍ଯ୍ୟାୟ ଇଲେକ୍ଟୋରାଲ ବଣ୍ଡ୍ ଜାରି କରିବାକୁ ଅନୁମୋଦନ ଦେଇଛନ୍ତି। ଫଳରେ ଆସନ୍ତା ନଭେମ୍ବର ୬ ତାରିଖରେ ୨୯ତମ ପର୍ଯ୍ୟାୟ ଇଲେକ୍ଟୋରାଲ ବଣ୍ଡ୍ ବିକ୍ରି ପାଇଁ ଉନ୍ମୁକ୍ତ ହେବ।

ରାଜସ୍ଥାନ, ମଧ୍ୟପ୍ରଦେଶ, ଛତିଶଗଡ଼, ତେଲେଙ୍ଗାନା ଓ ମିଜୋରାମ ରାଜ୍ୟର ବିଧାନସଭା ନିର୍ବାଚନ ପାଇଁ ପ୍ରଚାର ଚାଲିଥିବା ବେଳେ ସରକାରଙ୍କ ପକ୍ଷରୁ ଏହି ନିଷ୍ପତ୍ତି ନିଆଯାଇଛି। ନଭେମ୍ବର ୭ରୁ ୩୦ ତାରିଖ ପର୍ଯ୍ୟନ୍ତ ଏହି ସବୁ ରାଜ୍ୟରେ ନିର୍ବାଚନ ଅନୁଷ୍ଠିତ ହେବ। ଡିସେମ୍ବର ୩ ତାରିଖରେ ଭୋଟ୍‌ ଗଣତି ହେବ।

ରାଜନୈତିକ ପାଣ୍ଠିରେ ସ୍ୱଚ୍ଛତା ଆଣିବା ପ୍ରୟାସର ଏକ ଅଂଶ ଭାବରେ ରାଜନୈତିକ ଦଳଗୁଡ଼ିକୁ ଦିଆଯାଉଥିବା ନଗଦ ଦାନର ବିକଳ୍ପ ଭାବରେ ଇଲେକ୍ଟୋରାଲ ବଣ୍ଡ୍‌କୁ ଉପସ୍ଥାପନ କରାଯାଇଛି। ଭାରତ ସରକାରଙ୍କ ଅର୍ଥ ମନ୍ତ୍ରାଳୟ ପକ୍ଷରୁ କୁହାଯାଇଛି ଯେ ଭାରତୀୟ ଷ୍ଟେଟ୍‌ ବ୍ୟାଙ୍କ (ଏସବିଆଇ)କୁ ୨୦୨୩ ନଭେମ୍ବର ୬ରୁ ୨୦ ତାରିଖ ମଧ୍ୟରେ ଏହାର ୨୯ଟି ଅଧିକୃତ ଶାଖା ଜରିଆରେ ଇଲେକ୍ଟୋରାଲ ବଣ୍ଡ୍ ଜାରି କରିବା ଏବଂ ଏହାକୁ ନଗଦ କରିବାର ଅଧିକାର ପ୍ରଦାନ କରାଯାଇଛି।

ଉଲ୍ଲେଖଯୋଗ୍ୟ, ୨୦୧୮ ମାର୍ଚ୍ଚରେ ପ୍ରଥମ ପର୍ଯ୍ୟାୟ (ବ୍ୟାଚ୍‌)ର ଇଲେକ୍ଟୋରାଲ ବଣ୍ଡ୍ ବିକ୍ରି ହୋଇଥିଲା। ଇଲେକ୍ଟୋରାଲ ବଣ୍ଡ୍‌କୁ କେବଳ ମାତ୍ର ଯୋଗ୍ୟ ରାଜନୈତିକ ଦଳ ଅଧିକୃତ ବ୍ୟାଙ୍କରେ ଥିବା ବ୍ୟାଙ୍କ ଆକାଉଣ୍ଟ ଜରିଆରେ ନଗଦ କରିଥାନ୍ତି। ଭାରତୀୟ ଷ୍ଟେଟ୍‌ ବ୍ୟାଙ୍କ (ଏସବିଆଇ) ହେଉଛି ଏକମାତ୍ର ଅଧିକୃତ ବ୍ୟାଙ୍କ ଯିଏ ନିର୍ବାଚନୀ ବଣ୍ଡ୍ ଜାରି କରୁଛି।

ଅଧିକୃତ ଏସବିଆଇ ଶାଖାଗୁଡ଼ିକ ମଧ୍ୟରେ ବେଙ୍ଗାଲୁରୁ, ଲକ୍ଷ୍ନୌ, ଶିମଲା, ଡେରାଡୁନ, କୋଲକାତା, ଗୁଆହାଟି, ଚେନ୍ନାଇ, ପାଟନା, ନୂଆଦିଲ୍ଲୀ, ଚଣ୍ଡିଗଡ଼, ଶ୍ରୀନଗର, ଗାନ୍ଧୀନଗର, ଭୋପାଳ, ରାୟପୁର ଏବଂ ମୁମ୍ବାଇ ରହିଛି।
ଅର୍ଥ ମନ୍ତ୍ରାଳୟ ଆହୁରି ମଧ୍ୟ କହିଛି ଯେ ଇଲେକ୍ଟୋରାଲ ବଣ୍ଡ୍ ଜାରି ହେବାର ୧୫ ଦିନ ପର୍ଯ୍ୟନ୍ତ ବୈଧ ରହିବ ଏବଂ ଯଦି ବୈଧତା ଅବଧି ଶେଷ ହେବା ପରେ ବଣ୍ଡ୍ ଜମା କରାଯାଏ ତେବେ କୌଣସି ରାଜନୈତିକ ଦଳକୁ କୌଣସି ଦେୟ ପ୍ରଦାନ କରାଯିବ ନାହିଁ। ଯୋଗ୍ୟ ରାଜନୈତିକ ଦଳ ନିଜ ଆକାଉଣ୍ଟରେ ଜମା କରିଥିବା ଇଲେକ୍ଟୋରାଲ ବଣ୍ଡ୍‌କୁ ସେହି ସମାନ ଦିନ ଜମା କରାଯିବ।