ଇଷ୍ଟ୍ ବେଙ୍ଗଲକୁ ଆଜି ଭେଟିବ ଓଡ଼ିଶା
ଗୋଆ: ଓଡ଼ିଶା ଏଫ୍ସି ଚଳିତ ଆଇଏସ୍ଏଲ୍ ଫୁଟ୍ବଲ୍ ପ୍ରତିଯୋଗିତାର ସୋମବାର ମ୍ୟାଚ୍ରେ ଏସ୍ସି ଇଷ୍ଟ୍ ବେଙ୍ଗଲକୁ ଭେଟିବ। ଏହି ଭୁବନେଶ୍ବର ଭିତ୍ତିକ ଦଳ ନିଜ ଶେଷ ୩ ମ୍ୟାଚ୍ରେ ବିଜୟ ଶୂନ୍ୟ ରହିଛି। ତେବେ ତିଲକ ମୈଦାନରେ ଖେଳାଯିବାକୁ ଥିବା ଇଷ୍ଟ୍ ବେଙ୍ଗଲ ବିପକ୍ଷ ମ୍ୟାଚ୍ ଜିତି ସେମିଫାଇନାଲ୍ ଆଶା ଉଜ୍ଜୀବିତ ରଖିବା ଲାଗି ପ୍ରଶିକ୍ଷକ କିନୋ ଗାର୍ସିଆ ଦଳ ପଡ଼ିଆକୁ ଓହ୍ଲାଇବ। ସଂପ୍ରତି ଦଳ ୧୪ ମ୍ୟାଚ୍ ଖେଳି ୫ ବିଜୟ, ୩ ଅମୀମାଂସିତ ଓ ୬ ପରାଜୟରୁ ୧୮ ପଏଣ୍ଟ୍ ପାଇ ଟେବୁଲର ଅଷ୍ଟମ ସ୍ଥାନରେ ରହିଛି। ଚଳିତ ଆଇଏସ୍ଏଲ୍ରେ ଇଷ୍ଟ୍ ବେଙ୍ଗଲ ବିପକ୍ଷ ପ୍ରଥମ ମ୍ୟାଚ୍କୁ ଓଡ଼ିଶା ଏଫ୍ସି ୬-୪ ଗୋଲ୍ରେ ଜିତିଥିଲା। ତେଣୁ ଏହି ମ୍ୟାଚ୍ରେ ଓଡ଼ିଶା ଆଗରେ ରହିବାର ଆଶା ରହିଛି। ଅନ୍ୟପକ୍ଷରେ ଇଷ୍ଟ ବଙ୍ଗେ ୧୫ ମ୍ୟାଚ୍ ଖେଳି ୧ ବିଜୟ ଏବଂ ୭ ଲେଖାଏଁ ପରାଜୟ ଓ ଅମୀମାଂସିତରୁ ୧୦ ପଏଣ୍ଟ୍ ପାଇ ଟେବୁଲର ଦଶମ ସ୍ଥାନରେ ରହିଛି। କେବଳ ଏହି ଦଳ ଏଫ୍ସି ଗୋଆକୁ ପରାସ୍ତ କରିବାକୁ ସକ୍ଷମ ହୋଇଛି। ହେଲେ ଗତ ମ୍ୟାଚ୍ରେ ଚେନାୟିନ୍ ଏଫ୍ସି ବିପକ୍ଷରେ ଅମୀମାଂସିତ ରଖିଥିବାରୁ ଦଳର ମନୋବଳ ଦୃଢ଼ ରହିଛି।