ବିଦେଶରେ କେତେ ଅଛି ଭାରତର କଳାଟଙ୍କା ଜାଣନ୍ତି କି ?
ନୂଆଦିଲ୍ଲୀ: ବିଦେଶରେ କେତେ କଳାଟଙ୍କା ବା ଅବୈଧ ଅର୍ଥ ରହିଛି | ଏହାକୁ ନେଇ ବିଭିନ୍ନ ସଂସ୍ଥା ଭିନ୍ନ ଭିନ୍ନ ରିପୋର୍ଟ ପ୍ରକାଶ କରିଛନ୍ତି | ମିଳିଥିବା ତଥ୍ୟ ଅନୁସାରେ ୧୯୮୦ ମସିହାରୁ ୨୦୧୦ ଯାଏଁ ପାଖାପାଖି ୧୭ ଲକ୍ଷ କୋଟିରୁ ୩୪ ଲକ୍ଷ କୋଟି ଟଙ୍କା କଳାଧନ ଭାବେ କିଛି ଭାରତୀୟ ସଞ୍ଚିତ କରି ରଖିଛନ୍ତି | ସୋମବାର ଦିନ ଲୋକସଭାରେ ଫାଇନାନ୍ସ ଷ୍ଟାଣ୍ଡିଙ୍ଗ କମିଟି ଏ ନେଇ ଏକ ରିପୋର୍ଟ ପ୍ରକାଶ କରିଛି | କମିଟି କହିଛି ଯେ କେତେ ପରିମାଣର କଳାଧନ ରହିଛି ତାହାର କୌଣସି ବିଶ୍ୱସନୀୟ ପ୍ରମାଣ ନାହିଁ | ତଥାପି ତିନିଟି ସଂସ୍ଥା କଳାଧନ ଗଛିତ ବାବଦରେ ସେମାନଙ୍କର ମତାମତ ରଖିଛନ୍ତି |
Sambad is now on WhatsApp
Join and get latest news updates delivered to you via WhatsApp
ରିପୋର୍ଟ ଅନୁସାରେ ନ୍ୟାସନାଲ କାଉନ୍ସିଲ ଅଫ ଆପଲାଏଡ ଇକୋନୋମିକ ରିସର୍ଚ୍ଚ ନିଜ ଅଧ୍ୟୟନରେ କହିଛି ଯେ ୧୯୮୦ରୁ ୨୦୧୦ ମଧ୍ୟରେ ୨୬.୮୮ ଲକ୍ଷ କୋଟିରୁ ୩୪.୩୦ ଲକ୍ଷ କୋଟି ଟଙ୍କାର କଳାଧନ ବିଦେଶକୁ ପଠାଯାଇଛି | ସେହିପରି ନ୍ୟାସନାଲ ଇନଷ୍ଟିଚ୍ୟୁଟ ଅଫ ଫାଇନାନସିଲ ମ୍ୟାନେଜମେଣ୍ଟ କହିଛି ଯେ ୧୯୯୦ରୁ ୨୦୦୮ ମଧ୍ୟରେ ୧୫.୧୫ ଲକ୍ଷ କୋଟି ଟଙ୍କା କଳାଧନ ପଠାଯାଇଥିଲା |
ନ୍ୟାସନାଲ ଇନଷ୍ଟିଚ୍ୟୁଟ ଅଫ ପବ୍ଲିକ ପଲିସୀ ଆଣ୍ଡ ଫାଇନେନସ କହିଛି ଯେ ୧୯୯୭ ମସିହାରୁ ୨୦୦୯ ମଧ୍ୟରେ ଦେଶର ଘରୋଇ ଉତ୍ପାଦ(ଜିଡିପି)ର ୦.୨ ପ୍ରତିଶତରୁ ୭.୪ ପ୍ରତିଶତ କଳାଧନ ବିଦେଶ ପଠାଯାଇଛି | କଳାଧନକୁ ନେଇ ରାଜନୈତିକ ବିବାଦ ମଧ୍ୟରେ ମାର୍ଚ୍ଚ ୨୦୧୧ରେ ତତ୍କାଳୀନ ସରକାର ଏହି ତିନିଟି ସଂସ୍ଥାକୁ ଦେଶ ଭିତରେ ଓ ଦେଶ ବାହାରେ ଥିବା କଳାଧନ ଅଧ୍ୟୟନ କରିବାର ଦାୟିତ୍ୱ ଦେଇଥିଲେ | ରିପୋର୍ଟରେ କୁହାଯାଇଥିଲା ଯେ ଅଘୋଷିତ ସମ୍ପତ୍ତିର ବିଶ୍ୱସନୀୟ ଆକଳନ କରିବା କଠିନ କାର୍ଯ୍ୟ |