ନୂଆଦିଲ୍ଲୀ: ଇଲେକ୍ଟୋରାଲ ବଣ୍ଡ ଯୋଜନାରେ ସର୍ବାଧିକ ଚାନ୍ଦାଦେଇଥିବା ସଂସ୍ଥାମାନଙ୍କ ତାଲିକାରେ ଦ୍ବିତୀୟ ସ୍ଥାନରେ ଥିବା ମେଘା ଇଞ୍ଜିନିୟରିଂ ଆଣ୍ଡ ଇନଫ୍ରାଷ୍ଟ୍ରକଚର ଲିମିଟେଡର ଅଧିକାରୀଙ୍କ ବିରୋଧରେ ଦୁର୍ନୀତି ଅଭିଯୋଗ ଆସିଛି। କେନ୍ଦ୍ରୀୟ ତଦନ୍ତକାରୀ ସଂସ୍ଥା ସିବିଆଇ ଏହି ଅଧିକାରୀମାନଙ୍କ ବିରୋଧରେ ଦୁର୍ନୀତି ମାମଲା ରୁଜୁ କରିଛି। ଏହି କମ୍ପାନୀ ତରଫରୁ ଇଲେକ୍ଟୋରାଲ ବଣ୍ଡ୍ ଜରିଆରେ ରାଜନୈତିକ ଦଳମାନଙ୍କୁ ୧୨୦୦ କୋଟି ଟଙ୍କା ଦାନ କରାଯାଇଥିଲା ।
Sambad is now on WhatsApp
Join and get latest news updates delivered to you via WhatsApp
ଏନଆଇଏସପି ପାଇଁ ୩୧୫ କୋଟି ଟଙ୍କାର ପ୍ରକଳ୍ପ କାର୍ଯ୍ୟକାରିତାରେ ଦୁର୍ନୀତି ହୋଇଥିବା ଅଭିଯୋଗରେ ସିବିଆଇ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି। ସିବିଆଇ ମେଘା ଇଞ୍ଜିନିୟରିଂ ଆଣ୍ଡ ଇନଫ୍ରାଷ୍ଟ୍ରକଚର ଲିମିଟେଡ ସମେତ ଇସ୍ପାତ ମନ୍ତ୍ରଣାଳୟର ଏନଏମଡିସି ଆଇରନ୍ ଆଣ୍ଡ ଇସ୍ପାତ କାରଖାନାର ୮ ଜଣ ଅଧିକାରୀଙ୍କ ବିରୋଧରେ ମାମଲା ରୁଜୁ କରିଛି।
ନିକଟରେ ମେଘା ଇଞ୍ଜିନିୟରିଂ ଆଣ୍ଡ ଇନଫ୍ରାଷ୍ଟ୍ରକଚର ଲିମିଟେଡ ଇଲେକ୍ଟୋରାଲ ବଣ୍ଡ ସମ୍ପର୍କିତ ତଥ୍ୟ ସାମ୍ନାକୁ ଆସିବା ପରେ ଚର୍ଚ୍ଚାକୁ ଆସିଥିଲା । ରାଜନୈତିକ ଦଳଗୁଡ଼ିକୁ ଦାନ ଦେବାର ଶ୍ରେଷ୍ଠ ୧୦ ଟି ତାଲିକାରେ ଏହି କମ୍ପାନୀ ଦ୍ୱିତୀୟ ବୃହତ୍ତମ କ୍ରେତା ଭାବରେ ଉଭା ହୋଇଛି । ପାମିରେଡ୍ଡୀ ପିଚି ରେଡ୍ଡୀ ଏବଂ ପିଭି କ୍ରିଷ୍ଣା ରେଡ୍ଡୀଙ୍କ କମ୍ପାନୀ ଏମଇଆଇଏଲ ୯୬୬ କୋଟି ଟଙ୍କାର ଇଲେକ୍ଟୋରାଲ ବଣ୍ଡ କିଣିଥିଲେ। ଏହା ମଧ୍ୟରୁ ବିଜେପିକୁ ସର୍ବାଧିକ ୫୮୬ କୋଟି ଦିଆଯାଇଥିଲା ।