ମେଳା ବୁଲାଇ ନ ନେବାରୁ ବାପାକୁ ଗିରଫ କରିବାକୁ ଥାନାରେ ଅଭିଯୋଗ କଲା ପୁଅ
ଲକ୍ଷ୍ନୌ: ଯଦି ଆପଣଙ୍କୁ ଆପଣଙ୍କ ବାପା କୌଣସି ସ୍ଥାନକୁ ବୁଲାଇବାକୁ ନେଇ ପାରୁ ନାହାନ୍ତି, ତା’ହେଲେ ଆପଣ କ’ଣ କରିବେ? ପୁଲିସ ଆଗରେ ଅଭିଯୋଗ କରିବେ ? ତେବେ ଏହା ଆପଣଙ୍କ ଉପରେ ନିର୍ଭର କରେ । ଆପଣ ଏବେ ଭାବୁଥିବେ ଏତେ ଛୋଟ କଥା ପାଇଁ ଆପଣ ପୁଲିସ ଆଗରେ ଅଭିଯୋଗ କ’ଣ ପାଇଁ କରିବେ? କିନ୍ତୁ ଉତ୍ତରପ୍ରଦେଶରେ ଠିକ୍ ଏଭଳି କିଛି ଘଟିଛି ।
Sambad is now on WhatsApp
Join and get latest news updates delivered to you via WhatsApp
ଉତ୍ତରପ୍ରଦେଶର ଏଟଓ୍ଵାରେ ରହୁଥିବା ୧୧ ବର୍ଷିୟ ଓମ ନାରାୟଣ ଗୁପ୍ତା ତାଙ୍କ ବାପାଙ୍କ ଛୋଟ ଭୁଲ ପାଇଁ ପୁଲିସ ଆଗରେ ତାଙ୍କୁ ଗିରଫ କରିବା ପାଇଁ ଅଭିଯୋଗ କରିଥିଲେ । ଓମଙ୍କ ବାପା ଅମରନାଥ ଗୁପ୍ତା ଜଣେ ବ୍ୟବସାୟୀ ହୋଇଥିବାରୁ ଓମଙ୍କୁ ମେଳା ବୁଲାଇ ନେବା ପାଇଁ ତାଙ୍କ ପାଖରେ ସମୟ ନଥିଲା । ମେଳାକୁ ଯାଇ ନ ପାରିବାରୁ ସେ କାନ୍ଦି କାନ୍ଦି ପୁଲିସ ଷ୍ଟେସନରେ ଅଭିଯୋଗ କରିବା ପାଇଁ ଯାଇ ପହଞ୍ଚିଥିଲେ ।
କାରଣ ପଚରାଯିବାରୁ ମୋର ସବୁ ସାଙ୍ଗ ମେଳା ବୁଲିବାକୁ ତାଙ୍କ ବାପାଙ୍କ ସହ ଗଲେ । କିନ୍ତୁ ମୋ ବାପା ଏତେ ବ୍ୟସ୍ତ ଯେ ଶନିବାର ଏବଂ ରବିବାର ଦିନ ମଧ୍ୟ ମୋତେ ବୁଲାଇବାକୁ ନେଇ ପାରିଲେ ନାହିଁ । ସେଥିପାଇଁ ଆପଣ ତାଙ୍କୁ ଗିରଫ କରି ଆଣି ମାଡ଼ ମାରନ୍ତୁ ବୋଲି ଓମ୍ ପୁଲିସ କର୍ମଚାରୀଙ୍କୁ କହିଥିଲେ । ପୁରା ଘଟଣା ଶୁଣିବା ପରେ ପୁଲିସ କର୍ମଚାରୀମାନେ ଓମ୍ଙ୍କୁ ବୁଝାଇ ତାଙ୍କ ବାପାଙ୍କୁ ହସ୍ତାନ୍ତର କରିଥିଲେ ।