ଭୁବନେଶ୍ୱର: କରୋନା ସଂକ୍ରମଣ କମିବା ପରେ ନବମ, ଦଶମ ଓ ଦ୍ୱାଦଶ ଶ୍ରେଣୀ ଛାତ୍ରଛାତ୍ରୀଙ୍କ ପାଇଁ ସ୍କୁଲ ଖୋଲିଥିବା ବେଳେ କେତେ ସଂଖ୍ୟକ ଛାତ୍ରଛାତ୍ରୀ ସ୍କୁଲ ଆସୁଛନ୍ତି ସେନେଇ ବିଧାନସଭାରେ ଉତ୍ତର ରଖିଛନ୍ତି ଗଣଶିକ୍ଷା ମନ୍ତ୍ରୀ ସମୀର ରଂଜନ ଦାଶ। ଲକଡାଉନ କୋହଳ ହେବା ପରେ ସ୍କୁଲରେ ଛାତ୍ରଛାତ୍ରୀଙ୍କର କେତେ ଉପସ୍ଥାନ ରହୁଛି? ବିଧାୟକ ସୌମ୍ୟରଞ୍ଜନ ପଟ୍ଟନାୟକଙ୍କ ଏହି ପ୍ରଶ୍ନର ଉତ୍ତର ଜିଲ୍ଲାୱାରୀ ଦେଇଛନ୍ତି ଗଣଶିକ୍ଷାମନ୍ତ୍ରୀ।
Sambad is now on WhatsApp
Join and get latest news updates delivered to you via WhatsApp
ଗୃହରେ ଉତ୍ତର ଦେଇ ସମୀର କହିଛନ୍ତି, ଲକଡାଉନ-୨ କୋହଳ ହେବା ପରେ ନବମ, ଦଶବ ଓ ଦ୍ୱାଦଶ ଶ୍ରେଣୀ ଛାତ୍ରଛାତ୍ରୀଙ୍କ କ୍ଲାସ ଆରମ୍ଭ ହୋଇଛି। ଆଉ ଏହି ସମୟରେ ଅଧିକାଂଶ ସ୍କୁଲରେ ଛାତ୍ରଛାତ୍ରୀଙ୍କ ଉପସ୍ଥାନ ୫୦% ଉପରେ ରହିଛି । ଅଥାର୍ତ ଅଧାରୁ ଅଧିକ ପିଲା ସ୍କୁଲ ଆସୁଛନ୍ତି।
ନୟାଗଡରେ ନବମ ଓ ଦଶମ ଶ୍ରେଣୀର ଛାତ୍ରଛାତ୍ରୀ ସ୍କୁଲକୁ ସର୍ବାଧିକ ଆସୁଥିବା ବେଳେ ବରଗଡରେ ଦ୍ୱାଦଶ ଶ୍ରେଣୀର ସର୍ବାଧିକ ଛାତ୍ରଛାତ୍ରୀ ଆସୁଛନ୍ତ। କରୋନା ପାଇଁ ପୂର୍ବରୁ ସ୍କୁଲ ଗୁଡିକ ବନ୍ଦ ରହିଥିବା ବେଳେ ଗତ କିଛିଦିନ ହେବ ଛାତ୍ରଛାତ୍ରୀଙ୍କ ପାଇଁ ସ୍କୁଲ ଖୋଲିଛି।
ସେହିଭଳି ତୃତୀୟ ଲହରରେ ଶିଶୁମାନେ ଆକ୍ରାନ୍ତ ହେଉଥିବାରୁ ପ୍ରାଥମିକ ସ୍କୁଲ ଛାତ୍ରଛାତ୍ରୀଙ୍କ ପ୍ରତ୍ୟକ୍ଷ ଶିକ୍ଷାଦାନ ବନ୍ଦ ହେବା ଆଶଙ୍କା ରହିଛି କି? ସୌମ୍ୟରଞ୍ଜନଙ୍କ ଏହି ପ୍ରଶ୍ନର ଉତ୍ତରରେ ଗଣଶିକ୍ଷାମନ୍ତ୍ରୀ କହିଛନ୍ତି, ପ୍ରାଥମିକ ବିଦ୍ୟାଳୟର ଛାତ୍ରଛାତ୍ରୀମାନଙ୍କର ଟିକାକରଣ ହୋଇନଥିବାରୁ ଓ ତଥାକଥିତ ତୃତୀୟ ଲହରରେ ଶିଶୁମାନେ ଆକ୍ରାନ୍ତ ହେବାର ଆଶଙ୍କା ଥିବାରୁ ଏପର୍ଯ୍ୟନ୍ତ ପ୍ରାଥମିକ ସ୍କୁଲରେ ପ୍ରତ୍ୟକ୍ଷ ଶିକ୍ଷାଦାନ ହୋଇପାରିବ ନାହିଁ । ଅଥାର୍ତ ପ୍ରାଥମିକ ସ୍କୁଲ ଛାତ୍ରଛାତ୍ରୀଙ୍କ ପାଇଁ ଏବେ ସ୍କୁଲ ଖୋଲିବା ନେଇ କୌଣସି ନିଷ୍ପତ୍ତି ନିଆଯାଇ ନଥିବା ନେଇ ସଂକେତ ମିଳୁଛି।